ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଲକ୍ଷ୍ନୌରେ କଂଗ୍ରେସ ଉପରେ ମହିଳା ସଂରକ୍ଷଣ ବିଲ୍‌କୁ ବିରୋଧ କରିବା ଏବଂ ସଙ୍କୀର୍ଣ୍ଣ ମାନସିକତା ପ୍ରଦର୍ଶନ କରିଥିବା ଅଭିଯୋଗ ଆଣିଛନ୍ତି। ସେ କହିଛନ୍ତି ଯେ ବିରୋଧୀମାନେ ଏହି ବିଲ୍ ବିରୁଦ୍ଧରେ ଷଡ଼ଯନ୍ତ୍ର କରିଛନ୍ତି ଏବଂ ସୀମା ନିର୍ଦ୍ଧାରଣ (Delimitation) ନେଇ ଭ୍ରମ ସୃଷ୍ଟି କରିଛନ୍ତି। ଶାହବାନୋ ମାମଲାର ଉଦାହରଣ ଦେଇ ଯୋଗୀ ମୁସଲିମ୍ ମହିଳାଙ୍କ ଅଧିକାରରୁ ସେମାନଙ୍କୁ ବଞ୍ଚିତ ରଖିବା ପାଇଁ କଂଗ୍ରେସର ପୁରୁଣା ପ୍ରୟାସକୁ ମଧ୍ୟ ମନେ ପକାଇ ଦେଇଛନ୍ତି।

ଲକ୍ଷ୍ନୌରେ ଗଣମାଧ୍ୟମ ସହ କଥାବାର୍ତ୍ତା ବେଳେ ମୁଖ୍ୟମନ୍ତ୍ରୀ କହିଛନ୍ତି ଯେ କଂଗ୍ରେସ ସଂସଦରେ ଅଶୋଭନୀୟ ଆଚରଣ ପ୍ରଦର୍ଶନ କରିଛି। ସେ କହିଛନ୍ତି ଯେ ମହିଳା ସଂରକ୍ଷଣ ବିଲ୍‌କୁ କଂଗ୍ରେସ ବିରୋଧ କରିଛି। ମହିଳା ସଂରକ୍ଷଣ ଉପରେ ବିରୋଧୀଙ୍କ ଚିନ୍ତାଧାରା ଅତି ସଙ୍କୀର୍ଣ୍ଣ। ଯେଉଁମାନେ ଏହି ପାପର ଅଂଶୀଦାର, ଜନସାଧାରଣ ସେମାନଙ୍କ ବିରୁଦ୍ଧରେ ଅଛନ୍ତି। ସେ କଂଗ୍ରେସ ଓ ସମାଜବାଦୀ ପାର୍ଟିକୁ ପ୍ରଶ୍ନ କରିଛନ୍ତି ଯେ, 'ନାରୀ ଶକ୍ତି ବନ୍ଦନ ଅଧିନିୟମ' ଜରିଆରେ ଯେଉଁ ପ୍ରକ୍ରିୟା ଆଗେଇ ଚାଲିଥିଲା, ସେଥିରେ ପୁରୁଷଙ୍କ ଅଧିକାର ଛଡ଼ାଇ ନିଆଯାଉ ନଥିଲା, ତେବେ କାହିଁକି ଏହାକୁ ବିରୋଧ କରାଗଲା?

