ନୂଆଦିଲ୍ଲୀ: ଉତ୍ତର ପ୍ରଦେଶ ସୁଲତାନପୁର ପୂର୍ବାଞ୍ଚଳ ଏକ୍ସପ୍ରେସ ୱେରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ କାରକେଡ୍ ଦୁର୍ଘଟଣାଗ୍ରସ୍ତ  ହୋଇଛି । ରାହୁଲଙ୍କ କାରକେଡ୍ ଗାଡ଼ି ପରସ୍ପର ସହିତ ଧକ୍କା ହୋଇଛି । ଏଥିରେ ରାହୁଲ ଏବଂ ତାଙ୍କ ଗାଡ଼ି ସମ୍ପୂର୍ଣ୍ଣ ସୁରକ୍ଷିତ ଥିବା ଜଣାପଡ଼ିଛି । 

ସୂଚନା ଅନୁସାରେ, ରାହୁଲ ଗାନ୍ଧୀ ଆଜି ସୁଲତାନପୁରରେ କୋର୍ଟରେ ହାଜର ହେବାକୁ ଯାଉଥିଲେ । ସେ ଲକ୍ଷ୍ନୌରୁ ସୁଲତାନପୁର ଅଭିମୁଖେ ଯାଉଥିବାବେଳେ ଏକ୍ସପ୍ରେସ ୱେର ହଲିୟାପୁର ଥାନା ଅଞ୍ଚଳରେ ତାଙ୍କ କାରକେଡ୍ ଦୁର୍ଘଟଣାର ସମ୍ମୁଖୀନ ହୋଇଥିଲା । 

ରାହୁଲ ଗାନ୍ଧୀଙ୍କ କାରକେଡ୍ ପଛରେ ଆସୁଥିବା ଚାରୋଟି କାର୍ ଏବଂ ଗୋଟିଏ ଆମ୍ବୁଲାନ୍ସ ପରସ୍ପର ସହ ଧକ୍କା ହୋଇଯାଇଛି। ଭାଗ୍ୟବଶତଃ ରାହୁଲ ଗାନ୍ଧୀ ସମ୍ପୂର୍ଣ୍ଣ ସୁରକ୍ଷିତ ଅଛନ୍ତି । କାହାର କୌଣସି କ୍ଷତି ହୋଇ ନଥିବାବେଳେ ଦୁର୍ଘଟଣା କିପରି ଘଟିଲା ସେ ନେଇ ଯାଞ୍ଚ ଜାରି ରହିଛି । 

୨୦୧୮ ମସିହାରେ ଏକ ମାମଲାରେ ସୁଲତାନପୁରର ସ୍ୱତନ୍ତ୍ର ସାଂସଦ/ବିଧାୟକ ଅଦାଲତରେ ହାଜର ହେବାକୁ ରାହୁଲ କୋର୍ଟ ଯାଉଥିଲେ ।