ନୂଆଦିଲ୍ଲୀ: ଭାରତର କୁଖ୍ୟାତ ଡ୍ରଗ୍ ମାଫିଆ ସଲିମ ଡୋଲା, ଯାହାକୁ ଆନ୍ତର୍ଜାତୀୟ ଡ୍ରଗ୍ ନେଟୱାର୍କର ଜଣେ ବଡ଼ ଖେଳାଳି ବୋଲି ବିବେଚନା କରାଯାଏ, ତାକୁ ତୁର୍କୀରେ କାବୁ କରାଯାଇଛି। ତୁର୍କୀର ଇସ୍ତାମ୍ବୁଲରେ ଏମ୍‌ଆଇଟି (MIT) ଏବଂ ପୋଲିସର ମିଳିତ ଅଭିଯାନରେ ସଲିମ ଡୋଲାକୁ ଗିରଫ କରାଯାଇଛି। ସେ ଅଣ୍ଡରୱର୍ଲ୍ଡ ଡନ୍ ଦାଉଦ ଇବ୍ରାହିମର ଜଣେ ଘନିଷ୍ଠ ସହଯୋଗୀ ବୋଲି ଜଣାପଡ଼ିଛି। ଇଣ୍ଟରପୋଲ୍ ଦ୍ୱାରା ଖୋଜା ଚାଲିଥିବା ସଲିମ ଡୋଲା ନକଲି ୟୁଏଇ ଆଇଡି ସହ ଲୁଚି ରହିଥିଲା। ତା’ର ଗିରଫଦାରୀ ଅଣ୍ଡରୱର୍ଲ୍ଡ ସହ ଜଡ଼ିତ ଡ୍ରଗ୍ ନେଟୱାର୍କକୁ ଏକ ବଡ଼ ଝଟକା ଦେଇଛି। ସେ ଦୀର୍ଘ ଦିନ ଧରି ଆନ୍ତର୍ଜାତୀୟ ଡ୍ରଗ୍ ଚୋରା ଚାଲାଣ ନେଟୱାର୍କକୁ ପରିଚାଳନା କରୁଥିଲା। ସୂତ୍ର ଅନୁଯାୟୀ, ସଲିମ ଡୋଲା ଗ୍ଲୋବାଲ ସିନ୍ଥେଟିକ୍ ଡ୍ରଗ୍ ନେଟୱାର୍କ ସହ ଜଡ଼ିତ ଥିଲା ଏବଂ ଏହାର ଚେର ଅନେକ ଦେଶରେ ଲମ୍ବିଥିଲା। ସବୁଠାରୁ ଆଶ୍ଚର୍ଯ୍ୟଜନକ ବିଷୟ ହେଉଛି, ଏହି ଡ୍ରଗ୍ ରାକେଟର ସମ୍ପର୍କ ଭାରତର ମୋଷ୍ଟ ୱାଣ୍ଟେଡ୍ ଅଣ୍ଡରୱର୍ଲ୍ଡ ଡନ୍ ଦାଉଦ ଇବ୍ରାହିମର ନେଟୱାର୍କ ସହ ମଧ୍ୟ ଥିବା କୁହାଯାଉଛି।

ଦାଉଦ ଇବ୍ରାହିମର ଘନିଷ୍ଠ ସହଯୋଗୀ ସଲିମ ଡୋଲା

କୁଖ୍ୟାତ ଡ୍ରଗ୍ ମାଫିଆ ତଥା ଦାଉଦ ଇବ୍ରାହିମର ଘନିଷ୍ଠ ସହଯୋଗୀ ସଲିମ ଡୋଲା ପ୍ରଥମେ ମୁମ୍ବାଇ ଓ ପରେ ଦୁବାଇରୁ ତାର ସମ୍ପୂର୍ଣ୍ଣ ଡ୍ରଗ୍ ସିଣ୍ଡିକେଟ୍ ଚଳାଉଥିଲା। ଅଧିକାରୀଙ୍କ କହିବା ଅନୁସାରେ, ଇସ୍ତାମ୍ବୁଲରେ ତାକୁ ଟ୍ରାକ୍ କରାଯାଇଥିଲା, ଯେଉଁଠାରେ ସେ ଯୁକ୍ତରାଷ୍ଟ୍ର ଆରବ ଏମିରାତ (UAE) ର ନକଲି ପରିଚୟ ପତ୍ର ବ୍ୟବହାର କରି ଲୁଚି ରହିଥିଲା। କୁହାଯାଉଛି ଯେ ଇଣ୍ଟରପୋଲ୍ ଏବଂ ଗ୍ଲୋବାଲ ପୋଲିସିଂ ସଂସ୍ଥା ମଧ୍ୟ ତାକୁ ଖୋଜୁଥିଲେ। ସେ ନକଲି ଦସ୍ତାବିଜ୍ ବ୍ୟବହାର କରି ବିଭିନ୍ନ ଅଞ୍ଚଳରେ ବୁଲୁଥିଲା।

