ନେପାଳରେ ଏକ ବଡ଼ ଧରଣର ବିମାନ ଦୁର୍ଘଟଣା ହୋଇଛି । ଉଡାଣ ଆରମ୍ଭ କରିଥିବାବେଳେ ବିମାନରେ ନିଆଁ ଲାଗି ବିମାନଟି ସଂପୂର୍ଣ୍ଣ ଜଳି ଯାଇଛି । କାଠମାଣ୍ଡୁ ତ୍ରିଭୁବନ ଅନ୍ତର୍ଜାତୀୟ ବିମାନ ବନ୍ଦରରେ ଏହି ଅଘଟଣ ଘଟିଛି । ନିଆଁ ଲାଗିବା ଫଳରେ କ୍ର୍ୟୁ ମେମ୍ବରଙ୍କ ସମେତ ୧୯ ଜଣ ଯାତ୍ରୀଙ୍କର ମୃତ୍ୟୁ ହୋଇଥିବା ନେଇ ଅନ୍ତର୍ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି ।
ସୂଚନା ଅନୁଯାୟୀ ଆଜି ଦିନ ପାଖାପାଖି ୧୧ଟା ସମୟରେ ସୌର୍ୟ ଏୟାରଲାଇନ୍ସର ଏକ ବିମାନ କାଠମାଣ୍ଡୁ ତ୍ରିଭୁବନ ଅନ୍ତର୍ଜାତୀୟ ବିମାନ ବନ୍ଦରରୁ ଉଡ଼ାଣ ଆରମ୍ଭ କରିଥିଲା । ବିମାନଟି କୋଟେଶ୍ୱର ଅଭିମୁଖେ ଉଡ଼ାଣ ଆରମ୍ଭ କରିବାକୁ ପ୍ରସ୍ତୁତ ହେଉଥିଲା । କିନ୍ତୁ ଟେକଅଫ୍ କରିବା ସମୟରେ ହଠାତ ବିମାନଟି ରନୱେରୁ ବାହାରି ତଳକୁ ଚାଲିଆସିଥିଲା । ଏହି ସମୟରେ ବିମାନଟି ଜୋରରେ ତଳେ ପଡ଼ିଥିଲା ଏବଂ ହଠାତ ନିଆଁ ଲାଗିଯାଇଥିବା ନେଇ ପ୍ରତ୍ୟକ୍ଷଦର୍ଶୀ କହିଛନ୍ତି । ଯାହା ଫଳରେ ବିମାନରେ ଥିବା କ୍ର୍ୟୁ ମେମ୍ବରଙ୍କ ସମେତ ୧୯ ଜଣ ଯାତ୍ରୀଙ୍କର ମୃତ୍ୟୁ ହୋଇଥିବା ନେଇ ଅନ୍ତର୍ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି । ତୁରନ୍ତ ବିମାନର ନିଆଁ ଲିଭାଯାଇ ସମସ୍ତ ଯାତ୍ରୀଙ୍କୁ ମୃତ ଅବସ୍ଥାରେ ଉଦ୍ଧାର କରାଯାଛି ।