ନିକଟରେ ନୂଆଦିଲ୍ଲୀରେ ପ୍ରତିରକ୍ଷା ଶିଖର ସମ୍ମିଳନୀ ଆୟୋଜିତ ହୋଇଯାଇଛି। ଏହି ଅବସରରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି ଯେ, "ପ୍ରତିରକ୍ଷା କ୍ଷେତ୍ରରେ ଭାରତ ୨୦୨୮-୨୯ ସୁଦ୍ଧା ୫୦ ହଜାର କୋଟି ଟଙ୍କାର ରପ୍ତାନୀ ଲକ୍ଷ୍ୟ ହାସଲ କରିବା ସହ ଏହି ସମୟ ମଧ୍ୟରେ ଭାରତର ବାର୍ଷିକ ପ୍ରତିରକ୍ଷା ଉତ୍ପାଦନ ୩ ଲକ୍ଷ କୋଟି ଟଙ୍କାରେ ପହଞ୍ଚିବ ବୋଲି ଆଶା କରାଯାଉଛି।"
ଏହି ସମ୍ମିଳନୀରେ ଶ୍ରୀ ସିଂହ ପ୍ରତିରକ୍ଷା ଉତ୍ପାଦନ କ୍ଷେତ୍ରରେ ନିଆଯାଇଥିବା ପ୍ରମୁଖ ପଦକ୍ଷେପ ଉପରେ ଆଲୋକପାତ କରିଥିଲେ। ପ୍ରତିରକ୍ଷା ମନ୍ତ୍ରଣାଳୟ ୫୦୦ରୁ ଅଧିକ ସାମଗ୍ରୀକୁ ନେଇ ସେନାର ପାଞ୍ଚଟି ସ୍ୱଦେଶୀକରଣ ତାଲିକା ବିଜ୍ଞପ୍ତି ଜାରି କରିଥିବା ବେଳେ ସୈନିକମାନେ ଭାରତରେ ନିର୍ମିତ ଅସ୍ତ୍ରଶସ୍ତ୍ର ଏବଂ ପ୍ଲାଟଫର୍ମ ବ୍ୟବହାର କରନ୍ତି ତାହା ସୁନିଶ୍ଚିତ କରିବା ପାଇଁ ପ୍ରତିରକ୍ଷା ରାଷ୍ଟ୍ରାୟତ୍ତ ୟୁନିଟ୍ ପାଇଁ ୪୬୦୦ରୁ ଅଧିକ ସାମଗ୍ରୀ ସହିତ ଅନ୍ୟ ଚାରିଟି ତାଲିକା ମଧ୍ୟ ବିଜ୍ଞପ୍ତି ଜାରି କରାଯାଇଛି ବୋଲି କହିଥିଲେ ଶ୍ରୀ ସିଂହ।
ପ୍ରତିରକ୍ଷା କ୍ଷେତ୍ରକୁ ସମ୍ପୂର୍ଣ୍ଣ ଆତ୍ମନିର୍ଭରଶୀଳ କରିବା ସହ ପ୍ରଧାନମନ୍ତ୍ରୀଙ୍କ ଆତ୍ମନିର୍ଭର ଭାରତ ନିର୍ମାଣ ଦିଗରେ ଦୀର୍ଘକାଳୀନ ଲାଭ ପାଇଁ ଏଥିରେ ପରିବର୍ତ୍ତନ କରାଯାଇଛି ବୋଲି ଶ୍ରୀ ସିଂହ କହିଥିଲେ। ତେବେ ଆଗାମୀ ୫ ବର୍ଷ ମଧ୍ୟରେ ଭାରତରେ ଏରୋ ଇଞ୍ଜିନ୍ ଏବଂ ଗ୍ୟାସ୍ ଟର୍ବାଇନ୍ ଭଳି ଉଚ୍ଚସ୍ତରୀୟ ବ୍ୟବସ୍ଥା ଉତ୍ପାଦନ କରିବାକୁ ସରକାର ଲକ୍ଷ୍ୟ ରଖିଛନ୍ତି ବୋଲି ସୂଚନା ଦେଇଛନ୍ତି ପ୍ରତିରକ୍ଷା ମନ୍ତ୍ରୀ।
ଅଧିକ ପଢନ୍ତୁ: ବିନା ଡ୍ରାଇଭର୍ରେ ପ୍ରାୟ ୮୪ କିମି ଗଡ଼ିଲା ଟ୍ରେନ୍