ଲଣ୍ଡନ: ସଂଯୁକ୍ତ ରାଷ୍ଟ୍ର ମହାସଚିବ ଏଣ୍ଟୋନିଆ ଗୁଟେରସ ଲଗାତାର ଗରମ ନେଇ ବିଶ୍ବବାସୀଙ୍କୁ ସତର୍କ ସୂଚନା ଦେଇଛନ୍ତି। ଗୁଟେରେସ କହିଛନ୍ତି ବିଭିନ୍ନ ଦେଶରେ ଜଳବାୟୁ ପରିବର୍ତ୍ତନର କାରଣରୁ ଗରମ ଅନୁଭୂତ ହେଉଛି। ଯଦି ଏହାର ଜରୁରୀକାଳୀନ ପଦକ୍ଷପେ ନିଆ ନଯିବ, ତା’ହେଲେ ବିଶ୍ବବାସୀଙ୍କୁ ବଡ଼ଧରଣର କ୍ଷତି ସହିବାକୁ ପଡ଼ିବ।
ନିକଟରେ ବିଶ୍ବରେ ରେକର୍ଡ ଗରମ ଅନୁଭୂତ ହୋଇଥିଲା। ଏହା ପରେ ଗୁଟେରେସ ବୟାନ ଦେଇଥିଲେ। ସେ କହିଥିଲେ ଯେ, ବିଶ୍ବକୁ ବର୍ଦ୍ଧିତ ତାପମାତ୍ରାର ଚ୍ୟାଲେଞ୍ଜ କରିବା ଉଚିତ। ଜଳବାୟୁ ପରିବର୍ତ୍ତନ ବିଶ୍ବବ୍ୟାପୀ ହିଟ୍ୱେଭ୍କୁ ଅଧିକ ଓ ଦୀର୍ଘ ସମୟ ପର୍ଯ୍ୟନ୍ତ ପ୍ରକ୍ରିୟାକୁ ପ୍ରୋତ୍ସାହନ ଯୋଗାଉଛି।
ଚଳିତ ବର୍ଷ ପ୍ରବଳ ଗରମ ଯୋଗୁଁ ହଜାର ହଜାର ଲୋକଙ୍କର ମୃତ୍ୟୁ ହୋଇଛି। ହଜ୍ ତୀର୍ଥଯାତ୍ରୀ ମଧ୍ୟ ଏହାର ଶିକାର ହୋଇଥିଲେ। ଗତମାସରେ ହଜ୍ଯାତ୍ରା ସମୟରେ ୧୩୦୦ରୁ ଅଧିକ ଲୋକଙ୍କର ମୃତ୍ୟୁ ହୋଇଥିଲା। ଆଫ୍ରିକା ଓ ଏସିଆ ମହାଦେଶରେ ପାଖାପାଖି ୮ କୋଟି ଶିଶୁଙ୍କ ସ୍କୁଲ ବନ୍ଦ ରଖିବାକୁ ପଡ଼ିଥିଲା। ୟୁରୋପୀୟ ସଂଘର କୋପରନିକସ ଜଳବାୟୁ ପରିବର୍ତ୍ତନ ସେବା ଅନୁସାରେ ୨୦୨୩ ଜୁନ ଠାରୁ ପ୍ରତ୍ୟେକ ମାସରେ ଗତ ବର୍ଷ ତୁଳନାରେ ଅଧିକ ଗରମ ହେଉଛି।
ବିଭିନ୍ନ ଦେଶଗୁଡ଼ିକର ସରକାରଙ୍କୁ ଜୀବାଶ୍ମ ଇନ୍ଧନ ଉତ୍ସର୍ଜନକୁ କମ କରିବା ସହିତ ବରିଷ୍ଠ, ଗର୍ଭବତୀ ମହିଳା ଓ ଶିଶୁଙ୍କ ସୁରକ୍ଷା ମଜବୁତ କରିବା ଲାଗି ସଂଯୁକ୍ତ ରାଷ୍ଟ୍ର ଆହ୍ବାନ କରିଛି। ଏଥି ସହିତ ଏଣ୍ଟୋନିଓ ଗୁଟେରେସ ଶ୍ରମିକମାନଙ୍କ ସୁରକ୍ଷା ଉପାୟକୁ ବଢ଼ାଇବା ପାଇଁ ଆହ୍ବାନ କରିଛନ୍ତି। ମାତ୍ରାଧିକ ଗରମ ପାଇଁ ବିଶ୍ବବ୍ୟାପୀ ପାଖାପାଖି ୨କୋଟି ୩୦ ଲକ୍ଷ ଲୋକ କାର୍ଯ୍ୟସ୍ଥଳୀରେ ବିଭିନ୍ନ ସ୍ବାସ୍ଥ୍ୟ ସମସ୍ୟାର ସାମ୍ନା କରୁଛନ୍ତି। ପାଖାପାଖି ୧୯ ହଜାର ଲୋକଙ୍କର ମୃତ୍ୟୁ ହେଉଛି।