ନୂଆଦିଲ୍ଲୀ: ସୀମାରେ ପଡ଼ୋଶୀ ରାଷ୍ଟ୍ର ଚୀନ ଉପରେ ନଜର ରଖିବାକୁ ଭାରତୀୟ ସେନା ୧୭,୫୦୦ ଫୁଟରେ ଉପରେ ନିୟୋଜିତ କରିବ ଡ୍ରୋନ୍ । ଯାହା ହାଡ଼ ଭଙ୍ଗା ଶୀତରେ ବରଫ ଉପରେ ମଧ୍ୟ କାମ କରିବ । ଭାରତ ୨୨୫ଟି 'ଫାଷ୍ଟ-ପର୍ସନ୍ ଭ୍ୟୁ' (FPV) ଡ୍ରୋନ୍ ପାଇଁ ଅର୍ଡର ଦେଇଛି । ଏହି ଡ୍ରୋନ୍ ପାଇଁ ଅର୍ଡର 'ଏରୋଡ୍ରୋନ୍ ରୋବୋଟିକ୍ସ ପ୍ରାଇଭେଟ୍ ଲିମିଟେଡ୍'କୁ ପ୍ରଦାନ କରାଯାଇଛି। ଏହି କମ୍ପାନୀ ସାମରିକ ଡ୍ରୋନ୍, ସର୍ଭିଲାନ୍ସ ସିଷ୍ଟମ୍ ଏବଂ ଲଜିଷ୍ଟିକ୍ସ ପ୍ଲାଟଫର୍ମ ନିର୍ମାଣ କରିବା ସହିତ ଅପରେଟରମାନଙ୍କୁ ତାଲିମ ମଧ୍ୟ ପ୍ରଦାନ କରିଥାଏ। କମ୍ପାନୀର ସଫ୍ଟୱେର୍ ନିଜସ୍ୱ ସ୍ତରରେ ବିକଶିତ କରାଯାଇଛି, ଯାହା 'ଆତ୍ମନିର୍ଭର ଭାରତ' ଦିଗରେ ଆଉ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଅଟେ ।

କଠିନ ମୂଲ୍ୟାଙ୍କନ ଏବଂ କଠୋର ପରୀକ୍ଷଣ ପରେ ଏହି ନିଷ୍ପତ୍ତି ନିଆଯାଇଛି । ସଂଖ୍ୟା ଦୃଷ୍ଟିରୁ ଏହି ଅର୍ଡର ବଡ଼ ନ ହୋଇପାରେ, କିନ୍ତୁ ଯେଉଁ କଠିନ ପରିସ୍ଥିତି ଓ ଉଚ୍ଚତାରେ ଏହି ଡ୍ରୋନ୍‌ଗୁଡ଼ିକର ପରୀକ୍ଷଣ ଓ ଚୟନ କରାଯାଇଛି । ଉଚ୍ଚ ପାର୍ବତ୍ୟ ଅଞ୍ଚଳରେ ଏହି ଡ୍ରୋନ୍‌ଗୁଡ଼ିକର ସହନଶୀଳତା, ସଠିକତା, ଗତି ଏବଂ କାର୍ଯ୍ୟକ୍ଷମତା ଆଧାରରେ ସେଗୁଡ଼ିକର ମୂଲ୍ୟାଙ୍କନ କରାଯାଇଥିଲା।

ଭାରତୀ-ଚୀନ ସୀମା ଲାଇନ୍ ଅଫ୍ ଆକ୍ଟୁଆଲ୍ କଣ୍ଟ୍ରୋଲ୍ (LAC) ଏବଂ ପାକିସ୍ତାନ ସହିତ ଲାଇନ୍ ଅଫ୍ କଣ୍ଟ୍ରୋଲ୍ ରେ ୧୨ ହଜାରରୁ ୧୮ ହଜାର ଫୁଟରୁ ଅଧିକ ଉଚ୍ଚତାରେ ଭାରତୀୟ ସେନା ନିୟୋଜିତ ହୋଇଛନ୍ତି। ହିମାଳୟ ଏବଂ ସିଆଚେନ୍ ଗ୍ଲେସିୟର୍ ଭଳି ଅଞ୍ଚଳରେ, ପ୍ରବଳ ଶୀତ ଏବଂ ଅମ୍ଳଜାନର ସ୍ୱଳ୍ପ ମାତ୍ରା କେବଳ ମଣିଷର କାର୍ଯ୍ୟକ୍ଷମତାକୁ ପ୍ରଭାବିତ କରେ ନାହିଁ ବରଂ ପାରମ୍ପାରିକ ଉପକରଣଗୁଡ଼ିକର ସଠିକ୍ କାର୍ଯ୍ୟକାରିତାରେ ମଧ୍ୟ ବାଧା ସୃଷ୍ଟି କରେ। ବର୍ତ୍ତମାନ, ଏହି ଦୁର୍ଗମ ସ୍ଥାନଗୁଡ଼ିକରେ ସାମଗ୍ରୀ ପହଞ୍ଚାଇବା ପାଇଁ ପଦାତିକ ସୈନ୍ୟ, ଖଚର କିମ୍ବା ପୁରୁଣା 'ଚିତା' ହେଲିକପ୍ଟର ଭଳି ପାରମ୍ପାରିକ ପଦ୍ଧତି ଉପରେ ନିର୍ଭର କରାଯାଉଛି । 

