ଲର୍ଡସ୍:  ଲର୍ଡସ୍ ଟେଷ୍ଟରେ ରୋମାଞ୍ଚର ଓ ହାଇଭୋଲଟେଜ୍ ମ୍ୟାଚରେ ଇଂଲଣ୍ଡ ଭାରତକୁ ୨୨ ରନରେ ପରାସ୍ତ କରିଛି। ଟିମ୍ ଇଣ୍ଡିଆ ସାମ୍ନାରେ ଥିଲା ୧୯୩ ରନର ବିଜୟ ଲକ୍ଷ୍ୟ। ଜବାବରେ ଦଳ ୧୭୦ ରନ କରି ପାରିଛି। ୨୦୧୮ ପରେ  ପ୍ରଥମ ଥର ଇଂଲଣ୍ଡ ଲର୍ଡସରେ ଭାରତୀୟ ଦଳକୁ ପରାସ୍ତ କରିଛି। ରବୀନ୍ଦ୍ର ଜାଡେଜା ଏକା ଲଢି ଭାରତର ବିଜୟ ଆଶାକୁ ଦୀର୍ଘ ସମୟ ପାଇଁ ଉଜ୍ଜୀବିତ ରଖିଥିଲେ। କିନ୍ତୁ ତାଙ୍କର ୬୧ ରନର ଇନିଂସ ଭାରତକୁ ୨୨ ରନର ପରାଜୟରୁ ରକ୍ଷା କରିପାରି ନଥିଲା।  ଭାରତ ଏବଂ ଇଂଲଣ୍ଡ ଉଭୟ ପ୍ରଥମ ଇନିଂସରେ ୩୮୭ ରନ କରିଥିଲେ। ଦ୍ୱିତୀୟ ଇନିଂସରେ ଇଂଲଣ୍ଡ ୧୯୨ ରନ କରିଥିଲା। କିନ୍ତୁ ଲର୍ଡସ୍ ଗ୍ରାଉଣ୍ଡର ରେକର୍ଡ ଏହା ଯେ  ଏଠାରେ ବିଜୟ ଲକ୍ଷ୍ୟ ପିଛା କରିବା ସବୁଠାରୁ କଷ୍ଟକର କାମ ମଧ୍ୟରୁ ଗୋଟିଏ।

ଭାରତୀୟ ଦଳ ୧୯୩ ରନର ବିଜୟ ଲକ୍ଷ୍ୟ ପିଛା କରିବାକୁ ମଇଦାନକୁ ଓହ୍ଲାଥିଲା। ଯଶସ୍ୱୀ ଜୟସ୍ୱାଲ ଖାତା ମଧ୍ୟ ଖୋଲିପାରି ନଥିଲେ। ଟିମ୍ ଇଣ୍ଡିଆ ପାଇଁ ନମ୍ବର-୩ ରେ ବ୍ୟାଟିଂ କରିଥିବା କରୁଣ ନାୟର ପୁଣି ନିରାଶ କରି ଗୁରୁତ୍ୱପୂର୍ଣ୍ଣ ମୁହୂର୍ତ୍ତରେ ମାତ୍ର ୧୪ ରନ୍ କରି ଆଉଟ୍ ହୋଇଥିଲେ। ଲର୍ଡସ୍ ଟେଷ୍ଟରେ ଅଧିନାୟକ ଶୁଭମନ ଗିଲଙ୍କ ବ୍ୟାଟ୍ ମଧ୍ୟ ଶାନ୍ତ ରହିଲା। ସେ ପ୍ରଥମ ଇନିଂସରେ ୧୬ ରନ୍ ଏବଂ ଦ୍ୱିତୀୟ ଇନିଂସରେ କେବଳ ୬ ରନ୍ କରିଥିଲେ।

ଭାରତ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟ ଭୋଗି ଏକଦା ୮୨ ସ୍କୋରରେ ୭ ୱିକେଟ୍ ହରାଇଥିଲା। ଏହି ସମୟରେ ଭାରତକୁ ଜିତିବା ପାଇଁ ୧୧୧ ରନ ଦରକାର ଥିଲା।  ଏହି ସମୟରେ, ନୀତିଶ କୁମାର ରେଡ୍ଡୀ ୧୩ ମୂଲ୍ୟବାନ ରନ୍ ଯୋଗଦାନ କରିଥିଲେ ଏବଂ ଜାଡେଜାଙ୍କ ସହିତ ୩୦ ରନ୍ ଯୋଡିଥିଲେ। ଅଷ୍ଟମ ୱିକେଟ୍ ପତନ ଯାଏଁ  ୮୧ ରନ୍ ଆବଶ୍ୟକ ଥିଲା। 

ଏହା ପରେ ଯଶପ୍ରୀତ ବୁମରା ଏବଂ ମହମ୍ମଦ ସିରାଜ ଦୀର୍ଘ ସମୟ ପର୍ଯ୍ୟନ୍ତ ଜାଡେଜାଙ୍କୁ ସମର୍ଥନ କରିଥିଲେ। ଗୋଟିଏ ପଟେ, ବୁମରାହ ଏକ ବଡ଼ ସଟ୍ ଖେଳିବାକୁ ଚେଷ୍ଟା କରି ଆଉଟ୍ ହୋଇଗଲେ। ସିରାଜ ଡିଫେନ୍ସ କରିବା ସମୟରେ ତାଙ୍କ ବ୍ୟାଟରେ ବଲ୍ ବାଜି ଷ୍ଟମ୍ପରେ ବାଜିଥିଲା। ଏଥିସହ ଭାରତ ୧୭୦ ରନରେ ଅଲଆଉଟ୍ ହୋଇଛି। ଜାଡ଼େଜାଙ୍କ ୬୧ ରନର ଇନିଂସ ବୃଥା ହୋଇଛି। ଇଂଲଣ୍ଡ ତୃତୀୟ ଟେଷ୍ଟ ଜିତି ୫ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ୍ରେ ୨-୧ରେ ଅଗ୍ରଣୀ ହାସଲ କରିଛି।