ଉତ୍ତରପ୍ରଦେଶ: ବିବାହ ବାର୍ଷିକ ପାଇଁ ଚାଲିଥିଲା ସେଲିବ୍ରେସନ । ୨୫ ତମ ବିବାହ ବାର୍ଷିକକୁ ସ୍ମରଣୀୟ କରିବାକୁ ବଡ଼ ପାର୍ଟିର ବି ଆୟୋଜନ ହୋଇଥିଲା । ନାଚ,ଗୀତ,ଖାଦ୍ୟପେୟର ଆସର ବି ଜମିଥିଲା । ମଞ୍ଚ ଉପରେ ହାତ ଧରାଧରି ହୋଇ ନାଚୁଥିଲେ ଦମ୍ପତି, ଆଉ ସେମାନଙ୍କ ନାଚକୁ ଉପଭୋଗ କରୁଥିଲେ ସେଠାକାର ଅତିଥୀ, ହେଲେ କେହି କିଛି ବୁଝିବା ପୂର୍ବରୁ ହଠାତ୍ ମଞ୍ଚ ଉପରୁ ପଡିଯାଉଛନ୍ତି ବ୍ୟକ୍ତି ଜଣକ, ସମସ୍ତେ ଧାଇଁଯାଇ ତାଙ୍କୁ ଉଠାଇବା ବେଳକୁ ସେ ଅଚେତ ହୋଇଯାଇଛନ୍ତି, ଏବଂ ତୁରନ୍ତ ତାଙ୍କୁ ହସ୍ପିଟାଲ ନିଆଯାଉଛି । ଆଉ ସେଠାରେ ଡାକ୍ତର ତାଙ୍କ ମୃତ ଘୋଷଣା କରୁଛନ୍ତି । ନିମିଷକେ ମଧ୍ୟରେ ଖୁସିର ମୂହୁର୍ତ୍ତ କାନ୍ଦ ବୋବାଳିରେ ଫାଟିପଡୁଛି । ଉତ୍ତରପ୍ରଦେଶର ବରେଲୀରୁ ଆସିଛି ଏଭଳି ହୃଦୟ ବିଦାରକ ଘଟଣା।ଘଟଣା ମୁତାବିକ ବରେଲୀର ଏକ ଜଣାଶୁଣା ବିଜନେସମ୍ୟାନ ୱାସିମ ତାଙ୍କ ୨୫ ତମ ବିବାହ ବାର୍ଷିକ ପାଳୁଥିଲେ । ଏଥିପାଇଁ  ପିଲିଭିଟ୍ ବାଇପାସ୍ ନିକଟରେ ଥିବା ଏକ ମ୍ୟାରେଜ୍ ଲନରେ ସମାରୋହ ଚାଲିଥିଲା। ସବୁ କିଛି ସୁନ୍ଦର ଭାବେ ଆଗେଇ ଚାଲିଥିଲା। ୱାସିମ ଓ ତାଙ୍କ ପତ୍ନୀ ଫରାହ ନାଚୁଥିଲେ, ଚାରିଆଡ଼େ ତାଳି ଓ ହସଖୁସିର ଶବ୍ଦ ଗୁଞ୍ଜରି ଉଠୁଥିଲା। କେହି କଳ୍ପନା ମଧ୍ୟ କରି ନଥିଲେ ଯେ ଏହି ଆନନ୍ଦର ମୁହୂର୍ତ୍ତ ଏତେ ଦୁଃଖଦ ଅନ୍ତ ଦେଖିବ।

ମଞ୍ଚରେ ନାଚିବା ବେଳେ ୱାସିମ ହଠାତ୍ ତଳେ ପଡିଗଲେ । ପ୍ରଥମେ ସମସ୍ତେ ଭାବୁଥିଲେ ଏହା ନାଚର ଏକ ଅଂଶ ହୋଇଥାଇପାରେ, ହେଲେ ସେ ନ ଉଠିବାରୁ ନିମିଷକରେ ହାହାକାର ଲାଗିଲା ।  ଯେଉଁଠି କିଛି ସମୟ ପୂର୍ବରୁ ହସ ଓ ଗୀତର ଧ୍ୱନି ଥିଲା, ସେଠାରେ ଏବେ କେବଳ କାନ୍ଦଣା ଓ ଚିତ୍କାର ଶୁଭୁଥିଲା। ଏହି ଅଘଟଣ ପରିବାର ଓ ଉପସ୍ଥିତ ସମସ୍ତଙ୍କ ପାଇଁ ଏକ ବଡ଼ ଆଘାତ ହୋଇଛି।