ଇମ୍ଫାଲ: ମଣିପୁରରେ ଗତ ବର୍ଷ ମେ’ ମାସ ୩ ତାରିଖ ଠାରୁ ଆରମ୍ଭ ହୋଇଥିବା ହିଂସାକାଣ୍ଡ ଶେଷ ହେବାର ନାମ ନେଉନାହିଁ। ଗତ ୪ ଦିନ ମଧ୍ୟରେ ରାଜ୍ୟରେ ୮ଟି ଭିନ୍ନଭିନ୍ନ ହିଂସାକାଣ୍ଡ ଘଟିଛି। ନଭେମ୍ବର ୧୧ ତାରିଖରେ ସଶସ୍ତ୍ର କୁକି ଆତଙ୍କବାଦୀମାନେ ଜିରିବାମ ଜିଲ୍ଲାର ବୋରୋବେକରା ଥାନା ଏବଂ ଏହା ନିକଟରେ ଥିବା ସିଆରପିଏଫ କ୍ୟାମ୍ପ ଉପରକୁ ଆଖିବୁଜା ଗୁଳି ଚଳାଇଥିଲେ। ଏହାର ଜବାବରେ ୧୧ ଜଣ ଆତଙ୍କବାଦୀ ନିହତ ହୋଇଛନ୍ତି। ଏନକାଉଣ୍ଟରରେ ୨ ଜଣ ସିଆରପିଏଫ୍‌ ଯବାନ ମଧ୍ୟ ଆହତ ହୋଇଥିବା ବେଳେ ସେମାନଙ୍କ ମଧ୍ୟରୁ ଜଣଙ୍କ ଅବସ୍ଥା ସଙ୍କଟାପନ୍ନ ଥିବା କୁହାଯାଉଛି।

ଏହି ସନ୍ଦିଗ୍ଧ ଆତଙ୍କବାଦୀ ନିହତ ହେବା ପରେ କୁକି-ଜୋ ପରିଷଦ ପକ୍ଷରୁ ମଙ୍ଗଳବାର ସକାଳ ୫ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ରାଜ୍ୟର ପାହାଡ଼ିଆ ଅଞ୍ଚଳରେ ସମ୍ପୂର୍ଣ୍ଣ ବନ୍ଦ ଡାକରା ଦିଆଯାଇଛି। ମଣିପୁର ପୁଲିସ ସାମାଜିକ ଗଣମାଧ୍ୟମ ଏକ୍ସରେ ଏକ ପୋଷ୍ଟରେ କହିଛି, ଆଜି, ନଭେମ୍ବର ୧୧, ୨୦୨୪ ଅପରାହ୍ନ ପ୍ରାୟ ୩ଟା ବେଳେ ସଶସ୍ତ୍ର ଆତଙ୍କବାଦୀମାନେ ଜିରିବାମ ଜିଲ୍ଲାର ଜାକୁରାଡୋର ଏବଂ ବୋରୋବେକାରା ପୋଲିସ ଷ୍ଟେସନ ନିକଟରେ ଥିବା ସିଆରପିଏଫ ପୋଷ୍ଟ ଉପରେ ଆକ୍ରମଣ କରିଥିଲେ।  ସୁରକ୍ଷାବାହିନୀ ଏହାର ଜବାବ ଦେଇଥିଲେ, ଯେଉଁଥିରେ ୧୧ ଜଣ ଆତଙ୍କବାଦୀ ନିହତ ହୋଇଥିଲେ। ଆତଙ୍କବାଦୀଙ୍କ ସହ ହୋଇଥିବା ଏହି ଏନକାଉଣ୍ଟରରେ ସିଆରପିଏଫ କନଷ୍ଟେବଳ ସଞ୍ଜୀବ କୁମାରଙ୍କୁ ଗୁଳି କରାଯାଇଥିଲା। ତାଙ୍କୁ ଆସାମର ସିଲଚର ମେଡିକାଲ କଲେଜକୁ ନିଆଯାଇ ଚିକିତ୍ସା କରାଯାଉଛି।  

"ଜିରିବାମରେ ଘଟିଥିବା ଦୁଃଖଦ ଘଟଣାରେ ଆମେ ଆମର କୁକି-ଜୋ ଗ୍ରାମର ୧୧ ଜଣ ସ୍ୱେଚ୍ଛାସେବୀଙ୍କୁ ସିଆରପିଏଫ ହାତରେ ହରାଇଥିଲୁ, ଯେଉଁମାନଙ୍କୁ ଅତି ନିର୍ମମ ଭାବେ ଗୁଳି କରି ହତ୍ୟା କରାଯାଇଥିଲା। କ୍ଷତିଗ୍ରସ୍ତଙ୍କୁ ସମ୍ମାନ ଜଣାଇବା ଏବଂ ସାମୂହିକ ଦୁଃଖ ଓ ଏକତା ପ୍ରକାଶ କରିବା ପାଇଁ କୁକି-ଜୋ ପରିଷଦ ନଭେମ୍ବର ୧୨ ତାରିଖ ସକାଳ ୫ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ସମ୍ପୂର୍ଣ୍ଣ ବନ୍ଦ ଘୋଷଣା କରିଛି। ଗାଁର ମୂଲ୍ୟବାନ ସ୍ୱେଚ୍ଛାସେବୀଙ୍କ ହତ୍ୟା କେବଳ ସେମାନଙ୍କ ପରିବାର ପାଇଁ ନୁହେଁ ବରଂ ସମଗ୍ର କୁକି-ଜୋ ସମ୍ପ୍ରଦାୟ ପାଇଁ ଏକ ଭୟଙ୍କର ଝଟକା। ଶାନ୍ତି, ନ୍ୟାୟ ଓ ନିରାପତ୍ତା ପାଇଁ ଏହି ସଂଗ୍ରାମରେ ଏକାଠି ହୋଇଥିବା କୁକି। ଆମେ ଆଜି ହୋଇଥିବା ହିଂସାକୁ ଦୃଢ଼ ନିନ୍ଦା କରୁଛୁ ଏବଂ ଦୋଷୀମାନଙ୍କୁ ନ୍ୟାୟ ଦେବା ପାଇଁ ତୁରନ୍ତ ତଦନ୍ତ କରିବାକୁ ଦାବି କରୁଛୁ।    

ଅଧିକ ପଢ଼ନ୍ତୁ: ମରିସସର ନୂଆ ପ୍ରଧାନମନ୍ତ୍ରୀଙ୍କୁ ଶୁଭେଚ୍ଛା ଜଣାଇଲେ ମୋଦୀ