ନୂଆଦିଲ୍ଲୀ: ପଡ଼ୋଶୀ ପାକିସ୍ତାନ ସହ ସମ୍ପର୍କ ଏବଂ ଆଲୋଚନାକୁ ନେଇ ଏକ ବଡ଼ ବୟାନ ଦେଇଛନ୍ତି ରାଷ୍ଟ୍ରୀୟ ସ୍ୱୟଂସେବକ ସଂଘ (RSS)ର ସାଧାରଣ ସମ୍ପାଦକ ଦତ୍ତାତ୍ରେୟ ହୋସବାଲେ। ରାଷ୍ଟ୍ରର ସୁରକ୍ଷା ଓ ସ୍ୱାଭିମାନ ସବୁଠୁ ଗୁରୁତ୍ୱପୂର୍ଣ୍ଣ ହୋଇଥିଲେ ସୁଦ୍ଧା, ପାକିସ୍ତାନ ସହ ବାର୍ତ୍ତାଳାପର ଦ୍ୱାର ସମ୍ପୂର୍ଣ୍ଣ ବନ୍ଦ ହେବା ଅନୁଚିତ ବୋଲି ସେ ମତ ପ୍ରକାଶ କରିଛନ୍ତି।

ସମ୍ବାଦ ସଂସ୍ଥା PTIକୁ ଦେଇଥିବା ଏକ ସାକ୍ଷାତକାରରେ ହୋସବାଲେ କହିଛନ୍ତି ଯେ, ପୂର୍ବରୁ ଅଟଳ ବିହାରୀ ବାଜପେୟୀଙ୍କ ସରକାର ହେଉ କିମ୍ବା ବର୍ତ୍ତମାନର ମୋଦୀ ସରକାର, ଭାରତ ସବୁବେଳେ ଶାନ୍ତି ପାଇଁ ପଦକ୍ଷେପ ନେଇଛି। କିନ୍ତୁ ପାକିସ୍ତାନ ବାରମ୍ବାର ପୁଲଓ୍ୱାମା ଭଳି ଆକ୍ରମଣ କରି ବିଶ୍ୱାସଘାତକତା କରିଛି। ଯଦିଓ ପାକିସ୍ତାନର କୌଣସି ବି ଭୁଲ୍ ଆଚରଣର କଡ଼ା ଜବାବ ଦେବା ଦରକାର, ତଥାପି କୂଟନୈତିକ ସ୍ତରରେ କଥାବାର୍ତ୍ତା ପାଇଁ ସୁଯୋଗ ଖୋଲା ରହିବା ଉଚିତ।

ସୀମାରେ ତିକ୍ତତା ମଧ୍ୟରେ ସମ୍ପର୍କର ସେତୁ

ହୋସବାଲେଙ୍କ କହିବା ଅନୁସାରେ, ଯଦି ସମ୍ପୂର୍ଣ୍ଣ ରୂପେ ଆଲୋଚନା ବନ୍ଦ ହୋଇଯାଏ, ତେବେ ଭବିଷ୍ୟତରେ ସମ୍ପର୍କ ସୁଧାରିବାର ସୁଯୋଗ ମଧ୍ୟ ଶେଷ ହୋଇଯିବ। ସେଥିପାଇଁ ଦୁଇ ଦେଶ ମଧ୍ୟରେ କୂଟନୈତିକ ସମ୍ପର୍କ, ବାଣିଜ୍ୟ ଏବଂ ଭିସା ପ୍ରଦାନ ଭଳି ବ୍ୟବସ୍ଥା ଚାଲୁ ରହିଛି। ଶାନ୍ତି ପ୍ରତିଷ୍ଠା ପାଇଁ ଆଲୋଚନା ଏକମାତ୍ର ମାଧ୍ୟମ ବୋଲି ସେ ଗୁରୁତ୍ୱ ଦେଇଛନ୍ତି।

ମୁସଲିମ ନେତୃତ୍ୱ ଓ 'ଲଭ୍ ଜିହାଦ୍' ଉପରେ କଲେ ବଡ଼ ଟିପ୍ପଣୀ

କେବଳ ବିଦେଶ ନୀତି ନୁହେଁ, ବରଂ ଦେଶର ଆଭ୍ୟନ୍ତରୀଣ ପ୍ରସଙ୍ଗ ଉପରେ ମଧ୍ୟ ନିଜର ମତ ରଖିଛନ୍ତି RSS ସାଧାରଣ ସମ୍ପାଦକ। ସେ କହିଛନ୍ତି ଯେ, ମୁସଲିମ ସମ୍ପ୍ରଦାୟ ମଧ୍ୟରେ ଜାତୀୟତାବାଦୀ ନେତୃତ୍ୱ ମିଳିବା ଏବେ ବି ଏକ ବଡ଼ ଆହ୍ୱାନ। ଏଥିସହ 'ଲଭ୍ ଜିହାଦ୍'କୁ ଏକ ସୁଚିନ୍ତିତ ଷଡ଼ଯନ୍ତ୍ର ବୋଲି ସେ ଅଭିହିତ କରିଛନ୍ତି। ଯଦି ପ୍ରେମ ପଛରେ କୌଣସି ଏଜେଣ୍ଡା ବା ହିନ୍ଦୁ ଝିଅମାନଙ୍କୁ ଧର୍ମାନ୍ତର କରିବାର ଯୋଜନା ଥାଏ, ତେବେ ତାହାକୁ କଦାପି ଗ୍ରହଣ କରାଯିବ ନାହିଁ ବୋଲି ସେ କଠୋର ଭାବେ କହିଛନ୍ତି।