ମାଲକାନଗିରି: ସୁରକ୍ଷାବାହିନୀଙ୍କ ଘନ ଘନ ଏନକାଉଣ୍ଟର ପରେ ଏବେ ଥର ହର ଲାଲବାହିନୀ । ଶନିବାର ୮୪ ଜଣ ମାଓବାଦୀ ଆଜି ତେଲେଙ୍ଗାନା ପୋଲିସ ନିକଟରେ ଆତ୍ମସମର୍ପଣ କରିଛନ୍ତି । ଭଦ୍ରାଦ୍ରୀ କୋଥାଗୁଡେମ୍ ଜିଲ୍ଲା ପୋଲିସ ନିକଟରେ ସମସ୍ତେ ଆତ୍ମସମର୍ପଣ କରିଛନ୍ତି । ସେମାନଙ୍କ ମଧ୍ୟରେ ୨୦ ଜଣ ମହିଳା ମାଓବାଦୀ ରହିଛନ୍ତି । ସମସ୍ତେ ଛତିଶଗଡ଼ର ବିଜାପୁର ଏବଂ ସୁକମା ଜିଲ୍ଲାର ବୋଲି ଜଣାପଡ଼ିଛି । ଏ ନେଇ ସୂଚନା ଦେଇଛନ୍ତି ଆଇଜିପି ଚନ୍ଦ୍ରଶେଖର ରେଡ୍ଡୀ । 

ଆଇଜିପି ଚନ୍ଦ୍ରଶେଖର ରେଡ୍ଡୀଙ୍କ ନିକଟରେ ୮୪ ଜଣ ମାଓବାଦୀ ଏକକାଳୀନ ଆତ୍ମସମର୍ପଣ କରିଛନ୍ତି । ସେମାନଙ୍କ ମଧ୍ୟରେ ୪ ଜଣ ଏରିଆ କମିଟି ସଦସ୍ୟ, ୫ ଜଣ ପାର୍ଟି ମେମ୍ବର, ୮ ଜଣ ଆରପିସି (ରିଭୋଲୁସନାରୀ ପିପୁଲ୍ସ କମିଟି), ୨୭ ଜଣ ଆରପିସି ମିଲିସିଆ, ୨୦ ଜଣ ଆରପିସି ଦଣ୍ଡକାରଣ୍ୟ ଆଦିବାସୀ ମଜଦୁର କିଶାନ ସଂଘ ଓ କେଏମ୍ଏସ୍ ସଦସ୍ୟ, ୧୩ ଜଣ ଚୈତନ୍ୟ ନାଟ୍ୟ ମଣ୍ଡପ ମଣ୍ଡଳୀ ଏବଂ ୯ ଜଣ ଗ୍ରାମ ରକ୍ଷକ ଦଳ ସଦସ୍ୟ ଅଟନ୍ତି । ଏହି ମାଓବାଦୀମାନେ ଦୀର୍ଘ ଦିନରୁ ଛତିଶଗଡ ବିଜାପୁର, ସୁକମା ଓ ଦାନ୍ତେୱାଡାରେ ମାଓ କାର୍ଯ୍ୟକଳାପରେ ସକ୍ରିୟ ଥିଲେ । ତେଲେଙ୍ଗାନା ସରକାରଙ୍କ ଦ୍ୱାରା ଆରମ୍ଭ ହୋଇଥିବା ନକ୍ସଲ ବିରୋଧୀ ଅଭିଯାନ ‘ଅପରେସନ୍ ଚେୟୁଥା’ ଜାରି ରହିଥିବାବେଳେ ଏହି ସଫଳତା ମିଳିଛି । କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ବସ୍ତର ପାଣ୍ଡୁମ୍ ଗ୍ରସ୍ତ ପୂର୍ବରୁ ଧିରେ ଧିରେ ଶାନ୍ତି ମାର୍ଗକୁ ଫେରୁଛନ୍ତି ମାଓବାଦୀ । ସରକାରଙ୍କ କାର୍ଯ୍ୟାନୁଷ୍ଠାନ ଭୟରେ ମାଓବାଦୀମାନେ ଆତ୍ମସମର୍ପଣ କରୁଛନ୍ତି । 

ଏହା ପୂର୍ବରୁ ଭଦ୍ରାଦ୍ରୀ ଓ କୋଥାଗୁଡେମ୍ ଜିଲ୍ଲାରେ ବିଭିନ୍ନ କ୍ୟାଡର ୨୨୪ ମାଓବାଦୀ ଆତ୍ମସମର୍ପଣ କରି ସାରିଲେଣି ।  ସେହିପରି  ବିଜାପୁର ଜେଲରେ ୫୦ ମାଓବାଦୀ ମଧ୍ୟ ଆତ୍ମସମର୍ପଣ କରିଥିଲେ । ସେହିପରି ତିନି ଦିନ ତଳେ ଶାନ୍ତି ପ୍ରସ୍ତାବ ଦେଇଥିଲା ମାଓ ସଂଗଠନ ସିପିଆଇ (ମାଓବାଦୀ) କେନ୍ଦ୍ରୀୟ କମିଟି। ଏକ ପ୍ରେସ ବିବୃତ୍ତି ମାଧ୍ୟମରେ ଶାନ୍ତି ପ୍ରସ୍ତାବ ଦେଇଥିଲେ । ନରସଂହାରକୁ ବନ୍ଦ କରିବାକୁ କୁହାଯାଇଥିଲା । ଲଗାତାର ଏନକାଉଣ୍ଟରେ ୪୦୦ରୁ ଅଧିକ ମାଓବାଦୀ ନିହତ ହୋଇଥିବା ନେଇ ମାଓ ସଙ୍ଗଠନ ଦାବି କରିଛି । ଯଦି ସରକାର ସେମାନଙ୍କ ଦାବି ଗ୍ରହଣ କରିବେ, ତେବେ ମାଓବାଦୀମାନେ ଯୁଦ୍ଧ ବିରତି ଘୋଷଣା କରିବେ।