ଶନିବାର ଗୁଜରାଟର ପଞ୍ଚମହଲ ଜିଲ୍ଲାର ପାୱାଗଡ଼ ଶକ୍ତି ପୀଠରେ ଏକ ବଡ଼ ଦୁର୍ଘଟଣା ଘଟିଛି। ଏଠାରେ କାର୍ଗୋ ରୋପୱେର ତାର ହଠାତ୍ ଛିଣ୍ଡିଯିବାରୁ ୬ ଜଣଙ୍କର ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ଦୁଇଜଣ ଲିଫ୍ଟମ୍ୟାନ୍, ଦୁଇଜଣ ଶ୍ରମିକ ଏବଂ ଅନ୍ୟ ଦୁଇଜଣ ଥିବା କୁହାଯାଉଛି। ଦୁର୍ଘଟଣାଟି ଅପରାହ୍ନ ପ୍ରାୟ ୩:୩୦ ସମୟରେ ଘଟିଥିଲା। 

ଘଟଣା ସମ୍ପର୍କରେ ଖବର ପାଇବା ମାତ୍ରେ ସ୍ଥାନୀୟ ପୋଲିସ ଏବଂ ଅଗ୍ନିଶମ ବାହିନୀ ଦଳ ଘଟଣାସ୍ଥଳରେ ପହଞ୍ଚିଥିଲେ। ତୁରନ୍ତ ରିଲିଫ୍ ଏବଂ ଉଦ୍ଧାର କାର୍ଯ୍ୟ ଆରମ୍ଭ କରାଯାଇଥିଲା। ଦୁର୍ଘଟଣା ପରେ ସମଗ୍ର ଅଞ୍ଚଳରେ ଏକ ଚାପା ଉତ୍ତେଜନାର ପରିବେଶ ସୃଷ୍ଟି ହୋଇଛି। ବର୍ତ୍ତମାନ ପ୍ରଶାସନିକ ଦଳ ଘଟଣାସ୍ଥଳରେ ଉପସ୍ଥିତ ଅଛନ୍ତି ଏବଂ ଦୁର୍ଘଟଣାର କାରଣ ଖୋଜିବା ଆରମ୍ଭ କରାଯାଇଛି। 

ସୂଚନା ଅନୁଯାୟୀ,ରୋପୱେର ତାର ଛିଣ୍ଡିଯିବାରୁ ଟ୍ରଲିଟି ଉଚ୍ଚତାରୁ ତଳେ ପଡ଼ିଯାଇଥିଲା। ଦୁର୍ଘଟଣାରେ ଅନେକ ଲୋକ ଆହତ ହୋଇଥିବା ରିପୋର୍ଟ ରହିଛି। ମୃତକଙ୍କ ମଧ୍ୟରେ ୨ ଜଣ ଲିଫ୍ଟ ଅପରେଟର, ୨ ଜଣ ଶ୍ରମିକ ଏବଂ ଅନ୍ୟ ଦୁଇଜଣ ଅଛନ୍ତି। ମୃତଦେହଗୁଡ଼ିକୁ ପୋଷ୍ଟମର୍ଟମ ପାଇଁ ହସ୍ପିଟାଲକୁ ପଠାଯାଇଛି।

ପାୱାଗଡ଼ରେ ଅଛି ଦୁଇଟି ଭିନ୍ନ ରୋପୱେ

ପାୱାଗଡ଼ର ମହାକାଳୀ ମନ୍ଦିରକୁ ଯିବା ପାଇଁ ଦୁଇଟି ପୃଥକ ରୋପୱେ ଅଛି। ଗୋଟିଏ ରୋପୱେ ଭକ୍ତମାନଙ୍କୁ ନେବା ଆଣିବା ପାଇଁ, ଅନ୍ୟଟି କେବଳ ସାମଗ୍ରୀ ଏବଂ ନିର୍ମାଣ ସାମଗ୍ରୀ ବୋହିବା ପାଇଁ ଡିଜାଇନ୍ କରାଯାଇଛି। ପାୱାଗଡ଼ ପାହାଡ଼ ପ୍ରାୟ ୮୦୦ ମିଟର ଉଚ୍ଚତାରେ ଅବସ୍ଥିତ। ଭକ୍ତମାନେ ୨୦୦୦ ସିଡ଼ି ଚଢ଼ି କିମ୍ବା ରୋପୱେ ଦ୍ୱାରା ମନ୍ଦିରକୁ ଯାଆନ୍ତି। କିନ୍ତୁ, ଖରାପ ପାଗ ଯୋଗୁଁ ଶନିବାର ସକାଳ ଠାରୁ ଯାତ୍ରୀମାନଙ୍କ ପାଇଁ ରୋପୱେ ସେବା ବନ୍ଦ ଥିଲା। ମାଲ ପରିବହନ ପାଇଁ ବ୍ୟବହୃତ କାରଗୋ ରୋପୱେରେ ଆଜି ଦୁର୍ଘଟଣା ଘଟିଛି। 

ଅଧିକ ପଢନ୍ତୁ: ଲାଲକିଲ୍ଲାରୁ ଚୋରୀ; ପୂଜାରୀ ବେଶରେ ଆସି ଲୁଟିନେଲେ ୧ କୋଟି ଟଙ୍କାର ସୁନା କଳସ; ସିସିଟିଭିରେ କଏଦ ଚୋରୀର ଦୃଶ୍ୟ, ସୁରକ୍ଷାକୁ ନେଇ ଉଠିଲା ପ୍ରଶ୍ନ