ନୂଆଦିଲ୍ଲୀ: ଉତ୍ତରାଖଣ୍ଡ ସୈଲାପାନି ଘାଟି ନିକଟରେ ଏକ ବସ୍ ଦୁର୍ଘଟଣା ଗ୍ରସ୍ତ ହୋଇଛି । ଫଳରେ ୭ ଜଣ ଯାତ୍ରୀଙ୍କର ଦୁଃଖଦ ମୃତ୍ୟୁ ହୋଇଥିବାବେଳେ ୧୨ ଜଣ ଆହତ ହୋଇଛନ୍ତି । ମୃତ ବ୍ୟକ୍ତିମାନେ ହେଲେ ଗୋବିନ୍ଦ ବଲ୍ଲଭ, ତାଙ୍କ ପତ୍ନୀ ପାର୍ବତୀ ଦେବୀ, ତାରା ଦେବୀ, ନରେନ୍ଦ୍ର ସିଂହ ସୁବେଦାର, ଗଣେଶ, ଉମେଶ ଏବଂ ଗୋବିନ୍ଦୀ ଦେବୀ । ଅନ୍ୟ ଗୁରୁତର ଆହତଙ୍କୁ ନିକଟସ୍ଥ ମେଡ଼ିକାଲରେ ଭର୍ତ୍ତି କରାଯାଇଛି । କିଛି ସଙ୍କଟାପନ୍ନ ଯାତ୍ରୀଙ୍କୁ ଏୟାର ଲିପ୍ଟ କରିବାକୁ ମଧ୍ୟ ଉଦ୍ୟମ କରାଯାଉଛି । 

ମଙ୍ଗଳବାର ସକାଳ ୬ଟାରେ କୁମାଓଁ ମୋଟର ମାଲିକ ସଂଘ (କେଏମଓୟୁ) ଲିମିଟେଡ୍ ଯାତ୍ରୀବାହୀ ବସ୍ (ୟୁକେ ୦୭ ପିଏ ୪୦୨୫) ଦ୍ୱାରହାଟର ନୋବାରାରୁ ରାମନଗର ଅଭିମୁଖେ ବାହାରିଥିଲା । ସକାଳ ୮ଟାରେ ସୈଲାପାନି ନିକଟରେ ଦୁର୍ଘଟଣାଗ୍ରସ୍ତ ହୋଇଥିଲା । ବସଟି ଟର୍ଣ୍ଣ ନେଉଥିବା ବେଳେ ହଠାତ୍ ନିୟନ୍ତ୍ରଣ ହରାଇ ସିଧା ଗଭୀର ଗର୍ତ୍ତକୁ ଖସି ପଡ଼ିଥିଲା। ଦୁର୍ଘଟଣା ଏତେ ଗୁରୁତର ଥିଲା ଯେ ଘଟଣାସ୍ଥଳରେ ଛଅ ଜଣ ଯାତ୍ରୀଙ୍କ ମୃତ୍ୟୁ ହୋଇଥିଲା। ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ଅନ୍ୟ ଜଣଙ୍କର ମୃତ୍ୟୁ ହୋଇଥିଲା।

ସୂଚନା ପାଇବା ମାତ୍ରେ ପୋଲିସ, ପ୍ରଶାସନ ଏବଂ ବିପର୍ଯ୍ୟୟ ପରିଚାଳନା ଦଳ ଘଟଣାସ୍ଥଳରେ ପହଞ୍ଚିଥିଲେ। ଅଧିକ ଗଭୀର ଯୋଗୁଁ ଉଦ୍ଧାର କାର୍ଯ୍ୟରେ ବାଧା ସୃଷ୍ଟି ହୋଇଥିଲା । ସ୍ଥାନୀୟ ଗ୍ରାମବାସୀଙ୍କ ସହାୟତାରେ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ କରାଯାଇଥିଲା। ଆହତମାନଙ୍କୁ ପ୍ରାଥମିକ ଚିକିତ୍ସା ପାଇଁ ଭିକିୟାସେନର ନିକଟତମ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ଗୁରୁତର ଆହତମାନଙ୍କୁ ବିମାନ ମାଧ୍ୟମରେ ପଠାଇବା ପାଇଁ ପ୍ରସ୍ତୁତି ଚାଲିଛି। 

ରାଣୀଖେତ ବିଧାୟକ ପ୍ରମୋଦ ନୈନୱାଲ କହିଛନ୍ତି ଯେ ବସ୍ ଦୁର୍ଘଟଣାରେ ଗୁରୁତର ଆହତ ଯାତ୍ରୀମାନଙ୍କୁ ଉନ୍ନତ ଚିକିତ୍ସା ପାଇଁ ଋଷିକେଶର ଏମ୍ସକୁ ବିମାନରେ ସ୍ଥାନାନ୍ତର କରାଯିବ । ବିଧାୟକ ଏ ସମ୍ପର୍କରେ ସ୍ୱାସ୍ଥ୍ୟମନ୍ତ୍ରୀ ଧନ ସିଂହ ରାୱତଙ୍କ ସହ କଥା ହୋଇଛନ୍ତି ଏବଂ ଆବଶ୍ୟକ ବ୍ୟବସ୍ଥା କରାଯାଉଛି। ଏହି ସମୟରେ, ବିଧାୟକ ମହେଶ ଜିନା ମଧ୍ୟ ଘଟଣାସ୍ଥଳରେ ପହଞ୍ଚି ଆହତମାନଙ୍କ ସ୍ୱାସ୍ଥ୍ୟାବସ୍ଥା ପଚାରି ବୁଝିଛନ୍ତି। ପ୍ରଶାସନ ଏବଂ ସ୍ୱାସ୍ଥ୍ୟ ବିଭାଗ ଦଳ ରିଲିଫ୍ ଏବଂ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି, ଏବଂ ଆହତମାନଙ୍କୁ ତୁରନ୍ତ ଚିକିତ୍ସା ସହାୟତା ଯୋଗାଇ ଦିଆଯାଉଛି।

କେଏମଓୟୁ ବସ୍ ମାଲିକ ମହମ୍ମଦ ଅଲତାଫ କହିଛନ୍ତି ଯେ ସେ ଦୁଇ ମାସ ପୂର୍ବରୁ ବସ୍ କିଣିଥିଲେ। ମଡେଲ୍ ନମ୍ବର ୨୦୧୯ ଏବଂ ସମସ୍ତ ବୈଧ କାଗଜପତ୍ର ସମ୍ପୂର୍ଣ୍ଣ ହୋଇଛି। ଡ୍ରାଇଭରଙ୍କ ନାମ ନବୀନ ଚନ୍ଦ୍ର ଏବଂ କଣ୍ଡକ୍ଟରଙ୍କ ନାମ ପ୍ରକାଶ ନୈନୱାଲ । ଡ୍ରାଇଭର ଏବଂ କଣ୍ଡକ୍ଟର ଉଭୟ ସୁରକ୍ଷିତ ଅଛନ୍ତି । ପୋଲିସ ତଦନ୍ତ ଆରମ୍ଭ କରିଛି ।