ସେ କହିଛନ୍ତି ଯେ ମହିଳା ସଶକ୍ତିକରଣ ପାଇଁ ଏହା ଏକ ଅତ୍ୟନ୍ତ ପ୍ରଗତିଶୀଳ ପଦକ୍ଷେପ ଥିଲା। ଆଜି ଯେଉଁମାନେ ମୁସଲିମ୍ ମହିଳାଙ୍କ କଥା କହୁଛନ୍ତି, କଂଗ୍ରେସ ସରକାର ସମୟରେ ଶାହବାନୋ ମାମଲାରେ ଯେତେବେଳେ ସେମାନଙ୍କୁ ଅଧିକାରରୁ ବଞ୍ଚିତ ରଖିବାକୁ ପ୍ରୟାସ ହେଉଥିଲା, ସେତେବେଳେ ସେମାନେ କେଉଁଠି ଥିଲେ? ଏହା ହେଉଛି NDA ମେଣ୍ଟ, ଯେଉଁଠାରେ ପ୍ରଧାନମନ୍ତ୍ରୀ ମୋଦୀଙ୍କ ସରକାର କଂଗ୍ରେସର ଏହି ଭୁଲକୁ ସୁଧାରିବାର କାମ କରିଛନ୍ତି। ଟ୍ରିପଲ ତଲାକ ବିରୁଦ୍ଧରେ ଅଣାଯାଇଥିବା ଆଇନକୁ ମଧ୍ୟ ସେତେବେଳେ କଂଗ୍ରେସ ବିରୋଧ କରିଥିଲା ବୋଲି ଯୋଗୀ କହିଛନ୍ତି।

ମୁଖ୍ୟମନ୍ତ୍ରୀ ଆହୁରି କହିଛନ୍ତି ଯେ ଦେଶରେ ମହିଳାମାନଙ୍କର କ୍ରୋଧ ସ୍ପଷ୍ଟ ଦେଖିବାକୁ ମିଳୁଛି। ଇଣ୍ଡି ମେଣ୍ଟ (INDIA Alliance) କେଉଁ ସୀମା ପର୍ଯ୍ୟନ୍ତ ଯାଇ ଷଡ଼ଯନ୍ତ୍ର କରୁଛି, ତାହା ସାମ୍ନାକୁ ଆସୁଛି। ସେମାନେ ବାବା ସାହେବଙ୍କ ନାମ ନେଉଛନ୍ତି କିନ୍ତୁ ତାଙ୍କ ଦେଖାଇଥିବା ପଥରେ ଚାଲୁନାହାନ୍ତି। ଯୋଗୀ ଟାହିଟାପରା କରି କହିଛନ୍ତି ଯେ କଂଗ୍ରେସ ଓ ଇଣ୍ଡି ମେଣ୍ଟକୁ ଦେଶରେ ସର୍ବାଧିକ ସମୟ ଶାସନ କରିବାର ସୁଯୋଗ ମିଳିଥିଲା, କିନ୍ତୁ ମହିଳା, ଗରିବ ଓ କୃଷକଙ୍କ ପାଇଁ ସେମାନେ କେବେବି କୌଣସି ଭଲ ଚିନ୍ତାଧାରାକୁ ଆଗକୁ ବଢ଼ାଇ ପାରିଲେ ନାହିଁ।

'ପ୍ରଧାନମନ୍ତ୍ରୀ ୪ଟି ଜାତି ବିଷୟରେ କହିଥିଲେ'

ସଂସଦରେ ଇଣ୍ଡି ମେଣ୍ଟର ଆଚରଣ ଉପରେ ଏହି ପ୍ରେସ୍ କନ୍‌ଫରେନ୍ସ କେନ୍ଦ୍ରିତ ଥିଲା। ମୁଖ୍ୟମନ୍ତ୍ରୀ କହିଛନ୍ତି, "ଆମେ ସମସ୍ତେ ଜାଣୁ ଯେ ୨୦୧୪ରେ ଯେତେବେଳେ ପ୍ରଧାନମନ୍ତ୍ରୀ ଦେଶର ଶାସନ ଭାର ଗ୍ରହଣ କରିଥିଲେ, ସେ ସ୍ପଷ୍ଟ ଭାବେ କହିଥିଲେ ଯେ ଏ ଦେଶରେ କେବଳ ୪ଟି ଜାତି ଅଛନ୍ତି- ନାରୀ, ଗରିବ, ଯୁବକ ଓ କୃଷକ।" ଭାରତକୁ ଦୁର୍ବଳ କରିବା ପାଇଁ ଯେଉଁମାନେ ଜାତିବାଦ ନାମରେ ନିଜ ପରିବାରର ପେଟ ପୋଷିଛନ୍ତି, ସେମାନଙ୍କ ପାଇଁ ଏହା ଏକ ଚ୍ୟାଲେଞ୍ଜ ଓ ଚେତାବନୀ ଥିଲା। ଏହି ପ୍ରେସ୍ ବାର୍ତ୍ତା ମୁଖ୍ୟତଃ 'ନାରୀ ଶକ୍ତି ବନ୍ଦନ ଅଧିନିୟମ' ଏବଂ ଏହା ଉପରେ ଜନସାଧାରଣଙ୍କ ପ୍ରତିକ୍ରିୟା ଜାଣିବା ପାଇଁ ଆୟୋଜିତ ହୋଇଛି।

