ଗତ କିଛି ମାସ ତଳେ ଫିଲ୍ମ ରାମାୟଣର କିଛି ଫଟୋ ସୋସିଆଲ ମିଡ଼ିଆରେ ଭାଇରାଲ ହୋଇଥିଲା। ଏହା ପରେ ଫିଲ୍ମର ନିର୍ମାତା ସୁଟିଂ ସେଟର ସୁରକ୍ଷାକୁ କଡାକଡି କରିଥିଲେ । ବର୍ତ୍ତମାନ ଜୁନିଅର ଏନଟିଆର, ସେଫ ଅଲି ଖାନ ଏବଂ ଜାନଭୀ କପୁରଙ୍କ ଅଭିନୀତ ଫିଲ୍ମ ଦେବରା: ପାର୍ଟ ୱାନ ମଧ୍ୟ ସମାନ ସମସ୍ୟାର ସମ୍ମୁଖୀନ ହୋଇଛି। ଅନ୍ଲାଇନରେ ଜୁନିଅର ଏନଟିଆରଙ୍କ ଡାଇଲଗ ଲିକ୍ ହେବା ପରେ ସୋସିଆଲ ମିଡିଆରେ ଚଳଚିତ୍ରକୁ ନେଇ ବେଶ ଚର୍ଚ୍ଚା ଚାଲିଛି।

ଫିଲ୍ମର ଏକ ଗୁରୁତ୍ୱପୂର୍ଣ୍ଣ ଡାଇଲଗ ଲିକ୍ ହେବା ପରେ, ପ୍ରଡକ୍ସନ୍ ଦଳକୁ ସେଟରେ ସୁରକ୍ଷା ବ୍ୟବସ୍ଥାକୁ ନେଇ ଚିନ୍ତା ପ୍ରକଟ କରିଛନ୍ତି । ଏହି ଲିକ୍ ପରେ ନିର୍ମାତାମାନେ ସୁଟିଂ ସେଟରେ କାମକରୁଥିବା ଲୋକଙ୍କ ସଂଖ୍ୟା ମଧ୍ୟ କମାଇ ଦେଇଛନ୍ତି । ଏହା ସହ ସୁଟିଂ ସେଟରେ ମୋବାଇଲ ଫୋନ ମଧ୍ୟ ବାରଣ କରାଯାଇଛି । କେବଳ ଅତ୍ୟାବଶ୍ୟକ କର୍ମଚାରୀଙ୍କୁ ସୁଟିଂ ସେଟରେ ପ୍ରବେଶ କରିବାକୁ ଅନୁମତି ଦିଆଯାଇଛି ଏବଂ ଫିଲ୍ମର ଗୋପନୀୟତା ବଜାୟ ରଖିବା ପାଇଁ କଡା ନିୟମ କରାଯାଇଛି । ଏହି ଚଳଚ୍ଚିତ୍ର ସହିତ ସେଫ ଅଲି ଖାନ ଏବଂ ଜାନଭୀ କପୁର ତେଲୁଗୁ ସିନେମାରେ ଡେବ୍ୟୁ କରୁଛନ୍ତି।

ଦେବରା ପାର୍ଟ ୧ ରିଲିଜ ପାଇଁ ଆଉ ଅଳ୍ପ ଦିନ ବାକି ରହିଲା । ଏହି ଚଳଚ୍ଚିତ୍ର ଚଳିତ ବର୍ଷ ସେପ୍ଟେମ୍ବର ୨୭ ରେ ପ୍ରେକ୍ଷାଳୟରେ ମୁକ୍ତିଲାଭ କରିବ । ତେବେ ଖୁବ ଶୀଘ୍ର ଫିଲ୍ମର ପ୍ରମୋସନ ଆରମ୍ଭ ହେବ । ଦୀର୍ଘ ଦିନ ଧରି ଫିଲ୍ମର ଟ୍ରେଲର ରିଲିଜକୁ ପ୍ରଶଂସକମାନେ ଅପେକ୍ଷା କରି ରହିଥିଲେ। ନିକଟରେ ନିର୍ମାତାମାନେ ମଧ୍ୟ ଦେବରା ପାର୍ଟ ୧ ର ଏକ ଛୋଟ ଭିଡିଓ ରିଲିଜ କରିଥିଲେ, ଯାହାକୁ ବହୁତ ଭଲ ପ୍ରତିକ୍ରିୟା ମିଳିଥିଲା ।