ଢାକା: ସରକାରୀ ଚାକିରି ବ୍ୟବସ୍ଥାରେ ସଂରକ୍ଷଣ ଶେଷ କରିବା ଦାବି ନେଇ ବାଂଲାଦେଶର ଛାତ୍ରମାନଙ୍କର ଆନ୍ଦୋଳନ ଜାରି ରହିଛି। ବାଂଲାଦେଶର ସର୍ବୋଚ୍ଚ ନ୍ୟାୟାଳୟ ଏହି ବିବାଦୀୟ ମାମଲା ଉପରେ ଶୁଣାଣି କରିପାରନ୍ତି। ସିଭିଲ ସର୍ଭିସ ପରୀକ୍ଷାରେ ସଂରକ୍ଷଣ ବ୍ୟବସ୍ଥା ରଖିବେ କି ନାହିଁ ସୁପ୍ରିମକୋର୍ଟ ଆଜି ଶୁଣାଣି କରିପାରନ୍ତି। ଏହି କାରଣରୁ ଦେଶରେ କର୍ଫ୍ୟୁ ଜାରି କରିଦିଆଯାଇଛି। ଏହାକୁ ଶୁଟ୍ ଆଣ୍ଡ ସାଇଟ୍ ନିର୍ଦ୍ଦେଶ ବୋଲି କୁହାଯାଉଛି। ଏଥି ସହିତ ସରକାର ହିଂସାରେ ନିୟୋଜିତ ଲୋକଙ୍କୁ ଗୁଳି କରିବା ପାଇଁ ମଧ୍ୟ ଆଦେଶ ଦେଇଛନ୍ତି। ବିଶ୍ବବିଦ୍ୟାଳୟ ପରିସରରୁ ଆରମ୍ଭ ହୋଇଥିବା ଛାତ୍ରମାନଙ୍କର ଆନ୍ଦୋଳନ ପୂରା ଦେଶକୁ ବ୍ୟାପିଛି।
କିଛି ସପ୍ତାହ ପୂର୍ବରୁ ଆରମ୍ଭ ହୋଇଥିବା ଏହି ବିରୋଧ ପ୍ରଦର୍ଶନ ଯୋଗୁଁ ଏପର୍ଯ୍ୟନ୍ତ ୧୩୩ ଜଣ ପ୍ରଦର୍ଶନକାରୀଙ୍କ ମୃତ୍ୟୁ ସାରିଛି। ୩୦୦୦ରୁ ଊର୍ଦ୍ଧ୍ବ ପ୍ରଦର୍ଶନକାରୀ ଆହତ ହୋଇଛନ୍ତି। ପ୍ରଦର୍ଶନକାରୀମାନେ ଠେଙ୍ଗା-ବାଡ଼ି ଓ ପଥର ଧରି ରାସ୍ତାରେ ବୁଲୁଥିବା ଜାତୀୟ ଗଣମାଧ୍ୟମ ରିପୋର୍ଟ କରିଛି। ଶେଖ ହାସୀନଙ୍କ ନେତୃତ୍ବରେ ପରିଚାଳିତ ସରକାର ଆଇନ-ବ୍ୟବସ୍ଥାର ଚିନ୍ତାଜନକ ସ୍ଥିତିରେ ପହଞ୍ଚିଲା ପରେ ସ୍ଥିତି ନିୟନ୍ତ୍ରଣ ପାଇଁ ଦେଶବ୍ୟାପୀ କର୍ଫ୍ୟୁ ଜାରି କରିଛି।
ଆନ୍ଦୋଳନ ଯୋଗୁଁ ବାଂଲାଦେଶରେ ବସ୍, ଟ୍ରେନ୍ ଓ ମେଟ୍ରୋ ସେବା ସ୍ଥଗିତ ରଖାଯାଇଛି। ହିଂସା ନିୟନ୍ତ୍ରଣ ପାଇଁ ସରକାର ମୋବାଇଲ ଇଣ୍ଟରନେଟ ସେବା ସ୍ଥଗିତ ରଖିଛନ୍ତି। ସ୍କୁଲ, କଲେଜ ସହିତ ମଦ୍ରାସା ମଧ୍ୟ ଅନିଶ୍ଚିତକାଳ ପାଇଁ ବନ୍ଦ କରିଛନ୍ତି। ପୂରା ଦେଶରେ ସେନାକୁ ରାଜରାସ୍ତାରେ ମୁତୟନ କରାଯାଇଛି।
ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସୀନା ନିକଟରେ ଏକ ସରକାରୀ ନ୍ୟାସନାଲ ଟେଲିଭିଜନରେ ଆସି ଦେଶବାସୀଙ୍କୁ ସମ୍ବୋଧିତ କରିଥିଲେ। ସେ ଶାନ୍ତି ପ୍ରତିଷ୍ଠା ପାଇଁ ଅପିଲ କରିଥିଲେ। କିନ୍ତୁ ପ୍ରଧାନମନ୍ତ୍ରୀଙ୍କ ସମ୍ବୋଧନ ପରେ ଦେଶରେ ପ୍ରଦର୍ଶନକାରୀ ଅଧିକ କ୍ରିୟାଶୀଳ ହୋଇଉଠିଛନ୍ତି। ଉତ୍ତେଜିତ ଲୋକେ ସରକାରୀ ଟେଲିଭିଜନ କାର୍ଯ୍ୟାଳୟରେ ନିଆଁ ଲଗାଇ ଦେଇଛନ୍ତି। ଏହି ସମୟରେ ସାମ୍ବାଦିକମାନଙ୍କ ସହିତ ପାଖାପାଖି ୧୨୦୦ କର୍ମଚାରୀ ଉପସ୍ଥିତ ଥିଲେ। ପୁଲିସ-ପ୍ରଶାସନ ବହୁ କଷ୍ଟରେ ସ୍ଥିତି ନିୟନ୍ତ୍ରଣକୁ ଆଣିଥିଲା। କିନ୍ତୁ ଗଣମାଧ୍ୟମର ପ୍ରଶ୍ନରେ ଶ୍ରୀମତୀ ହାସିନା କହିଥିଲେ- ଯଦି ସ୍ବାଧୀନତା ସଂଗ୍ରାମୀଙ୍କ ନାତି-ନାତୁଣୀଙ୍କୁ ସଂରକ୍ଷଣ ବ୍ୟବସ୍ଥାରୁ ଲାଭ ମିଳିବ ନାହିଁ, ତା’ହେଲେ କ’ଣ ରଜାକାରୋଙ୍କ ନାତି-ନାତୁଣୀଙ୍କୁ ମିଳିବ? ପ୍ରଧାନମନ୍ତ୍ରୀ ହାସୀନାଙ୍କ ଏହି ବୟାନ ଯୋଗୁଁ ଛାତ୍ରମାନେ ଅଧିକ ଉଗ୍ର ହୋଇଥିଲେ। ଫଳରେ ପୂର୍ବରୁ ଜଳୁଥିବା ନିଆଁରେ ଘିଅ ଢାଳିଲା ଭଳି ସ୍ଥିତି ହୋଇଥିଲା।
ଆନ୍ଦୋଳନ ନିୟନ୍ତ୍ରଣ କରିବା ପାଇଁ ପୁଲିସ ଲୁହବୁହା ଗ୍ୟାସ ପ୍ରୟୋଗ କରିଥିଲା। ଏହି କାରଣରୁ ପ୍ରଦର୍ଶନକାରୀମାନେ ଆହତ ହୋଇଥିଲେ। ଢାକା ସମେତ ଦେଶର ଅନ୍ୟସ୍ଥାନରେ ଏବେ ବସ୍, ଟ୍ରେନ୍ ଓ ମେଟ୍ରୋ ସେବା ବନ୍ଦ ରହିଛି। ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁସାରେ ଢାକାରେ ଆନ୍ଦୋଳନ ସମୟରେ ରିପୋର୍ଟିଂ ପାଇଁ ଯାଇଥିବା ଜଣେ ସାମ୍ବାଦିକ ମେହନ୍ଦୀ ହାସନଙ୍କ ମୃତ୍ୟୁ ହୋଇଛି। ଢାକାରେ କାନାଡା ବିଶ୍ବବିଦ୍ୟାଳୟର ପରିସରରେ ମଧ୍ୟ ପ୍ରଦର୍ଶନ ହୋଇଛି। ଏହି ବିଶ୍ବବିଦ୍ୟାଳୟର ଛାତ ଉପରେ ଫସିଥିବା ୬୦ ଜଣ ପୁଲିସ କର୍ମଚାରୀଙ୍କୁ ହେଲିକପ୍ଟର ଜରିଆରେ ଉଦ୍ଧାର କରାଯାଇଥିଲା।
ବାଂଲାଦେଶରେ ସଂରକ୍ଷଣ ବ୍ୟବସ୍ଥା
-ସ୍ବାଧୀନତା ସଂଗ୍ରାମୀଙ୍କ ପିଲାଙ୍କୁ ସରକାରୀ ଚାକିରିରେ ୩୦ ପ୍ରତିଶତ ସଂରକ୍ଷଣ ମିଳିଥାଏ
-ବାଂଲାଦେଶରେ ମହିଳାଙ୍କ ପାଇଁ ୧୦ ପ୍ରତିଶତ ସଂରକ୍ଷଣ ବ୍ୟବସ୍ଥା ରହିଛି
-ଏହା ବ୍ୟତୀତ ୧୦ ପ୍ରତିଶତ ସଂରକ୍ଷଣ ଭିନ୍ନଭିନ୍ନ ଜିଲ୍ଲା ପାଇଁ ନିର୍ଦ୍ଧାରିତ ହୋଇଛି
-ଏଥନିକ ମାଇନରିଟି ଭଳି ସାନ୍ତାଳ, ପାଖୋ, ତ୍ରିପୁରୀ ଚକମା ଓ ଖାସିଙ୍କ ପାଇଁ ୬ ପ୍ରତିଶତ ସଂରକ୍ଷଣ ବ୍ୟବସ୍ଥା ରହିଛି। ହିନ୍ଦୁ ମାନଙ୍କ ପାଇଁ ଭିନ୍ନ ଭାବେ ସଂରକ୍ଷଣ ନାହିଁ
-ମୋଟ ୫୬ ପ୍ରତିଶତ ସଂରକ୍ଷଣ ମାଧ୍ୟମରେ ଚାକିରି ଦିଆଯାଇଥାଏ। ମାତ୍ର ୪୪ ପ୍ରତିଶତ ମେଧା ତାଲିକାରୁ ଚୟନ କରାଯାଏ