ମୁଖ୍ୟମନ୍ତ୍ରୀ କହିଛନ୍ତି ଯେ ୨୦୨୩ରେ ନାରୀ ଶକ୍ତି ବନ୍ଦନ ଅଧିନିୟମ ପାରିତ ହୋଇଥିଲା। ଏହି ଅଧିନିୟମ ୨୦୩୪ ପରିବର୍ତ୍ତେ ୨୦୨୯ରେ ଲାଗୁ ହେଉ ବୋଲି ମହିଳା ଓ ସାମାଜିକ ସଂଗଠନଗୁଡ଼ିକ ଦାବି କରିଥିଲେ। ସେମାନଙ୍କ ଦାବି ଅନୁଯାୟୀ ପ୍ରଧାନମନ୍ତ୍ରୀ ସମସ୍ତ ପକ୍ଷ ସହ ଆଲୋଚନା କରି କେନ୍ଦ୍ର ସରକାର ଏଥିରେ ଆବଶ୍ୟକ ସଂଶୋଧନ ଆଣିଥିଲେ। କିଛି ରାଜ୍ୟ ଆଶଙ୍କା ପ୍ରକାଶ କରିଥିଲେ ଯେ ଏହା ଦ୍ୱାରା ସେମାନଙ୍କ ଅଧିକାର କମିଯିବ।

'ଦକ୍ଷିଣ ରାଜ୍ୟରେ ମଧ୍ୟ ଅନୁପାତ ବଢ଼ିବ'

ମୁଖ୍ୟମନ୍ତ୍ରୀ କହିଛନ୍ତି ଯେ ନାରୀ ଶକ୍ତି ବନ୍ଦନ ଅଧିନିୟମ ୨୦୨୩ ପାରିତ ହେବା ସମୟରେ ପ୍ରଧାନମନ୍ତ୍ରୀ ସ୍ପଷ୍ଟ କରିଥିଲେ ଯେ କାହାରି ଅଧିକାର ଛଡ଼ାଯିବ ନାହିଁ। ଏଥିପାଇଁ ୩୩ ପ୍ରତିଶତ ସଂରକ୍ଷଣ ନିମନ୍ତେ ଲୋକସଭା ଓ ବିଧାନସଭାରେ ଅତିରିକ୍ତ ଆସନ ବୃଦ୍ଧି କରାଯିବ। ଯେତେବେଳେ ଦକ୍ଷିଣ ଭାରତର ରାଜ୍ୟଗୁଡ଼ିକ ଏହି ଆଶଙ୍କା ଜାହିର କଲେ, ସେତେବେଳେ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ ଆଶ୍ୱାସନା ଦେଇଥିଲେ ଯେ ୨୦୧୧ ଜନଗଣନା ଅନୁଯାୟୀ, ଉତ୍ତର ଓ ପୂର୍ବ ରାଜ୍ୟଗୁଡ଼ିକ ଭଳି ଦକ୍ଷିଣ ରାଜ୍ୟରେ ମଧ୍ୟ ସମାନ ଅନୁପାତରେ ସିଟ୍ ବଢ଼ିବ। କାହାରି ଅଧିକାର କମିବ ନାହିଁ, କେବଳ ଭାରତୀୟ ନାରୀଙ୍କୁ ସୁରକ୍ଷା ଓ ସମ୍ମାନ ଦେବା ହିଁ ମୂଳ ଲକ୍ଷ୍ୟ ବୋଲି ଯୋଗୀ କହିଛନ୍ତି।