ଖବର ଓଡ଼ିଶା: ଆମେରିକା ରାଷ୍ଟ୍ରପତି ନିର୍ବାଚନ ପାଇଁ ଚିତ୍ର ବର୍ତ୍ତମାନ ସ୍ପଷ୍ଟ ହୋଇସାରିଛି । ରାଷ୍ଟ୍ରପତି ଜୋ ବାଇଡେନ୍ ନିର୍ବାଚନରୁ ଓହରିଯିବା ପରେ ପୂର୍ବତନ ରାଷ୍ଟ୍ରପତି ବାରାକ ଓବାମା ଏବଂ ତାଙ୍କ ପତ୍ନୀ ମିସେଲ ଓବାମା ସିଧାସଳଖ କମଲା ହାରିସ୍ ଙ୍କୁ ସମର୍ଥନ ଜଣାଇଛନ୍ତି । ବାରାକ ଓବାମା ଶୁକ୍ରବାର ଏକ ଭିଡିଓ ଜାରି କରି ଏହା ଘୋଷଣା କରିଛନ୍ତି । ଓବାମା କହିଛନ୍ତି ଯେ କମଲା ହାରିସ୍ ଙ୍କୁ ସମର୍ଥନ କରି ସେ ଓ ମିସେଲ ଗର୍ବିତ ଏବଂ ସେମାନେ ସମସ୍ତ ପ୍ରକାର ସାହାଯ୍ୟ କରିବେ ।
ପୂର୍ବତନ ରାଷ୍ଟ୍ରପତି ବାରାକ୍ ଓବାମା ସୋସିଆଲ ମିଡିଆ ପ୍ଲାଟଫର୍ମ ‘X’ରେ ଏକ ଭିଡିଓ ଜାରି କରିଛନ୍ତି । ଭିଡିଓରେ ଓବାମା ଓ ତାଙ୍କ ପତ୍ନୀ କମଲାଙ୍କ ସହ କଥା ବାର୍ତ୍ତା କରୁଥିବା ଦେଖିବାକୁ ମିଳିଛି । ହାରିସଙ୍କୁ ଫୋନ୍ ଯୋଗେ ପୂର୍ବତନ ରାଷ୍ଟ୍ରପତି କହିଛନ୍ତି, ଆମେ ଆପଣଙ୍କୁ ଫୋନ୍ କରି କହିଛୁ ଯେ ମିସେଲ ଏବଂ ମୁଁ ଆପଣଙ୍କୁ ସମର୍ଥନ କରିବୁ ଏବଂ ଏହି ନିର୍ବାଚନ ଜିତିବାରେ ସାହାଯ୍ୟ କରିବା ପାଇଁ ଯଥା ସମ୍ଭବ ପ୍ରୟାସ କରିବୁ । ଏହି ସମର୍ଥନ ପାଇଁ କମଲା ହାରିସ୍ ବାରାକ ଓବାମା ଏବଂ ମିସେଲ ଓବାମାଙ୍କୁ ଧନ୍ୟବାଦ ଦେଇଛନ୍ତି । ପୂର୍ବରୁ ଆଲୋଚନା ହେଉଥିଲା ଯେ ମିସେଲ ଓବାମା ମଧ୍ୟ ଆମେରିକୀୟ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିପାରନ୍ତି । କିନ୍ତୁ ଏହି ସମର୍ଥନ ଦ୍ୱାରା ବର୍ତ୍ତମାନ ଏହା ସ୍ପଷ୍ଟ ହୋଇଛି ଯେ ମିସେଲ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ନାହିଁ ।
ଚଳିତ ବର୍ଷ ନଭେମ୍ବର ୫ତାରିଖରେ ଆମେରିକାରେ ରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହେବ । ଏହି ନିର୍ବାଚନରେ ୧୬୦ ନିୟୁତ ପଞ୍ଜୀକୃତ ଭୋଟର ଯୁକ୍ତରାଷ୍ଟ୍ର ଆମେରିକାର ୬୦ତମ ରାଷ୍ଟ୍ରପତିଙ୍କୁ ନିର୍ବାଚିତ କରିବେ।