ନୂଆଦିଲ୍ଲୀ: ଦୁଇ ଥର ଓଲିମ୍ପିକ ପଦକ ବିଜେତା ରେସଲର ସୁଶୀଲ କୁମାର ଏକ ହାଇପ୍ରୋଫାଇଲ ହତ୍ୟା ମାମଲାରେ ଗତ ଅନେକ ମାସ ଧରି ବିଚାର ବିଭାଗୀୟ ହାଜତରେ ଥିଲେ । ନିକଟରେ ତାଙ୍କୁ କୋର୍ଟରୁ ଜାମିନ ମିଳିଥିଲା । ଏହା ପରେ ସେ ଆନୁଷ୍ଠାନିକ ଭାବେ ଉତ୍ତର ରେଲେଓରେ ନିଜର ଡ୍ୟୁଟିକୁ ଫେରିଛନ୍ତି । 

ରେଲେଓର ସୂତ୍ର ଅନୁଯାୟୀ, ବର୍ତ୍ତମାନ ଉତ୍ତର ରେଲେଓରେ ସିନିୟର କମର୍ସିଆଲ ମ୍ୟାନେଜର ପଦରେ ନିଯୁକ୍ତ ସୁଶୀଲ କୁମାର ସାଦା ପୋଷାକରେ ନିଜର ଡ୍ୟୁଟିରେ ଯୋଗ ଦେଇଛନ୍ତି । ପଦରେ ତାଙ୍କର ପୁନଃ ନିଯୁକ୍ତି ସର୍ଭିସ ପ୍ରକ୍ରିୟାର ନିୟମ ଅନୁସାରେ ହୋଇଛି । 

ସୂଚନାଯୋଗ୍ୟ, ସୁଶୀଲ କୁମାର ସାଥୀ ପହଲବାନ ସାଗର ଧନଖଡଙ୍କ ହତ୍ୟା ମାମଲାରେ ୨୦୨୧ରୁ ବିଚାର ବିଭାଗୀୟ ହାଜତରେ ଥିଲେ । ଦିଲ୍ଲୀ ହାଇକୋର୍ଟ ନିକଟରେ ମୋଦଦ୍ଦମା ପ୍ରକ୍ରିୟାରେ ବିଳମ୍ବର ଆଧାର ଦର୍ଶାଇ ସୁଶୀଲ କୁମାରଙ୍କୁ ଜାମିନ ପ୍ରଦାନ କରିଥିଲେ । ତଥାପି ସୁଶୀଲ କୁମାରଙ୍କ ଆଇନଗତ ଲଢେଇ ସରି ନାହିଁ । ଏଥିରେ ଆଗକୁ ଯାଞ୍ଚ ଜାରି ରହିବ । 

ସୁଶୀଲ କୁମାରଙ୍କୁ ଜାମିନ ମିଳିବା ନେଇ ଲୋକଙ୍କ ମିଶ୍ରିତ ପ୍ରତିକ୍ରିୟା ପ୍ରକାଶ ପାଇଛି । ହତ୍ୟା ମାମଲାରେ ଏହି ରେସଲରଙ୍କୁ ଜାମିନ ମିଳିବା ନେଇ କିଛି ଲୋକ ଏହାର ସମାଲୋଚନା କରିଛନ୍ତି । ଆଉ କିଛି ତର୍କ ଦେଉଛନ୍ତି ଯେ, ଦୋଷୀ ସାବ୍ୟସ୍ତ ନ ହେବା ପର୍ଯ୍ୟନ୍ତ ସେ ନିର୍ଦ୍ଦୋଷ ଏବଂ ନିଜର ପେଶାଦାର ଦାୟିତ୍ୱ ପୁଣି ଥରେ ସମ୍ଭାଳିବାକୁ ସେ ଯୋଗ୍ୟ । 

୪୨ ବର୍ଷୀୟ ସୁଶୀଲ କୁମାର ନିଜର ଖେଳ ଦମରେ ପୂରା ଭାରତରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ । ସେ ୨୦୧୨ ଲଣ୍ଡନ ଅଲିମ୍ପିକ୍ସରେ ରୌପ୍ୟ ପଦକ ଏବଂ ୨୦୦୮ ବେଜିଂ ଅଲିମ୍ପିକ୍ସରେ କାଂସ୍ୟ ପଦକ ଜିତିଥିଲେ । ଏହା ସହିତ ରାଜ୍ୟଗୋଷ୍ଠୀ କ୍ରୀଡାରେ ତାଙ୍କ ନାଁରେ ତିନୋଟି ସ୍ୱର୍ଣ୍ଣ ପଦକ ରହିଛି । ୨୦୧୦ ଦିଲ୍ଲୀ ରାଜ୍ୟଗୋଷ୍ଠୀ କ୍ରୀଡା, ୨୦୧୪ ଗ୍ଲାସଗୋ ରାଜ୍ୟଗୋଷ୍ଠୀ କ୍ରୀଡା ଓ ୨୦୧୮ ଗୋଲ୍ଡ କୋଷ୍ଟ ରାଜ୍ୟଗୋଷ୍ଠୀ କ୍ରୀଡାରେ ନିଜ ବର୍ଗରେ ସୁଶୀଲ କୁମାର ସ୍ୱର୍ଣ୍ଣପଦକ ଜିତିଥିଲେ । 

ଜାତୀୟସ୍ତରରେ ନିଜର ସ୍ୱତନ୍ତ୍ର ପରିଚୟ  ସୃଷ୍ଟି କରିବା ପରେ ଯେବେ ସୁଶୀଲ କୁମାରଙ୍କ ଉପରେ ହତ୍ୟାର ଅଭିଯୋଗ ଲାଗିଲା ସମସ୍ତେ ଚକିତ ହୋଇ ଯାଇଥିଲେ । ତେବେ ବର୍ତ୍ତମାନ ଏହି ରେସଲର ଜାମିନ ମିଳିବା ପରେ ନିଜର ସ୍ୱାଭାବିକ ଜୀବନ ବିତାଇବା ଉପରେ ଗୁରୁତ୍ୱ ଦେଇଛନ୍ତି । ତଥାପି ମାମଲାରେ ଅଦାଲତରେ ପ୍ରକ୍ରିୟା ଜାରି ରହିଛି । ତେଣୁ ତାଙ୍କ ଉପରେ କାର୍ଯ୍ୟାନୁଷ୍ଠାନ ବାଦଲ ଛାଇ ରହିବ ।