ୱାସିଂଟନ୍: ଆମେରିକାର ନୂତନ ରାଷ୍ଟ୍ରପତିଭାବେ ଶପଥ ନେବା ପୂର୍ବରୁ ଡୋନାଲ୍ଡ ଟ୍ରମ୍ପଙ୍କୁ ବଡ଼ ଆଶ୍ୱସ୍ତି ମିଳିଛି । ପର୍ଣ୍ଣ ଷ୍ଟାର୍ ଷ୍ଟାର୍ମି ଡେନିୟଲ୍ସ ସହିତ ଜଡ଼ିତ ହୁସ୍ ମନି ମାମଲାରେ ଡୋନାଲ୍ଡ ଟ୍ରମ୍ପଙ୍କୁ ନିଃସର୍ତ୍ତ ଦଣ୍ଡାଦେଶ ଆସିଛି । ଏହାର ଅର୍ଥ ଟ୍ରମ୍ପଙ୍କୁ ଜେଲ ଦଣ୍ଡ କିମ୍ବା କୌଣସି ଆର୍ଥିକ ଦଣ୍ଡରେ ଦଣ୍ଡିତ କରାଯାଇ ପାରିବ ନାହିଁ । ସମସ୍ତ ୩୪ଟି ବ୍ୟବସାୟିକ ରେକର୍ଡ କାରବାର ମାମଲାରେ ତାଙ୍କୁ ଦୋଷମୁକ୍ତ କରାଯାଇଛି । 

ଆମେରିକାରେ ଜଷ୍ଟିସ୍ ଜୁଆନ୍ ମାର୍ଚେନ୍ ଶୁକ୍ରବାର ଶୁଣାଣି କରିଥିଲେ । ଟ୍ରମ୍ପ ଭିଡ଼ିଓ କନଫରେନ୍ସ ମାଧ୍ୟମରେ ଶୁଣାଣିରେ ହାଜର ହୋଇଥିଲେ । ସେ ଏହାକୁ ବଡ଼ ରାଜନୈତିକ ଷଡ଼ଯନ୍ତ୍ର ବୋଲି କହିଛନ୍ତି । ସେ ଆହୁରି କହିଛନ୍ତି, ଏହା ଅତ୍ୟନ୍ତ ଭୟଙ୍କର ଥିଲା, ନ୍ୟୁୟର୍କ ଏବଂ ନ୍ୟୁୟର୍କ ଅଦାଲତ ପ୍ରଣାଳୀକୁ ଏହା ଏକ ଝଟକା ଥିଲା । ଆସନ୍ତା ଜାନୁୟାରୀ ୨୦ ତାରିଖରେ ଟ୍ରମ୍ପ ରାଷ୍ଟ୍ରପତି ଭାବେ ଶପଥ ନେବେ । 

ଏହା ପୂର୍ବରୁ ଜଷ୍ଟିସ୍ ଜୁଆନ୍ ମାର୍ଚେନ କହିଥିଲେ ଯେ ଟ୍ରମ୍ପଙ୍କୁ ଜେଲ ଦଣ୍ଡାଦେଶ ଦେବେ ନାହିଁ । କିନ୍ତୁ ବିନା ଦଣ୍ଡାଦେଶରେ ମାମଲାର ଅନ୍ତ କରାଯିବା ନାହିଁ । 

ହୁସ୍ ମନି ମାମଲାରେ ଡୋନାଲ୍ଡ ଟ୍ରମ୍ପ ୨୦୦୬ରେ ଷ୍ଟୋର୍ମି ଡାନିଏଲ୍ସଙ୍କ ସହ ତାଙ୍କର ସମ୍ପର୍କ ଲୁଚାଇବା ପାଇଁ ତାଙ୍କୁ ଚେଷ୍ଟା କରିଥିବା ଅଭିଯୋଗ ହୋଇଛି। ଟ୍ରମ୍ପ ଏହି ଅଭିଯୋଗକୁ ଖଣ୍ଡନ କରିଛନ୍ତି। ନ୍ୟୁୟର୍କ ଅଦାଲତ ଟ୍ରମ୍ପଙ୍କୁ ସରକାରୀ ବ୍ୟବସାୟିକ ଦାୟିତ୍ୱ ପରିବର୍ତ୍ତେ ତାଙ୍କ ବ୍ୟକ୍ତିଗତ ବ୍ୟାପାର ସହିତ ଜଡ଼ିତ ୩୪ଟି ବ୍ୟବସାୟିକ ରେକର୍ଡ କାରବାର ଅଭିଯୋଗରେ ଦୋଷୀ ସାବ୍ୟସ୍ତ କରିଛନ୍ତି। 

ତେବେ ଏ ନେଇ ଡୋନାଲ୍ଡ ଟ୍ରମ୍ପ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ ମଧ୍ୟ ତାଙ୍କୁ ନିରାଶ ହେବାକୁ ପଡ଼ିଥିଲା । ସୁପ୍ରିମ୍‌କୋର୍ଟଙ୍କ ଖଣ୍ଡପୀଠ ଟ୍ରମ୍ପଙ୍କ  ଆବେଦନକୁ ଖାରଜ କରିବା ସହ ବିଚାରପତି ଜୁଆନ୍ ଏମ୍ ମାର୍ଚେନ୍‌ଙ୍କୁ ଶୁକ୍ରବାର ଦଣ୍ଡାଦେଶ ଦେବାକୁ ଅନୁମତି ପ୍ରଦାନ କରିଥିଲେ ।