କୋଲକାତା: ପଶ୍ଚିମବଙ୍ଗରେ ଏପ୍ରିଲ ୬ରେ ରାମ ନବମୀ ଉପଲକ୍ଷେ ହିନ୍ଦୁ ସଂଗଠନକୁ ଶୋଭାଯାତ୍ରା ବାହାର କରିବାକୁ ନିଃସର୍ତ୍ତ ଅନୁମତି ଦେଇଛନ୍ତି । କୋର୍ଟଙ୍କ ଏହି ଆଦେଶ ପରେ ଶୁକ୍ରବାର ପଶ୍ଚିମବଙ୍ଗ ସରକାର ସୁରକ୍ଷା ଏଜେନ୍ସିକୁ ହାଇଆଲର୍ଟ ଜାରି କରିଛନ୍ତି । ମୁଖ୍ୟମନ୍ତ୍ରୀ ମମତା ବାନାର୍ଜୀ ସମସ୍ତ ସମୁଦାୟକୁ ଗୁଜବ ପ୍ରତି ଧ୍ୟାନ ନ ଦେବାକୁ ଅପିଲ୍ କରିଛନ୍ତି । ରାଜ୍ୟ ସରକାର ରାମନବମୀ ପାଇଁ ସୁରକ୍ଷା ବ୍ୟବସ୍ଥା କଡାକଡି କରିବା ସହିତ ୨୯ ଆଇପିଏସ୍ ଅଫିସରଙ୍କୁ ସ୍ୱତନ୍ତ୍ର ଦାୟିତ୍ୱ ଦେଇଛନ୍ତି । ଏଥିସହ କୋଲକାତାରେ ପାଞ୍ଚ ହଜାର ପୋଲିସ କର୍ମଚାରୀଙ୍କୁ ମୁତୟନ କରାଯାଇଛି । ରାମନବମୀ ଶୋଭାଯାତ୍ରାର ଫଟୋ ନେବା ଓ ଭିଡିଓ ପ୍ରସ୍ତୁତ କରିବାକୁ ମଧ୍ୟ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି ।

ବରିଷ୍ଠ ପୋଲିସ ଅଧିକାରୀଙ୍କ ମତରେ ରାମନବମୀ ଅଢୁଆଳରେ ଅଶାନ୍ତି ସୃଷ୍ଟି କରିବା ପାଇଁ ହୋଇଥିବା ଷଡଯନ୍ତ୍ର ନେଇ ଗୁଇନ୍ଦା ରିପୋର୍ଟ ମିଳିଛି । ଏହାକୁ ଦୃଷ୍ଟିରେ ରଖି ସୁରକ୍ଷା ବଢାଇ ଦିଆଯାଇଛି । ଏଥିରେ କୋଲକାତା, ମୁର୍ଶିଦାବାଦ, ହାୱଡା, ପଶ୍ଚିମ ମେଦିନିପୁର, ଉତ୍ତର ଦକ୍ଷିଣ ୨୪ ପ୍ରଗଣା, ଅଲିପୁରଦ୍ୱାର, କୁଚବିହାର ଆଦି ଅଞ୍ଚଳରେ ଅତିରିକ୍ତ ପୋଲିସ ବଳ ଓ ରାପିଡ ଆକ୍ସନ ଫୋର୍ସ ମୁତୟନ କରାଯାଇଛି ।

ସୂଚନାଯୋଗ୍ୟ, ରାଜ୍ୟରେ ୨ ବର୍ଷରେ ରାମନବମୀ ଶୋଭାଯାତ୍ରାରେ ହିଂସା ଘଟଣା ଘଟି ସାରିଛି । ୨୦୨୩ରେ ହୁଗୁଳି ଓ ହାୱଡାରେ ଶୋଭାଯାତ୍ରା ସମୟରେ ପଥରମାଡ କାରଣରୁ ତିନି ଜଣଙ୍କ ମୃତ୍ୟୁ ଘଟିଥିଲା । ରାମନବମୀକୁ ନେଇ ପଶ୍ଚିମବଙ୍ଗରେ ରାଜନୀତି ଜୋର ଧରିଛି । ବିଜେପି ନେତା ଶୁଭେନ୍ଦୁ ଅଧିକାରୀ ନନ୍ଦିଗ୍ରାମରେ ଅଯୋଧ୍ୟା ପରି ରାମମନ୍ଦିର ନିର୍ମାଣ କରାଯିବ ବୋଲି ଘୋଷଣା କରିଛନ୍ତି । ଏହାର ଶିଳାନ୍ୟାସ୍ ରାମନବମୀରେ କରାଯିବ ବୋଲି ସେ କହିଛନ୍ତି । ରାମନବମୀ ଶୋଭାଯାତ୍ରାରେ ଆକ୍ରମଣ ହେଲେ ଏହାର ବିରୋଧ କରାଯିବ ବୋଲି ବିଜେପି କହିଛି । ରାଜ୍ୟରେ ଆୟୋଜିତ ହେବାକୁ ଥିବା ଶୋଭାଯାତ୍ରାରେ ପାଖାପାଖି ଦେଢ କୋଟି ହିନ୍ଦୁ ସାମିଲ ହେବେ ବୋଲି ବିଜେପି ପକ୍ଷରୁ କୁହାଯାଇଛି ।