ରାଞ୍ଚି: ଦେଶର ଅନ୍ୟତମ ଧନୀ ବ୍ୟବସାୟୀ ଝାଡ଼ଖଣ୍ଡର ସୁରେଶ ଜାଲାନ ପୂରା ପରିବାର ପାଇଁ ଏକ ଘରୋଇ ଜେଟ୍ କିଣିଛନ୍ତି। ଝାଡ଼ଖଣ୍ଡର ସର୍ବବୃହତ କାର୍ବନ ରିସୋର୍ସ କମ୍ପାନିର ମାଲିକ ଜାଲାନ ୧୦ ସିଟ୍ ବିଶିଷ୍ଟ ବିମାନ ପାଇଁ ୯୦ କୋଟି ଟଙ୍କାରେ ଚୁକ୍ତି କରିଛନ୍ତି।  

ଦେଶର ସବୁଠାରୁ ଧନୀ ବ୍ୟବସାୟୀଙ୍କ ମଧ୍ୟରେ ୨୯୯ତମ ସ୍ଥାନରେ ଥିବା ଗିରିଡିହର ପ୍ରସିଦ୍ଧ ଶିଳ୍ପପତି ସୁରେଶ ଜାଲାନ ୯୦ କୋଟି ଟଙ୍କା ବ୍ୟୟରେ ଏକ ଘରୋଇ ଜେଟ୍ କିଣିଛନ୍ତି। ୧୦ ସିଟ୍ ବିଶିଷ୍ଟ ଏହି ବିମାନଟି ସ୍ୱିଜରଲ୍ୟାଣ୍ଡରୁ ଗିରିଡିହ ବିମାନ ବନ୍ଦର ଅର୍ଥାତ୍ ବୋରୋ ଏରୋଡ୍ରମରେ ପ୍ରଥମ ଅବତରଣ କରିଥିଲା।   

ସାଧାରଣତନ୍ତ୍ର ଦିବସ ଅବସରରେ ଏହି ବିମାନକୁ ପୂଜା କରାଯାଇଥିଲା। ବିମାନଟି ସିଙ୍ଗାପୁରକୁ ପ୍ରଥମ ଉଡ଼ାଣ କରିଥିଲା। ଏହି ପଦକ୍ଷେପ ସୁରେଶ ଜାଲାନଙ୍କ ବଢୁଥିବା ଅର୍ଥନୈତିକ ଦବଦବା ଏବଂ ଏହି ଅଞ୍ଚଳରେ ବିଶ୍ୱସ୍ତରୀୟ ଯୋଗାଯୋଗକୁ ସୂଚାଉଛି।  

ସୂଚନାଯୋଗ୍ୟ, ବ୍ୟବସାୟୀ ସୁରେଶ ଜାଲାନଙ୍କ କମ୍ପାନି କାର୍ବନ ରିସୋର୍ସେସ କାର୍ବନ ଭିତ୍ତିକ କଞ୍ଚାମାଲ ଉତ୍ପାଦନ କରିଥାଏ। ସେମାନଙ୍କ ବ୍ୟବସାୟ ଭାରତର ୫ଟି ରାଜ୍ୟରେ ବ୍ୟାପିଛି। କମ୍ପାନି ଭାରତରେ ଦୁଇଟି ସ୍ଥାନରେ ବାର୍ଷିକ ୧,୨୦,୦ ମେଟ୍ରିକ୍ ଟନ୍ କ୍ଷମତା ବିଶିଷ୍ଟ ଇଲେକ୍ଟ୍ରୋଡ୍ ପେଷ୍ଟର ସର୍ବବୃହତ୍ ଏବଂ ଏକମାତ୍ର ଉତ୍ପାଦନକାରୀ ବୋଲି ଦାବି କରିଛି। ଏହାବ୍ୟତୀତ କମ୍ପାନି କ୍ୟାଲସିନେଡ୍ ପେଟ୍ରୋଲିୟମ କୋକ୍, ଇଲେକ୍ଟ୍ରିକାଲି କାଲସିନେଡ୍ ଆନ୍ଥ୍ରାସାଇଟ୍, ରାମିଂ ପେଷ୍ଟ, କାର୍ବୁରାଇଜର୍ ଏବଂ ଇଞ୍ଜେକସନ୍ କାର୍ବନ ଉତ୍ପାଦନ କରିଥାଏ।