ମହାକାଶ କ୍ଷେତ୍ରରେ ଇସ୍ରୋ ଲେଖିବ ନୂଆ ଇତିହାସ । ପ୍ରଥମକରି ଇଣ୍ଟରନ୍ୟାସନାଲ ସ୍ପେସ୍ ଷ୍ଟେସନକୁ ପଠାଇବ ମାନବ । ନାସାର ଆକ୍ସିମୋ ସ୍ପେସ୍ ମିଶନ-୪ରେ ଅନ୍ତରୀକ୍ଷ ଯାତ୍ରା କରିବେ ଭାରତର ଶୁଭ୍ରାଂଶୁ ଶୁକ୍ଲା । ଆସନ୍ତା ମଇ ମାସରେ ଫ୍ଲୋରିଡ଼ାର କାନେଡୀ ସ୍ପେସ ଷ୍ଟେସନରୁ ISS ପାଇଁ ଯାତ୍ରା କରିବେ । ଆମେରିକୀୟ ମହାକାଶ ଗବେଷଣା ସଂସ୍ଥା ନାସା ପକ୍ଷରୁ ଏହି ବିଷୟ ଘୋଷଣା କରାଯାଇଛି। 

ଇଣ୍ଟରନ୍ୟାସନାଲ ସ୍ପେସ ଷ୍ଟେସନକୁ ଯାତ୍ରା କରି ଶୁଭ୍ରାଂଶୁ ସୃଷ୍ଟି କରିବାକୁ ଯାଉଛନ୍ତି ନୂଆ ରେକର୍ଡ ।  ଶୁଭ୍ରାଂଶୁ ବର୍ତ୍ତମାନ ଭାରତୀୟ ବାୟୁସେନାର ଗ୍ରୁପ କ୍ୟାପଟେନ ଅଛନ୍ତି। ମହାକାଶ ଯାତ୍ରା କ୍ଷେତ୍ରରେ ବିଶ୍ବର ଆଗଧାଡିରେ ରାଷ୍ଟ୍ରଙ୍କ ସହ ଭାରତର ପ୍ରତିଯୋଗିତା ଚାଲିଥିବାବେଳେ ଶୁଭ୍ରାଂଶୁ ଆଉ ଏକ ନୂଆ ଇତିହାସ ଯୋଡିବେ। ଶୁଭ୍ରାଂଶୁଙ୍କ ସହ ଅନ୍ୟ ଯେଉଁମାନେ ମହାକାଶ ଯିବେ ସେମାନେ ହେଲେ ନାସାର ପୂର୍ବତନ ଆଷ୍ଟ୍ରୋନଟ ପେଗି ହୁଇଟସନ, ପୋଲାଣ୍ଡର ସ୍ଲାଓଜ ଉଜନାନସ୍କି ଓ ହଙ୍ଗେରୀର ତିବୋର କାପୁ। Axiom Mission 4 (Ax-4) ମିଶନ ଜରିଆରେ ନାସା ମହାକାଶରେ ବୈଜ୍ଞାନିକ ପରୀକ୍ଷଣ, ଶିକ୍ଷାଗତ ପଦକ୍ଷେପ ଏବଂ ବ୍ୟବସାୟିକ ଗତିବିଧୀ ଉପରେ ଧ୍ୟାନ ଦେବ । ସେହିପରି ମହାକାଶରେ ଭାରତର ସମୃଦ୍ଧ ସଂସ୍କୃତି ପ୍ରଦର୍ଶନ କରିବାକୁ ପ୍ରୟାସ କରିବେ ଶୁଭ୍ରାଂଶୁ ଶୁକ୍ଲା । ମହାକାଶର ମାଇକ୍ରୋ ଗ୍ରାଭିଟି ବାତାବରଣରୁ ଯୋଗ ପ୍ରଦର୍ଶନ କରିବାକୁ ମଧ୍ୟ ଯୋଜନା ରଖିଛନ୍ତି ଶୁଭ୍ରାଂଶୁ ।

ଶୁଭ୍ରାଂଶୁଙ୍କ ଜନ୍ମ ହେଉଛି ଉତ୍ତରପ୍ରଦେଶର ଲକ୍ଷ୍ନୌରେ । ୨୦୦୬ରେ ଭାରତୀୟ ବାୟୁସେନାର ଯୁଦ୍ଧ ବିମାନରେ ଯୋଗଦେଇଥିଲେ ଶୁଭ୍ରାଂଶୁ । ମାର୍ଚ୍ଚ ୨୦୨୪ରେ ଗ୍ରୁପ୍ କ୍ୟାପଟେନ୍‌ ହୋଇଥିଲେ । ଭାରତର ଉଚ୍ଚାଭିଳାଷୀ ମାନବ ମହାକାଶ ମିଶନ ଗଗନଯାନ ପାଇଁ ମଧ୍ୟ ଶୁଭ୍ରାଂଶୁଙ୍କୁ ମହାକାଶଚାରୀ ଭାବେ ମନୋନୀତ କରିଛି ଇସ୍ରୋ । ମିଶନ ସଫଳ ହେଲେ ଶୁଭ୍ରାଂଶୁ ଶୁକ୍ଲା ଇଣ୍ଟରନ୍ୟାସନାଲ ସ୍ପେସ ଷ୍ଟେସନ ଯାତ୍ରା କରିବାରେ ପ୍ରଥମ ଭାରତୀୟ ଏବଂ ରାକେଶ ଶର୍ମାଙ୍କ ପରେ ଦ୍ୱିତୀୟ ମହାକାଶଚାରୀ ହେବେ ।