ତଥାପି, ହେଲିକପ୍ଟର ମାଧ୍ୟମରେ ସାମଗ୍ରୀ ପହଞ୍ଚାଇବା ପ୍ରକ୍ରିୟା ବ୍ୟୟବହୁଳ, ଧୀର ଏବଂ ପାଣିପାଗ ଉପରେ ନିର୍ଭରଶୀଳ ଅଟେ । ଏହି ପରିପ୍ରେକ୍ଷୀରେ, ଡ୍ରୋନ୍ ଏକ ଦ୍ରୁତ, ସୁଲଭ ଏବଂ ସୁରକ୍ଷିତ ବିକଳ୍ପ ଭାବରେ ଉଭା ହୋଇଛି। 

ଅନ୍ୟପକ୍ଷରେ, ଏଥିରେ କିଛି ଗୁରୁତ୍ୱପୂର୍ଣ୍ଣ ଆହ୍ୱାନ ମଧ୍ୟ ରହିଛି। ସମୁଦ୍ର ପତ୍ତନ ଠାରୁ ପ୍ରାୟ ୧୫,୦୦୦ ଫୁଟ୍ ଉଚ୍ଚତାରେ ବାୟୁର ଘନତ୍ୱର ପ୍ରାୟ ୪୦ ରୁ ୫୦ ପ୍ରତିଶତ ହ୍ରାସ ପାଇଥାଏ। ଫଳସ୍ୱରୂପ, ଡ୍ରୋନ୍‌ର ରୋଟର୍‌ଗୁଡ଼ିକୁ ପର୍ଯ୍ୟାପ୍ତ ପରିମାଣର 'ଲିଫ୍ଟ' (ଉପରକୁ ଉଠିବା ଶକ୍ତି) ଏବଂ 'ଥ୍ରଷ୍ଟ' (ଆଗକୁ ବଢ଼ିବା ଶକ୍ତି) ସୃଷ୍ଟି କରିବା ପାଇଁ ଆବଶ୍ୟକ ବାୟୁ ମିଳି ନ ପାରେ । ସେହିପରି ପତଳା ବାୟୁ ମୋଟରଗୁଡ଼ିକୁ ପ୍ରଭାବଶାଳୀ ଭାବରେ ଥଣ୍ଡା କରିପାରେ ନାହିଁ । ଅଧିକ ଭାର ଯୋଗୁଁ ମୋଟରଗୁଡ଼ିକ ଦ୍ରୁତ ଗତିରେ ଅତ୍ୟଧିକ ଗରମ ହୋଇଯାଇପାରେ ଏବଂ ଜଳିଯାଇପାରେ।

ଏହା ବ୍ୟତୀତ, ଅତ୍ୟଧିକ ଶୀତ ସମୟରେ ଲିଥିୟମ୍-ଆଧାରିତ ବ୍ୟାଟେରୀଗୁଡ଼ିକର କାର୍ଯ୍ୟକ୍ଷମତା ହ୍ରାସ ପାଇଥାଏ। ସମୁଦ୍ର ପତ୍ତନରେ ଯେଉଁ ବ୍ୟାଟେରୀ ଛଅ ମିନିଟ୍ ପର୍ଯ୍ୟନ୍ତ ଉଡ଼ାଣ ସମୟ ଯୋଗାଇଥାଏ, ତାହା ଅଧିକ ଉଚ୍ଚତା ବିଶିଷ୍ଟ ସ୍ଥାନରେ ମାତ୍ର ଦୁଇରୁ ତିନି ମିନିଟ୍ ପର୍ଯ୍ୟନ୍ତ ଚାଲିଥାଏ। ଫଳସ୍ୱରୂପ, ଉଡ଼ାଣ ଆରମ୍ଭ କରିବା ପୂର୍ବରୁ ବ୍ୟାଟେରୀଗୁଡ଼ିକୁ ଗରମ କରିବା ଏବଂ ଆକାଶରେ ଥିବା ସମୟରେ ସେଗୁଡ଼ିକୁ ତାପମାତ୍ରା ସ୍ଥିରତା ବଜାୟ ରଖିବା ଅତ୍ୟନ୍ତ ଆବଶ୍ୟକ ।