ରାୟପୁର: ଲାଲବାହିନୀଙ୍କ ବିରୋଧରେ ସୁରକ୍ଷାବାହିନୀଙ୍କ ଅଭିଯାନ ଜାରି ରହିଛି । ଗୁରୁବାର ପୁଣିଥରେ ସୁରକ୍ଷାବାହିନୀ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଛି । ଛତିଶଗଡ଼ ନାରାୟଣପୁର ଜିଲ୍ଲାରେ ଯବାନଙ୍କ ଗୁଳିରେ ୭ ମାଓବାଦୀ ଟଳିଛନ୍ତି । ଏ ନେଇ ସୂଚନା ଦେଇଛନ୍ତି ବସ୍ତର ଆଇଜି ପି. ସୁନ୍ଦରରାଜ । 

ଆଜି ସକାଳେର ଦନ୍ତେୱାଡ଼ା-ନାରାୟଣପୁର ସୀମାରେ ସୁରକ୍ଷାବାହିନୀ ତଲାସୀ ଅଭିଯାନ ଆରମ୍ଭ କରିଥିଲେ । ଦକ୍ଷିଣ ଅବୁଝମାଡ଼ ଜଙ୍ଗଲରେ ଡିଷ୍ଟ୍ରିକ୍‌ଟ ରିଜର୍ଭ ଗାର୍ଡ (ଡିଆରଜି), ସିଆରପିଏଫ୍ ଏବଂ ସ୍ପେଶାଲ୍ ଟାସ୍କ ଫୋର୍ସ (ଏସଟିଏଫ)ର ମିଳିତ ସର୍ଚ୍ଚ ଅପରେସନ୍ କରିଥିଲେ । ଉଭୟ ପକ୍ଷରୁ ଘମାଘୋଟ ଗୁଳି ବର୍ଷଣ ହୋଇଥିଲା । କିନ୍ତୁ ସୁରକ୍ଷାବାହିନୀଙ୍କୁ ସାମ୍ନା କରିପାରି ନ ଥିଲେ ମାଓବାଦୀ । ଶେଷରେ ଯବାନଙ୍କ ଏନକାଉଣ୍ଟରେ ଟଳି ପଡ଼ିଥିଲେ ମାଓବାଦୀ । ଜଙ୍ଗଲରୁ ୭ ଜଣ ମାଓବାଦୀଙ୍କ ଶବ ଉଦ୍ଧାର କରାଯାଇଥିବାନେଇ ବସ୍ତର ଆଇଜି ପି. ସୁନ୍ଦରରାଜ ସୂଚନା ଦେଇଛନ୍ତି । 

ଏହା ପରେ ମଧ୍ୟ ଜଙ୍ଗଲରେ ସର୍ଚ୍ଚ ଅପରେସନ୍ ଜାରି ରହିଥିଲା । କିଛି ମାଓବାଦୀ ଖସି ପଳାଇ ଯିବାରେ ସକ୍ଷମ ହୋଇଥିବା ଅନୁମାନ କରାଯାଉଛି ।