ନୂଆଦିଲ୍ଲୀ: ଦକ୍ଷିଣ ଚୀନ୍ ସାଗରରେ ଚୀନ୍‌ ବଢାଉଥିବା ସାମରିକ ଶକ୍ତି ବୃଦ୍ଧି ମଧ୍ୟରେ ଭାରତ ଏବଂ ଇଣ୍ଡୋନେସିଆ ସମ୍ପୃକ୍ତ ଅନ୍ତର୍ଜାତୀୟ ଆଇନ ଅନୁଯାୟୀ ଏହି ଅଞ୍ଚଳରେ ଏକ "ସମ୍ପୂର୍ଣ୍ଣ ଏବଂ ପ୍ରଭାବଶାଳୀ" ଆଚରଣ ବିଧି ଲାଗୁ କରିବାକୁ ଦାବି କରିଛନ୍ତି। ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଇଣ୍ଡୋନେସିଆ ରାଷ୍ଟ୍ରପତି ପ୍ରବୋଭୋ ସୁବିଆଣ୍ଟୋଙ୍କ ମଧ୍ୟରେ ଶନିବାର ବିସ୍ତୃତ ଆଲୋଚନା ହୋଇଛି। ଏହି ବୈଠକରେ ଭାରତ ମହାସାଗର ଅଞ୍ଚଳରେ ଥିବା ଭାରତର ସୂଚନା ସଂଯୋଗ କେନ୍ଦ୍ରରେ ଇଣ୍ଡୋନେସିଆର ଜଣେ ସମ୍ପର୍କ ଅଧିକାରୀଙ୍କୁ ନିୟୋଜିତ କରିବାକୁ ଉଭୟ ପକ୍ଷ ରାଜି ହୋଇଥିଲେ। 

ଭାରତୀୟ ନୌସେନା ୨୦୧୮ମସିହାରେ ଏକ ସୂଚନା ସଂଯୋଗ କେନ୍ଦ୍ର ପ୍ରତିଷ୍ଠା କରିଥିଲା, ଯେଉଁଥିରେ ସମାନ ଚିନ୍ତାଧାରାର ଦେଶମାନଙ୍କ ସହ ମିଳିତ ଢାଞ୍ଚାରେ ଜାହାଜ ଗତିବିଧି ତଥା ଏହି ଅଞ୍ଚଳର ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ଗତିବିଧି ଉପରେ ନଜର ରଖାଯାଇଥିଲା। ଦକ୍ଷିଣ ଚୀନ୍ ସାଗରରେ ବାଧ୍ୟତାମୂଳକ ଆଚରଣ ବିଧି ଲାଗୁ କରିବାକୁ ଆସିଆନ୍ ଦେଶଗୁଡ଼ିକ ମଧ୍ୟ ଜୋର ଦେଉଛନ୍ତି। ଏହାର ମୁଖ୍ୟ କାରଣ ହେଉଛି ଏହି ଅଞ୍ଚଳରେ ନିଜର ବ୍ୟାପକ ଦାବି ସ୍ଥାପନ କରିବା ପାଇଁ ଚୀନର ନିରନ୍ତର ପ୍ରୟାସ।

ବେଜିଂ ଏହି କୋଡକୁ ତୀବ୍ର ବିରୋଧ କରିଆସୁଛି। ହାଇଡ୍ରୋକାର୍ବନର ଏକ ବିରାଟ ଉତ୍ସ ସମଗ୍ର ଦକ୍ଷିଣ ଚୀନ୍ ସାଗର ଉପରେ ଚୀନ୍ ସାର୍ବଭୌମତ୍ୱ ଦାବି କରୁଛି। ତେବେ ଭିଏତନାମ, ଫିଲିପାଇନ୍ସ ଓ ବ୍ରୁନେଇ ସମେତ ଆସିଆନର ଅନେକ ସଦସ୍ୟ ଦେଶ ଚୀନର ଏହି ଦାବିକୁ ବିରୋଧ କରିଛନ୍ତି। ଭାରତ-ଇଣ୍ଡୋନେସିଆ ଅର୍ଥନୈତିକ ସମ୍ପର୍କକୁ ସୁଦୃଢ଼ କରିବା ଦିଗରେ ମଧ୍ୟ ମୋଦୀ ଓ ସୁବିଆଣ୍ଟୋ ଆଲୋଚନା କରିଥିଲେ।

ଦ୍ୱିପାକ୍ଷିକ କାରବାର ପାଇଁ ସ୍ଥାନୀୟ ମୁଦ୍ରାର ବ୍ୟବହାର ପାଇଁ ଗତ ବର୍ଷ ଦୁଇ ପକ୍ଷ ମଧ୍ୟରେ ହୋଇଥିବା ବୁଝାମଣାପତ୍ରକୁ ଶୀଘ୍ର କାର୍ଯ୍ୟକାରୀ କରିବା ଉପରେ ସେମାନେ ଗୁରୁତ୍ୱାରୋପ କରିଥିଲେ। ସେମାନେ ବିଶ୍ୱାସ କରନ୍ତି ଯେ ଦ୍ୱିପାକ୍ଷିକ କାରବାର ପାଇଁ ସ୍ଥାନୀୟ ମୁଦ୍ରାର ବ୍ୟବହାର ବାଣିଜ୍ୟକୁ ଆହୁରି ପ୍ରୋତ୍ସାହିତ କରିବ ଏବଂ ଦୁଇ ଅର୍ଥନୀତି ମଧ୍ୟରେ ଆର୍ଥିକ ସମନ୍ୱୟକୁ ଗଭୀର କରିବ। 

ସମସ୍ତ ପ୍ରକାର ଆତଙ୍କବାଦକୁ ତୀବ୍ର ନିନ୍ଦା କରି ମୋଦୀ ଓ ସୁବିଆଣ୍ଟୋ ଭାରତ-ଇଣ୍ଡୋନେସିଆ ଆତଙ୍କବାଦ ବିରୋଧୀ ସହଯୋଗକୁ ତୀବ୍ର କରିବା ପାଇଁ ସେମାନଙ୍କର ସଂକଳ୍ପକୁ ଦୋହରାଇଥିଲେ ଏବଂ କୌଣସି "ଦ୍ୱିଗୁଣିତ ମାନଦଣ୍ଡ" ବିନା ଏହି ବିପଦର ମୁକାବିଲା ପାଇଁ ମିଳିତ ବିଶ୍ୱସ୍ତରୀୟ ପ୍ରୟାସ କରିବାକୁ ଆହ୍ୱାନ ଦେଇଥିଲେ। ମିଳିତ ଜାତିସଂଘ ଦ୍ୱାରା ନିଷିଦ୍ଧ ଆତଙ୍କବାଦୀ ସଂଗଠନ ଏବଂ ଏହାର ସହଯୋଗୀ ସଂଗଠନ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦୁଇ ନେତା ସମସ୍ତ ଦେଶକୁ ଆହ୍ୱାନ ଦେଇଛନ୍ତି।