ନୂଆଦିଲ୍ଲୀ: ଦେଶର ରାଜଧାନୀ ଦିଲ୍ଲୀରେ ଚାଲିଥିବା ବିରୋଧ ପ୍ରଦର୍ଶନକୁ ନିୟନ୍ତ୍ରଣ କରିବା ପାଇଁ ପ୍ରଶାସନ ପକ୍ଷରୁ ନିଆଯାଇଥିବା କଡ଼ା ପଦକ୍ଷେପକୁ ନେଇ ଏବେ ଆଇନଗତ ଲଢ଼େଇ ଆରମ୍ଭ ହୋଇଯାଇଛି। ସାଧାରଣ ପରିବହନ ବ୍ୟବସ୍ଥା ଠପ୍ କରିବା ଏବଂ ଗମନାଗମନ ବାଧାପ୍ରାପ୍ତ କରିବା ଅଭିଯୋଗରେ ଦାଖଲ ହୋଇଥିବା ଆବେଦନଗୁଡ଼ିକ ଉପରେ ରବିବାର ସୁପ୍ରିମକୋର୍ଟରେ ଗୁରୁତ୍ୱପୂର୍ଣ୍ଣ ଶୁଣାଣି ହେବାକୁ ଯାଉଛି। ବିଚାରପତି ଜଷ୍ଟିସ୍ ଜୋୟମାଲ୍ୟ ବାଗ୍‌ଚୀ ଏବଂ ଜଷ୍ଟିସ୍ ଭି. ମୋହନାଙ୍କ ବେଞ୍ଚ ଏହି ଆବେଦନଗୁଡ଼ିକର ଶୁଣାଣି କରିବେ।

କୋର୍ଟଙ୍କ ନିର୍ଦ୍ଦେଶ ସତ୍ତ୍ୱେ ବନ୍ଦ ରହିଲା ମେଟ୍ରୋ ଓ ଟ୍ରେନ୍!

କକରୋଚ ଜନତା ପାର୍ଟି(CJP)ର ପ୍ରଦର୍ଶନକୁ ଆଖିଆଗରେ ରଖି ଅକ୍ଟୋବର ୧୦ ତାରିଖରେ ଦିଲ୍ଲୀ ମେଟ୍ରୋ ଏବଂ ଭାରତୀୟ ରେଳବାଇର ଯାତାୟାତ ସମ୍ପୂର୍ଣ୍ଣ ବନ୍ଦ କରାଯାଇଥିଲା। ତେବେ ଏହାପୂର୍ବରୁ ଅକ୍ଟୋବର ୯ ତାରିଖରେ ସୁପ୍ରିମକୋର୍ଟ ଏପରି ସମ୍ପୂର୍ଣ୍ଣ ବାଧା ନସୃଷ୍ଟି କରିବା ପାଇଁ ନିର୍ଦ୍ଦେଶ ଦେଇଥିଲେ। କୋର୍ଟଙ୍କ ଏହି ଆଦେଶକୁ ଅବମାନନା କରାଯାଇଥିବା ଦର୍ଶାଇ ଶନିବାର ସୁପ୍ରିମକୋର୍ଟରେ ଏକ ଅଦାଲତ ଅବମାନନା ଆବେଦନ ଦାଖଲ କରାଯାଇଛି।

କାହା କାହା ବିରୋଧରେ ଆସିଛି ଅଭିଯୋଗ?

ଓକିଲ ଶୈଳେନ୍ଦ୍ର ମଣି ତ୍ରିପାଠୀଙ୍କ ଦ୍ୱାରା ଆଇନଜୀବୀ ଚାନ୍ଦ କୁରୈଶୀଙ୍କ ମାଧ୍ୟମରେ ଦାଖଲ କରାଯାଇଥିବା ଏହି ଆବେଦନରେ ତିନିଜଣ ପ୍ରମୁଖ ଅଧିକାରୀ କେନ୍ଦ୍ରୀୟ ଗୃହ ସଚିବ ଗୋବିନ୍ଦ ମୋହନ, ଦିଲ୍ଲୀ ପୋଲିସ କମିଶନର ଅନୁରାଗ କୁମାର,  ଦିଲ୍ଲୀ ମେଟ୍ରୋ ରେଳ ନିଗମର ଚେୟାରମ୍ୟାନ୍ ଡି. ତାରାଙ୍କୁ ପକ୍ଷଭୁକ୍ତ କରାଯାଇଛି।

ଆବେଦନରେ କୁହାଯାଇଛି ଯେ, "ନାଗରିକଙ୍କ ମୌଳିକ ଅଧିକାରର ଏହିଭଳି ହନନ ଏବଂ ସର୍ବୋଚ୍ଚ ଅଦାଲତଙ୍କ ଆଦେଶକୁ ଅବହେଳା କରିବା ଦିଲ୍ଲୀ ମେଟ୍ରୋ, ପୋଲିସ ଏବଂ କେନ୍ଦ୍ର ସରକାରଙ୍କ ପକ୍ଷରୁ ସଂଗଠିତ ଏକ ସ୍ପଷ୍ଟ ପ୍ରଚେଷ୍ଟା। ଏହିଭଳି ସ୍ୱେଚ୍ଛାଚାରୀ ପଦକ୍ଷେପ ବିରୋଧରେ କଠୋର ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଆବଶ୍ୟକ।"

ଅସୁବିଧାରେ ସାଧାରଣ ଜନତା

ସୁପ୍ରିମକୋର୍ଟଙ୍କ ସ୍ପଷ୍ଟ ନିର୍ଦ୍ଦେଶ ସତ୍ତ୍ୱେ ଦିଲ୍ଲୀର ପ୍ରାୟ ୫୭ଟି ମେଟ୍ରୋ ଷ୍ଟେସନ୍ ସମ୍ପୂର୍ଣ୍ଣ ବନ୍ଦ ରଖାଯାଇଥିଲା ଏବଂ ଅନେକ ଟ୍ରେନ୍ ରଦ୍ଦ କରାଯାଇଥିଲା। ଏହାଯୋଗୁଁ ରାଜଧାନୀରେ ସାଧାରଣ ଜନଜୀବନ ଗୁରୁତର ଭାବେ ବାଧାପ୍ରାପ୍ତ ହୋଇଛି। ଏହା ବ୍ୟତୀତ ପ୍ରଦର୍ଶନ ସମୟରେ କିଛି ଆଇନଜୀବୀଙ୍କୁ ପୋଲିସ ଅଟକ ରଖିଥିବା ଅଭିଯୋଗ ହୋଇଛି, ଯାହାକୁ କାଲି ଶୁଣାଣି ସମୟରେ ଅଦାଲତଙ୍କ ଦୃଷ୍ଟିଗୋଚର କରାଯିବାର ସମ୍ଭାବନା ରହିଛି।