ନୂଆଦିଲ୍ଲୀ: ଦେଶର ରାଜଧାନୀ ଦିଲ୍ଲୀରେ ‘କାକରୋଚ ଜନତା ପାର୍ଟି’ (CJP) ର ବିରୋଧ ପ୍ରଦର୍ଶନ ଏବଂ ପ୍ରଶାସନ ପକ୍ଷରୁ କରାଯାଇଥିବା ବ୍ୟାପକ ଅଟକ ଓ ଗିରଫଦାରୀକୁ ନେଇ ଆନ୍ତର୍ଜାତୀୟ ସ୍ତରରେ ଚର୍ଚ୍ଚା ଜୋର ଧରିଛି। ଦିଲ୍ଲୀରେ ଚାଲିଥିବା ଏହି ଆନ୍ଦୋଳନ ସମୟରେ ହଜାର ହଜାର ପ୍ରଦର୍ଶନକାରୀଙ୍କୁ ହେପାଜତକୁ ନିଆଯିବା ଘଟଣାକୁ ନେଇ ଜାତିସଂଘ ମାନବିକ ଅଧିକାର କମିଶନ (UNHRC) ଗଭୀର ଉଦବେଗ ପ୍ରକାଶ କରିଛି।

ଜାତିସଂଘର କଡ଼ା ବାର୍ତ୍ତା

ଜାତିସଂଘ ମାନବିକ ଅଧିକାର କାର୍ଯ୍ୟାଳୟ ପକ୍ଷରୁ ଏକ ବିବୃତି ଜାରି କରାଯାଇ କୁହାଯାଇଛି ଯେ, ଶାନ୍ତିପୂର୍ଣ୍ଣ ପ୍ରଦର୍ଶନ ଉପରେ କଟକଣା ଲଗାଇବା ବେଳେ ଆବଶ୍ୟକତା ଏବଂ ଆନୁପାତିକ ନିୟମକୁ କଡ଼ାକଡ଼ି ଭାବେ ପାଳନ କରାଯିବା ଉଚିତ। ଆନ୍ଦୋଳନକାରୀଙ୍କ ମୌଳିକ ଅଧିକାର ଏବଂ ସ୍ୱାଧୀନତା ସୁରକ୍ଷିତ ରହିବା ଜରୁରୀ ବୋଲି ଜାତିସଂଘ ପକ୍ଷରୁ ଦର୍ଶାଯାଇଛି। ଏହା ସହିତ ଅଟକ ରଖାଯାଇଥିବା ସମସ୍ତ ବ୍ୟକ୍ତିଙ୍କୁ ତୁରନ୍ତ ଏବଂ ବିନା ସର୍ତ୍ତରେ ମୁକ୍ତ କରିବାକୁ ଦାବି କରାଯାଇଛି।

କାହିଁକି ହୋଇଥିଲା ବିରୋଧ ପ୍ରଦର୍ଶନ ?

ଭୋଟର ତାଲିକା ସଂଶୋଧନ (SIR) ଏବଂ ନିର୍ବାଚନ ପ୍ରକ୍ରିୟାରେ ଅନିୟମିତତା ଅଭିଯୋଗ ଆଣି ମୁଖ୍ୟ ନିର୍ବାଚନ ଆୟୁକ୍ତଙ୍କ ଇସ୍ତଫା ଦାବିରେ ଜନ୍ତରମନ୍ତରଠାରେ ଏହି ବିଶାଳ ପ୍ରଦର୍ଶନର ଡାକରା ଦିଆଯାଇଥିଲା। ତେବେ ପୋଲିସ ଏବଂ ପ୍ରଶାସନ ପକ୍ଷରୁ ସୁରକ୍ଷା ଓ ଶୃଙ୍ଖଳା ଦୃଷ୍ଟିରୁ ରାଜଧାନୀରେ କଡ଼ା କଟକଣା ଜାରି କରାଯାଇଥିଲା ଏବଂ ହଜାର ହଜାର ସଂଖ୍ୟାରେ ଆନ୍ଦୋଳନକାରୀଙ୍କୁ ପୋଲିସ ଅଟକ ରଖିଥିଲା।

ଶାନ୍ତପୂର୍ଣ୍ଣ ଆଲୋଚନା ଉପରେ ଗୁରୁତ୍ୱ

ଜାତିସଂଘ ସ୍ପଷ୍ଟ କରିଛି ଯେ, ଗଣତାନ୍ତ୍ରିକ ପରମ୍ପରା ଏବଂ ମାନବିକ ଅଧିକାର ବଜାୟ ରଖିବା ପାଇଁ ପ୍ରଶାସନ ଏବଂ ଆନ୍ଦୋଳନକାରୀଙ୍କ ମଧ୍ୟରେ ଅଧିକରୁ ଅଧିକ ଆଲୋଚନା  ହେବା ଆବଶ୍ୟକ। ଦେଶରେ ବଢ଼ୁଥିବା ରାଜନୈତିକ ଉତ୍ତେଜନା ମଧ୍ୟରେ ଜାତିସଂଘର ଏହି ବୟାନ ରାଜନୈତିକ ମହଲରେ ଏକ ବଡ଼ ଚର୍ଚ୍ଚାର ବିଷୟ ପାଲଟିଛି।