ନୂଆଦିଲ୍ଲୀ: ହାତରୁ ଖସିଗଲା ବିଶ୍ୱକପ୍ । ପୁଣି ଗୋଟିଏ ସିରିଜ୍ ଉପରେ ସଙ୍କଟର ବାଦଲ । ଏକ ଟୁର୍ଣ୍ଣାମେଣ୍ଟ ବି ବାଜିରେ ଲାଗିଛି । ଏହା ହେଉଛି ବାଂଲାଦେଶ କ୍ରିକେଟର କାହାଣୀ । ବଂଲାଦେଶ ପାଇଁ ୨୦୨୬ର ଆରମ୍ଭ ବେଶ ଦୁଃଦାୟକ ରହିଛି । ଏପରିକି ବର୍ଷର ଶେଷ ସମୟ ବି ସ୍ଥିତି ଦୟନୀୟ ହେବାର ଆଶଙ୍କା ରହିଛି । ତେଣୁ ପୂରା  ବର୍ଷଟି ଯେମିତି ଖରାପ ନ ହେଉ ଏବଂ ଭବିଷ୍ୟତ ଭଲ ହେଉ ଏଥିପାଇଁ ବାଂଲାଦେଶ କ୍ରିକେଟ୍ ବୋର୍ଡ ଏବେ ଭାରତ ସହିତ ନିଜର ସମ୍ବନ୍ଧ ସୁଧାରିବାକୁ ଉଦ୍ୟମ ଆରମ୍ଭ କରିଛି । ଏକ ରିପୋର୍ଟ ମୁତାବକ ବିସିବି ଭାରତୀୟ କ୍ରିକେଟ୍ କଂଟ୍ରୋଲ ବୋର୍ଡ(ବିସିସିଆଇ)କୁ ଚିଠି ଲେଖି ସଂପର୍କ ପୁଣି ଥରେ ପୂର୍ବ ପରି କରିବାକୁ ଇଚ୍ଛା ପ୍ରକାଶ କରିଛି । 

ଏକ ରିପୋର୍ଟରେ ଖୁଲାସା ହୋଇଛି ଯେ, ଦେଶରେ ନୂଆ ସରକାର ଗଠନ ପରେ ବାଂଲାଦେଶ କ୍ରିକେଟ୍ ବୋର୍ଡ ନିକଟରେ ବିସିସିଆଇକୁ ଚିଠି ଲେଖିଥିଲା । ଏହି ଚିଠିରେ ବାଂଲାଦେଶ ଓ ଭାରତର ପୁରୁଣା ସଂପର୍କ ଉଲ୍ଲେଖ କରାଯାଇଛି ଏବଂ ଆଶା ପ୍ରକାଶ କରିଛି ଯେ, ପୁଣି ଥରେ ଦୁଇ ବୋର୍ଡ ମଧ୍ୟରେ ପୂର୍ବ ପରି ସଂପର୍କ ସ୍ଥାପନ ହେଉ । ବିସିସିଆଇ ଓ ବିସିବି ସୂତ୍ରରୁ ଏହି ଖବର ପ୍ରକାଶ ପାଇଛି । 

 ବାଜିରେ ଲାଗିଛି ବାଂଲାଦେଶର  ସିରିଜ୍ ଓ ଟୁର୍ଣ୍ଣାମେଣ୍ଟ

ବାଂଲାଦେଶର ଆଭିମୁଖ୍ୟରେ ପରିବର୍ତ୍ତନ ଆସିବାର କାରଣ ଆଗାମୀ ଦିନରେ ଗୁରୁତ୍ୱପୂର୍ଣ୍ଣ ଟୁର୍ଣ୍ଣାମେଣ୍ଟ ଓ ସିରିଜ୍ ବାଜିରେ ଲାଗିଛି । ଭାରତ ଓ ବାଂଲାଦେଶ ମଧ୍ୟରେ ଚଳିତ ବର୍ଷ ସେପ୍ଟେମ୍ବରରେ ଦିନିକିଆ ଓ ଟି-୨୦ ସିରିଜ୍ ଖେଳାଯିବାର ଅଛି । ଏଥିପାଇଁ ଭାରତୀୟ ଦଳ ବାଂଲାଦେଶ ଗସ୍ତ କରିବ । ଏହି ସିରିଜ୍ ଗତ ବର୍ଷ ଖେଳା  ଯିବାର ଥିଲା । କିନ୍ତୁ ବାଂଲାଦେଶର ଅବସ୍ଥାକୁ ଦୃଷ୍ଟିରେ ରଖି ସିରିଜ ୨୦୨୬ ସେପ୍ଟେମ୍ବରକୁ ଘୁଞ୍ଚାଇବା ପାଇଁ ଦୁଇ ବୋର୍ଡ ନିଷ୍ପତ୍ତି ନେଇଥିଲେ । ମାତ୍ର ପୁଣି ଆଇପିଏଲ୍ ଓ ଟି-୨୦ ବିଶ୍ୱକପକୁ ନେଇ ବିବାଦ କାରଣରୁ ସିରିଜ୍ ବିପଦରେ ପଡି ଯାଇଛି । 