୨୦୨୫ରେ ପୁଅ ସମେତ ପରିବାରର ୪ ସଦସ୍ୟ ଗିରଫ

୨୦୨୫ ଅକ୍ଟୋବରରେ ମୁମ୍ବାଇ କ୍ରାଇମ ବ୍ରାଞ୍ଚ ସଲିମ ଡୋଲାର ପ୍ରମୁଖ ସହଯୋଗୀ ମହମ୍ମଦ ସଲିମ ସୋହେଲ ଶେଖକୁ ଦୁବାଇରୁ ଭାରତ ଆଣିଥିଲା। ସେହିପରି ନଭେମ୍ବର ୨୦୨୫ରେ ମୁମ୍ବାଇ ପୋଲିସ ସଲିମ ଡୋଲାର ପୁଅ ତାହିର ଡୋଲା ସମେତ ତାର ପରିବାରର ଚାରି ଜଣ ସଦସ୍ୟଙ୍କୁ ଦୁବାଇରୁ ଭାରତ ଆଣି ଗିରଫ କରିଥିଲା।

ବ୍ୟବସାୟୀ ସୁଧୀର ହତ୍ୟାକାଣ୍ଡର ରହସ୍ୟ ଖୋଲିବ କି? ଆଜିଠୁ ୩ ଦିନିଆ ରିମାଣ୍ଡରେ ଯିବେ ଅଭିଯୁକ୍ତ, ‘ସାଇଲେଣ୍ଟ୍ ମାଷ୍ଟରମାଇଣ୍ଡ୍’କୁ ଖୋଜୁଛି ପୋଲିସ

ସଲିମ ଡୋଲା ଉପରେ ୧ ଲକ୍ଷ ଟଙ୍କାର ପୁରସ୍କାର

ନାରକୋଟିକ୍ସ କଣ୍ଟ୍ରୋଲ ବ୍ୟୁରୋ (NCB) ସଲିମ ଡୋଲା ଉପରେ ୧ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଛି। ଏହା ସହିତ ତା’ ବିରୋଧରେ ରେଡ୍ କର୍ନର୍ ନୋଟିସ୍ ମଧ୍ୟ ଜାରି କରାଯାଇଛି। ସୂତ୍ର ଅନୁଯାୟୀ, ସଲିମ ଡୋଲା ଦୁବାଇରୁ ହିଁ ତାର ନେଟୱାର୍କକୁ କଣ୍ଟ୍ରୋଲ କରୁଥିଲା ଏବଂ ଭାରତରେ ଡ୍ରଗ୍ସ ସପ୍ଲାଏ କରିବାର ଏକ ବଡ଼ ଚ୍ୟାନେଲ ସମ୍ଭାଳୁଥିଲା। ସୁରକ୍ଷା ଏଜେନ୍ସିଙ୍କ କହିବା ମୁତାବକ, ତା’ ପାଖରେ ସାଉଦି ଆରବର ପାସପୋର୍ଟ ଅଛି।

ଡୋଲାର ଗିରଫଦାରୀରୁ ବଡ଼ ଖୁଲାସା ହେବାର ଆଶା

ଯେହେତୁ ସେ ଯେଉଁ ଦେଶରେ ଧରାପଡ଼ିଛି, ସେଠାରୁ ସଲିମ ଡୋଲାକୁ ଭାରତକୁ ପ୍ରତ୍ୟର୍ପଣ କରିବା ସହଜ ନୁହେଁ। ତେଣୁ ସୁରକ୍ଷା ଏଜେନ୍ସିଗୁଡ଼ିକ ଆନ୍ତର୍ଜାତୀୟ ମଞ୍ଚରେ ୟୁଏଇ (UAE) ଜରିଆରେ ତାକୁ ଭାରତ ଆଣିବା ପାଇଁ ଚେଷ୍ଟା କରୁଛନ୍ତି। ସୁରକ୍ଷା ଏଜେନ୍ସିଙ୍କ ମତରେ ସଲିମ ଡୋଲାର ଗିରଫଦାରୀରୁ ଅନେକ ବଡ଼ ଖୁଲାସା ହେବାର ସମ୍ଭାବନା ଅଛି, ଯାହା ଦ୍ୱାରା ସମ୍ପୂର୍ଣ୍ଣ ନେଟୱାର୍କର ପର୍ଦ୍ଦାଫାଶ ହୋଇପାରିବ। ମୁମ୍ବାଇ ପୋଲିସ ମଧ୍ୟ ସଲିମ ଡୋଲା ବିରୋଧରେ ଆରସିଏନ୍ (RCN) ଜାରି କରିଛି। ସେ ମୂଳତଃ ମୁମ୍ବାଇର ବାସିନ୍ଦା। ସୁରକ୍ଷା ଏଜେନ୍ସିଙ୍କ ଅଧିକାରୀଙ୍କ କହିବା ଅନୁସାରେ, ସଲିମ ଡୋଲାର ପିତା ଦାଉଦ ଇବ୍ରାହିମ ସହ ଦୀର୍ଘ ଦିନ ଧରି ମୁମ୍ବାଇରେ କାମ କରିଥିଲେ ଏବଂ ପରେ ସଲିମ ଦୁବାଇରେ 'ଡି-କମ୍ପାନୀ' ପାଇଁ କାମ କରିବା ଆରମ୍ଭ କଲା।