ନୂଆଦିଲ୍ଲୀ: ବ୍ୟବସାୟୀ ଓ କରଦାତାଙ୍କ ପାଇଁ ଏକ ବଡ଼ ଖବର ସାମ୍ନାକୁ ଆସିଛି। କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ଅନୁଷ୍ଠିତ ଜିଏସ୍‌ଟି କାଉନସିଲ୍‌  ବୈଠକରେ କେତେକ ଐତିହାସିକ ନିଷ୍ପତ୍ତି ନିଆଯାଇଛି। ଦେଶରେ ବ୍ୟବସାୟିକ କାର୍ଯ୍ୟକଳାପକୁ ଅଧିକ ସହଜ କରିବା, ଟ୍ୟାକ୍ସ ବ୍ୟବସ୍ଥାକୁ ଅଧିକ ସ୍ୱଚ୍ଛ କରିବା ଏବଂ କରଦାତାଙ୍କୁ ଆଇନଗତ ଆଶ୍ୱସ୍ତି ଦେବା ଲକ୍ଷ୍ୟରେ କାଉନସିଲ୍‌ ନିୟମାବଳୀରେ ବ୍ୟାପକ ସଂଶୋଧନ କରିଛି।

ଏହି ବୈଠକର ସବୁଠାରୁ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ହେଉଛି ଜିଏସ୍‌ଟି ଅଧିକାରୀଙ୍କ ଗିରଫ କରିବା କ୍ଷମତାକୁ କୋହଳ କରିବା। ଧାରା ୬୯ ଅଧୀନରେ ଥିବା କଠୋର ଆଇନଗତ କାର୍ଯ୍ୟାନୁଷ୍ଠାନକୁ ହଟାଯାଇଥିବା ବେଳେ ଅପରାଧିକ ମାମଲା ରୁଜୁ କରିବାର ସୀମାକୁ ୧ କୋଟି ଟଙ୍କାରୁ ବୃଦ୍ଧି କରାଯାଇ ୫ କୋଟି ଟଙ୍କା କରାଯାଇଛି। ଏହାର ଅର୍ଥ ହେଉଛି, ୫ କୋଟି ଟଙ୍କାରୁ କମ୍‌ ମୂଲ୍ୟର ଟ୍ୟାକ୍ସ ବିବାଦ କ୍ଷେତ୍ରରେ ବ୍ୟବସାୟୀଙ୍କ ବିରୋଧରେ କୋର୍ଟ କାର୍ଯ୍ୟାନୁଷ୍ଠାନ କିମ୍ବା ଗିରଫଦାରୀ ହୋଇପାରିବ ନାହିଁ।

ଏଥିସହିତ, ବ୍ୟବସାୟୀଙ୍କ ନଗଦ ଅର୍ଥ ସମସ୍ୟାକୁ ଦୂର କରିବା ପାଇଁ GST ରିଫଣ୍ଡ୍‌ ପ୍ରକ୍ରିୟାକୁ ଦ୍ରୁତଗାମୀ କରାଯାଇଛି। ରିଫଣ୍ଡ୍ ଆବେଦନ ଗ୍ରହଣ କରିବାର ସମୟସୀମାକୁ ୧୫ ଦିନରୁ କମାଇ ୧୦ ଦିନ କରାଯାଇଥିବା ବେଳେ ୧୦ ଦିନ ମଧ୍ୟରେ କୌଣସି ଆପତ୍ତି ନଆସିଲେ ତାହା ସ୍ୱତଃ ଗୃହୀତ ହେବ। ଏହା ସହିତ ସିଷ୍ଟମ୍‌ ଦ୍ୱାରା ଅଟୋମେଟିକ୍‌ ଭାବେ ୯୦ ପ୍ରତିଶତ ରିଫଣ୍ଡ୍‌ ମାତ୍ର ୩ ଦିନ ମଧ୍ୟରେ ଜମା ହୋଇଯିବ।

କାଉନସିଲ୍‌ ଇନ୍‌ପୁଟ୍ ଟ୍ୟାକ୍ସ କ୍ରେଡିଟ୍‌ (ITC) ନିୟମକୁ ମଧ୍ୟ ଅଧିକ ସରଳ ଓ କରଦାତା-ଅନୁକୂଳ କରିଛି। ଏବେ କମ୍ପାନୀଗୁଡ଼ିକ ନିଜ କର୍ମଚାରୀଙ୍କ ପାଇଁ କିଣୁଥିବା ସ୍ୱାସ୍ଥ୍ୟ ଓ ଜୀବନ ବୀମା, ଟେଲିକମ୍ ଟାୱାର ଏବଂ ପାଇପଲାଇନ୍‌ ଉପରେ ଜିଏସ୍‌ଟି କ୍ରେଡିଟ୍‌ ସୁବିଧା ପାଇପାରିବେ। ଏହାଛଡ଼ା, କୌଣସି ବିକ୍ରେତା ଟ୍ୟାକ୍ସ ଦାଖଲ ନକଲେ ସଠିକ୍‌ ବିଲ୍‌ ରଖିଥିବା ଅସଲି କ୍ରେତାଙ୍କ ITC ଯେପରି ବାତିଲ ନହୁଏ, ସେଥିପାଇଁ ଏକ ସ୍ୱତନ୍ତ୍ର କମିଟି ଗଠନ କରାଯାଇଛି।

MSME ଓ କ୍ଷୁଦ୍ର ବ୍ୟବସାୟୀଙ୍କ ପାଇଁ ମଧ୍ୟ ଅନେକ ସୁବିଧା ଘୋଷଣା କରାଯାଇଛି। ୫ କୋଟି ଟଙ୍କା ପର୍ଯ୍ୟନ୍ତ କାରୋବାର କରୁଥିବା ବ୍ୟବସାୟୀଙ୍କ ପାଇଁ ଏକ ଐଚ୍ଛିକ ବାର୍ଷିକ ରିଟର୍ଣ୍ଣ ସ୍କିମ୍‌ ଅଣାଯିବ, ଯେଉଁଥିରେ ସେମାନେ ବର୍ଷକୁ ଥରେ ମାତ୍ର ରିଟର୍ଣ୍ଣ ଦାଖଲ କରିବେ। ଏଥିସହ ୧୦,୦୦୦ ଟଙ୍କାରୁ କମ୍‌ ମୂଲ୍ୟର ବିବାଦ ପାଇଁ କୌଣସି କାରଣ ଦର୍ଶାଅ ନୋଟିସ୍‌ ਜାରି କରାଯିବ ନାହିଁ ଏବଂ ସାଧାରଣ ଜରିମାନା ରାଶିକୁ ୨୫,୦୦୦ ଟଙ୍କାରୁ କମାଇ ୧୦,୦୦୦ ଟଙ୍କା କରାଯାଇଛି।