କେବଳ ସିରିଜ୍ ନୁହେଁ, ବରଂ ଆସନ୍ତା ବର୍ଷ ହେବାକୁ ଥିବା ଏସିଆ କପ ମଧ୍ୟ ସବୁଠୁ ବଡ କାରଣ । ଏସିଆ କପର ଆୟୋଜକ ବାଂଲାଦେଶ ରହିଛି । ଯଦି ବିସିସିଆଇ ସହ ସଂପର୍କରେ ସୁଧାର ନ ଆସେ ତେବେ ଟିମ୍ ଇଣ୍ଡିଆ ବାଂଲାଦେଶ ଗସ୍ତ କରିବାକୁ ମନା କରି ପାରେ । ଏମିତି ହେଲେ ଏହାର ଆୟୋଜନ ପୁଣି ଥରେ ବାଂଲାଦେଶ ବାହାରେ କରିବାକୁ ପଡିବ । ଯଦି ଟିମ୍ ଇଣ୍ଡିଆ ଦ୍ୱିପାକ୍ଷିକ ସିରିଜ୍ ଓ ଏସିଆ କପ୍ ପାଇଁ ବାଂଲାଦେଶ ଗସ୍ତ ନ କରେ ତେବେ ବିସିବିକୁ ବଡ କ୍ଷତି ସହିବାକୁ ପଡିପାରେ । ଏଥିରୁ ବଞ୍ଚିବା ପାଇଁ ବୋର୍ଡ ସଂପର୍କ ସୁଧାରିବା ଉପରେ ଗୁରୁତ୍ୱ ଦେଇଛି । 

ଦୁଇ ଦେଶ ଏବଂ କ୍ରିକେଟ ବୋର୍ଡ ମଧ୍ୟରେ ସମ୍ପର୍କ ଖରାପ 

ବାଂଲାଦେଶରେ ଶେଖ ହସିନା ସରକାର କ୍ଷମତାଚ୍ୟୁତ ହେବା ପରଠାରୁ ଗତ ଦେଢ଼ ବର୍ଷ ଧରି ଭାରତ ଏବଂ ବାଂଲାଦେଶ ମଧ୍ୟରେ ସମ୍ପର୍କ ଖରାପ ହେବାରେ ଲାଗିଛି। ସେବେଠାରୁ ବାଂଲାଦେଶରେ ସଂଖ୍ୟାଲଘୁ ହିନ୍ଦୁଙ୍କ ହତ୍ୟା ଘଟୁଛି। ଏହା ବ୍ୟତୀତ, ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାର ଭାରତ ବିରୁଦ୍ଧରେ ଉତ୍ତେଜନାମୂଳକ ବୟାନ ଦେଇ ଆସୁଛି। ଜାନୁଆରୀ 2026 ରେ, BCCI ବାଂଲାଦେଶୀ ପେସର ମୁସ୍ତାଫିଜୁର ରହମାନଙ୍କୁ IPL ରୁ ବହିଷ୍କାର କରିବାକୁ ନିର୍ଦ୍ଦେଶ ଦେଇଥିଲା। ଏହାର ଜବାବରେ, ଅନ୍ତରୀଣ ସରକାରଙ୍କ କ୍ରୀଡା ମନ୍ତ୍ରୀ ଏବଂ ସେତେବେଳେ ବୋର୍ଡ ଦାୟିତ୍ୱରେ ଥିବା ଅଧିକାରୀମାନେ ଭାରତରେ T20 ବିଶ୍ୱକପ୍ ଖେଳିବାକୁ ମନା କରି ଦେଇଥିଲେ।