ନୂଆଦିଲ୍ଲୀ: ୱାକଫ ସଂଶୋଧନ ବିଧେୟକ ୨୦୨୫କୁ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ମଞ୍ଜୁରୀ ମିଳିଛି । ରାଷ୍ଟ୍ରପତି ଭବନ ପକ୍ଷରୁ ଶନିବାର ବିଳମ୍ବିତ ରାତିରେ ଏ ନେଇ ବିଜ୍ଞପ୍ତି ପ୍ରକାଶ ପାଇଛି । ଏଥିସହ ୱାକଫ ସଂଶୋଧନ ବିଲ୍ ଆଇନରେ ପରିଣତ ହୋଇଛି । ରାଷ୍ଟ୍ରପତି ଭବନ ପକ୍ଷରୁ ପ୍ରକାଶିତ ବିଜ୍ଞପ୍ତିରେ କୁହାଯାଇଛି ଯେ, ସଂସଦରୁ ଗୃହୀତ ୱାକଫ ସଂଶୋଧନ ବିଧେୟକକୁ ୨୦୨୫ ଏପ୍ରିଲ ୫ ତାରିଖରେ ରାଷ୍ଟ୍ରପତିଙ୍କ ମଞ୍ଜୁରୀ ମିିଳି ଯାଇଛି । ଏଥିସହ ରାଷ୍ଟ୍ରପତି ମୁର୍ମୁ ମୁସଲମାନ ୱାକଫ ନିରସନ ବିଧେୟକ ୨୦୨୫କୁ ମଧ୍ୟ ମଞ୍ଜୁରୀ ଦେଇଛନ୍ତି । ସରକାର କହିଛନ୍ତି ଯେ, ଏହି ଆଇନ ଏବେ ୱାକଫ ସଂପତ୍ତିର ଦୁରୁପଯୋଗ ରୋକିବ । 

ଏହି ନୂଆ ଆଇନକୁ ପ୍ରଥମରୁ ବିରୋଧ କରି ଆସିଥିବା କଂଗ୍ରେସ, ଏଆଇଏମଆଇଏମ ଓ ଆମ ଆଦାମୀ ପାର୍ଟି(ଆପ୍‌) ସୁପ୍ରିମକୋର୍ଟରେ ଅଲଗା ଅଲଗା ଯାଚିକା ଦାୟର କରିଛନ୍ତି । ଦେଶର ଅଲଗା ଅଲଗା ରାଜ୍ୟରେ ଅନେକ ମୁସଲିମ ସଂଗଠନ ଏହି ଆଇନ ବିରୋଧରେ ବିକ୍ଷୋଭ ପ୍ରଦର୍ଶନ କରୁଛନ୍ତି । ୱାକଫ ସଂଶୋଧନ ବିଧେୟକ ୨୦୨୫କୁ ସଂସଦରେ ଲମ୍ବା ସମୟ ବିତର୍କ ପରେ ଗୃୀତ ହୋଇଛି । 

ପ୍ରଥମେ ଏହାକୁ ଲୋକସଭାରେ ଏପ୍ରିଲ ୨ ତାରିଖ ଉପସ୍ଥାପନ କରାଗଲା । ଦୀର୍ଘ ୧୨ ଘଣ୍ଟାର ଆଲୋଚନା ପରେ ମତଦାନ କରାଗଲା । ଲୋକସଭାର ୫୪୩ ସଦସ୍ୟ ମଧ୍ୟରୁ ୫୨୦ ଉପସ୍ଥିତ ଥିଲେ । ଏଥିରୁ ୨୮୮ ବିଧେୟକ ସପକ୍ଷରେ ଓ ୨୩୨ ବିପକ୍ଷରେ ଭୋଟ୍ ଦେଇଥିଲେ । ଏହା ପରେ ବିଧେୟକୁ ରାଜ୍ୟସଭାରେ ଆଗତ କରାଯାଇଥିଲା । ଏପ୍ରିଲ ୪ରେ ୧୩ ଘଣ୍ଟାରୁ ଅଧିକ ସମୟ ବିତର୍କ ହୋଇଥିଲା । ସଂସଦର ଉଚ୍ଚ ସଦନରେ ହୋଇଥିବା ଭୋଟିଂରେ ୨୪୫ରୁ ୨୨୩ ସଦସ୍ୟ ଉପସ୍ଥିତ ଥିଲେ । ଏଥିରୁ ବିଧେୟକ ସପକ୍ଷରେ ୧୨୮ ଓ ବିପକ୍ଷରେ ୯୫ ଜଣ ସାଂସଦ ଭୋଟ୍ ଦେଇଥିଲେ । 

ରାଷ୍ଟ୍ରପତି ଦ୍ରୌପଦୀ ମୁର୍ମୁ ୱାକଫ ସଂଶୋଧନ ବିଧେୟକୁ ସେହି ସମୟରେ ମଞ୍ଜୁରୀ ଦେଇଛନ୍ତି ଯେତେବେଳେ ଅଲଇଣ୍ଡିଆ ମୁସଲିମ ପର୍ସନାଲ ଲ ବୋର୍ଡ(ଏଆଇଏମପିଏଲବି) ଏହା ଉପରେ ଆଲୋଚନା ପାଇଁ ରାଷ୍ଟ୍ରପତିଙ୍କ ସମୟ ମାଗିଥିଲେ । ଏବେ ଏଆଇଏମପିଏଲବି  ସମଗ୍ର ଦେଶରେ ଆନ୍ଦୋଳନ କରିବାକୁ ଚେତାବନୀ ଦେଇଛି । ବୋର୍ଡ ଦିଲ୍ଲୀ, ମୁମ୍ବାଇ, କୋଲକାତା, ହାଇଦ୍ରାବାଦ, ବେଙ୍ଗାଲୁରୁ, ଚେନ୍ନାଇ, ବିଜୟୱାଡା, ମଲ୍ଲପୁରମ, ପାଟନା, ରାଞ୍ଚି, ମଲେରକୋଟଲା ଓ ଲଖଉନରେ ବ୍ୟାପକ ବିରୋଧ ପ୍ରଦର୍ଶନ କରିବ ।