ଜାତୀୟ ତଦନ୍ତ ସଂସ୍ଥା (NIA) ସମସ୍ତ ପର୍ଯ୍ୟଟକ, ଏବଂ ସ୍ଥାନୀୟ ଲୋକଙ୍କୁ ଜମ୍ମୁ ଏବଂ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ସମ୍ପର୍କିତ ସୂଚନା ପ୍ରଦାନ କରିବାକୁ ନିବେଦନ କରିଛି। ଆକ୍ରମଣ ସମ୍ପର୍କିତ କୌଣସି ସୂଚନା, ଫଟୋଗ୍ରାଫ୍ କିମ୍ବା ଭିଡିଓ ଥିଲେ ତୁରନ୍ତ ଏଜେନ୍ସି ସହିତ ଯୋଗାଯୋଗ କରିବାକୁ NIA ସମସ୍ତଙ୍କୁ ଅପିଲ୍ କରିଛି।

ଆତଙ୍କବାଦୀ ଆକ୍ରମଣର ତଦନ୍ତ ଆନୁଷ୍ଠାନିକ ଭାବରେ ପରିଚାଳନା କରୁଥିବା NIA, ଆକ୍ରମଣକାରୀ ଏବଂ ସେମାନଙ୍କ କାର୍ଯ୍ୟପ୍ରଣାଳୀ ବିଷୟରେ ଯେକୌଣସି ସମ୍ଭାବ୍ୟ ସୁରାକ ଖୋଜିବା ପାଇଁ ଘଟଣାର ଏକ ପୁଙ୍ଖାନୁପୁଙ୍ଖ ତଦନ୍ତ କରୁଛି। ଏନଆଇଏର ଅଧିକାରୀମାନେ କହିଛନ୍ତି ଯେ  ପର୍ଯ୍ୟଟକ ଏବଂ ଅନ୍ୟମାନେ ହୁଏତ ଅଜାଣତରେ କିଛି ପ୍ରାସଙ୍ଗିକ ବିବରଣୀ ଦେଖିଥିବେ, ଶୁଣିଥିବେ, ଯାହା କାଶ୍ମୀରରେ  ପର୍ଯ୍ୟଟକଙ୍କ ଉପରେ ହୋଇଥିବା ଅଭୂତପୂର୍ବ ଆକ୍ରମଣ ପଛର ଷଡ଼ଯନ୍ତ୍ରର ପର୍ଦ୍ଦାଫାସ କରିବାରେ NIAକୁ ସାହାଯ୍ୟ କରିପାରିବ।

ଏନଆଇଏ ଏପରି ସମସ୍ତ ଲୋକଙ୍କୁ ଏଜେନ୍ସିକୁ ଫୋନ୍ କରି ସୂଚନା ଦେବାକୁ ଅନୁରୋଧ କରିଛି। ବିବୃତ୍ତିରେ କୁହାଯାଇଛି ଯେ ଏହା ପରେ ଜଣେ ବରିଷ୍ଠ NIA ଅଧିକାରୀ କଲରଙ୍କ ସହିତ ଯୋଗାଯୋଗ କରିବେ ଏବଂ ଏଜେନ୍ସି ସହିତ ପ୍ରାସଙ୍ଗିକ ସୂଚନା/ଫଟୋ/ଭିଡିଓ ଇତ୍ୟାଦି ସେୟାର କରିବାର ବ୍ୟବସ୍ଥା କରିବେ। ୨୨ ଏପ୍ରିଲ୍ ୨୦୨୫ରେ ଜମ୍ମୁ ଏବଂ କାଶ୍ମୀରର ପହଲଗାମର ବୈସାରଣରେ ହୋଇଥିବା ଆତଙ୍କବାଦୀ ଆକ୍ରମଣ ପରେ, ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମରେ ଅନେକ ଫଟୋ ଏବଂ ଭିଡିଓ ଘୁରି ବୁଲୁଥିବା ଦେଖିବାକୁ ମିଳିଛି। ଏହି ଆକ୍ରମଣରେ ୨୬ ଜଣ ପର୍ଯ୍ୟଟକଙ୍କ ମୃତ୍ୟୁ ହୋଇଥିଲା ଏବଂ ଅନେକ ଆହତ ହୋଇଥିଲେ। ବିବୃତ୍ତିରେ କୁହାଯାଇଛି ଯେ ଆକ୍ରମଣ ସ୍ଥଳର ତଦନ୍ତ କରିବା ପାଇଁ NIAର ଅନେକ ଦଳ ପହଲଗାମରେ କ୍ୟାମ୍ପ କରୁଛନ୍ତି ଏବଂ ଏହି ଜଘନ୍ୟ ଅପରାଧର ସାକ୍ଷୀମାନଙ୍କୁ ମଧ୍ୟ ପଚରାଉଚରା କରୁଛନ୍ତି।

ଅଧିକ ପଢନ୍ତୁ: ଅପରେସନ ସିନ୍ଦୂର: ପାକିସ୍ତାନ ଏୟାର ଡିଫେନସ୍ ରାର୍ଡାର ଧ୍ୱଂସ, ଭାରତର ୧୫ଟି ସହରରେ ପାକିସ୍ତାନ ମିଜାଇଲ୍ ଆକ୍ରମଣ ଭଣ୍ଡୁର