ଖବର ଓଡ଼ିଶା: ପ୍ୟାରିସ ଅଲିମ୍ପିକ ମହାକୁମ୍ଭ ଆରମ୍ଭ ହେବା ପୂର୍ବରୁ ଫ୍ରାନ୍ସରେ ରେଳ ସେବା ସମ୍ପୂର୍ଣ୍ଣ ଠପ୍ ହୋଇଯାଇଛି । ଫ୍ରାନ୍ସରେ ଦ୍ରୁତଗାମୀ ରେଳ ସେବା ବାଧାପ୍ରାପ୍ତ ହୋଇଛି । ଫଳରେ ବିଶ୍ୱର କୋଣ ଅନୁ କୋଣରୁ ଅଲିମ୍ପିକ ଦେଖିବାକୁ ଆସୁଥିବା କ୍ରୀଡ଼ା ପ୍ରେମୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଛନ୍ତି ।
ଫ୍ରାନ୍ସର ରେଳ ସେବା ଯୋଗାଉ ଥିବା କମ୍ପାନୀ ଏସ.ଏନ.ସି.ଏଫ ର ସୂଚନା ମୁତାବକ, ଜାଣିଶୁଣି ରେଳ ବିଭାଗ ସହ ଦୁର୍ଭାଗ୍ୟପୂର୍ଣ୍ଣ କାର୍ଯ୍ୟ କରାଯାଇଛି । ଯାହାର ସିଧାସଳଖ ପ୍ରଭାବ ପରିବହନ ବ୍ୟବସ୍ଥା ଉପରେ ପଡ଼ିଛି । ହାଇ ସ୍ପିଡ୍ ରେଳ ଲାଇନରେ ଅଗ୍ନିକାଣ୍ଡ ଓ ଭଙ୍ଗାରୁଜା ଘଟଣା ଯୋଗୁଁ ଏଭଳି ପରିସ୍ଥିତି ସୃଷ୍ଟି ହୋଇଛି । ରେଳ ନେଟୱାର୍କର ପଶ୍ଚିମ ମାର୍ଗରେ ଅଗ୍ନିକାଣ୍ଡ ଘଟିଥିବା ଫ୍ରାନ୍ସ ଗଣମାଧ୍ୟମ ରିପୋର୍ଟରୁ ଜଣାପଡ଼ିଛି । ପ୍ରକୃତରେ କ’ଣ ଘଟିଛି ଏବଂ ଅଗ୍ନିକାଣ୍ଡ ଓ ଭଙ୍ଗାରୁଜା ଘଟଣା କାହିଁକି ଘଟୁଛି ସେ ନେଇ ତଦନ୍ତ ଚାଲିଥିବା ଫ୍ରାନ୍ସ ପୋଲିସ କହିଛି । ଏହା ପଛରେ କାହାର ଷଡଯନ୍ତ୍ର ରହିଛି ତାହା ଅନୁସନ୍ଧାନ ଜାରି ରହିଛି।
ଏସ.ଏନ.ସି.ଏଫ କହିଛି ଯେ ରେଳ ସେବା ବନ୍ଦ ହେବା ଫଳରେ ଫ୍ରାନ୍ସର ପଶ୍ଚିମ, ଉତ୍ତର ଏବଂ ପୂର୍ବ ଅ଼ଞ୍ଚଳ ପ୍ରଭାବିତ ହୋଇଛି । ଏହି କାରଣରୁ ପଡ଼ୋଶୀ ବେଲଜିୟମ ଏବଂ ଲଣ୍ଡନକୁ ଯାଉଥିବା ଯାତ୍ରୀ ପ୍ରଭାବିତ ହୋଇଛନ୍ତି । ବହୁ ସଂଖ୍ୟକ ରେଳ ଯାତ୍ରୀ ଷ୍ଟେସନରେ ଅଟକି ଯାଇଥିଲେ । ଏହା ଯୋଗୁଁ କ୍ରୀଡ଼ା ପ୍ରେମୀ ବିଶେଷ ଭାବରେ ପ୍ରଭାବିତ ହୋଇଛନ୍ତି । ଆଜି ପ୍ୟାରିସ ଅଲିମ୍ପିକ୍ସ ଉଦଘାଟନୀ ସମାରୋହ ଅନୁଷ୍ଠିତ ହେବ । ବିଶ୍ୱର ବିଭିନ୍ନ ସ୍ଥାନରୁ କ୍ରୀଡ଼ାପ୍ରେମୀମାନେ ପ୍ୟାରିସରେ ପହଞ୍ଚିଛନ୍ତି ଏବଂ ଏଭଳି ପରିସ୍ଥିତିରେ ସେମାନଙ୍କୁ ଅନେକ ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି ।