ନୂଆଦିଲ୍ଲୀ: ଶ୍ରୀଲଙ୍କା ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ‘ମିତ୍ର ବିଭୂଷଣ’ ମେଡାଲରେ ସମ୍ମାନିତ କରିଛି । ଶ୍ରୀଲଙ୍କା ସରକାର ଦୁଇ ଦେଶର ଦ୍ୱିପାକ୍ଷିକ ସଂପର୍କକୁ ଆହୁରି ନିବିଡ କରିବା ଓ ପରସ୍ପର ସାଂସ୍କୃତିକ ସହଭାଗିତାକୁ ଆଗକୁ ବଢାଇରେ ଉଲ୍ଲେଖନୀୟ ଭୂମିିକା ଗ୍ରହଣ କରିଥିବାରୁ ପିଏମ ମୋଦୀଙ୍କୁ ଏହି ସମ୍ମାନରେ ସମ୍ମାନିତ କରିଛି । ଏହାକୁ ମିଶାଇ ଏ ପର୍ଯ୍ୟନ୍ତ ପ୍ରଧାନମନ୍ତ୍ରୀ ମୋଦୀଙ୍କୁ ବିଦେଶରୁ ୨୨ ଅନ୍ତର୍ଜାତୀୟ ସମ୍ମାନ ମିଳିଛି । 

ଏହି ମେଡାଲରେ ଥିବା ଧର୍ମ ଚକ୍ର ବୌଦ୍ଧ ଧର୍ମର ଇତିହାସକୁ ଇଙ୍ଗିତ କରୁଛି । ଭାରତ ଓ ଶ୍ରୀଲଙ୍କା ମଧ୍ୟରେ ଅନେକ ଦଶନ୍ଧି ଧରି ପୁରାତନ ସାଂସ୍କୃତିକ ସମ୍ବନ୍ଧ ରହିଛି । ଏହି ସମ୍ମାନ ଏଥିପାଇଁ ଗୁରୁତ୍ୱ ବହନ କରୁଛି କାରଣ ଗତ କିଛି ବର୍ଷ ହେବ ଶ୍ରୀଲଙ୍କା ଚୀନ ଆଡେ ଢଳିଥିବା ଦେଖିବାକୁ ମିଳିଛି ।

ଶ୍ରୀଲଙ୍କାରେ ନିଜର ସ୍ଥିତି ମଜଭୁତ କରିବା ପାଇଁ ଚୀନ ଅନେକ ବର୍ଷରୁ ଉଦ୍ୟମ ଚଳାଇ ଆସିଛି । ଅନ୍ୟପଟେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଶ୍ରୀଲଙ୍କା ଗସ୍ତ ଓ ପୁଣି ତାଙ୍କୁ ସମ୍ମାନିତ କରାଯିବା ଏହାର ସଙ୍କେତ ଦେଉଛି ଯେ, ଶ୍ରୀଲଙ୍କା ନିଜର ପୁରୁଣା ନୀତିରେ ଭାରତକୁ ଅଧିକ ଗୁରୁତ୍ୱ ଦେବାକୁ ଚାହୁଁଛି । ଏହିପରି ଶ୍ରୀଲଙ୍କା ଚୀନକୁ ବଡ ସନ୍ଦେଶ ଦେବାକୁ ଚେଷ୍ଟା କରିଛି । 

ଶ୍ରୀଲଙ୍କାର ରାଷ୍ଟ୍ରପତି ଅନୁରା କୁମାର ଦିସାନାୟକେ ପ୍ରଧାନମନ୍ତ୍ରୀଙ୍କୁ ଏହି ପୁରସ୍କାରରେ ସମ୍ମାନିତ କରିଛନ୍ତି । ଏହି ଅବଏସରେ ପ୍ରଧାନମନ୍ତ୍ରୀ କହିଛନ୍ତି, ଏହି ପୁରସ୍କାର ମୋର ନୁହେଁ ବରଂ ୧୪୦ କୋଟି ଭାରତୀୟଙ୍କର । ଏହା ଶ୍ରୀଲଙ୍କା ଓ ଭାରତ ମଧ୍ୟରେ ନିବିଡ ଓ ଐତିହାସିକ ସମ୍ବନ୍ଧକୁ ଦର୍ଶାଉଛି । ଦିସାନାୟକେ କହିଛନ୍ତି, ଭାରତ ଓ ଶ୍ରୀଲଙ୍କା ସମ୍ବନ୍ଧ ସର୍ବଦା ନିବିଡ ରହି ଆସିଛି । ଆମ ମଧ୍ୟରେ ଧାର୍ମିକ ଓ ସାଂସ୍କୃତିକ ସମ୍ବନ୍ଧ ରହିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ସମ୍ମାନର ହକଦାର ।