ନୂଆଦିଲ୍ଲୀ: ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ଯୁଦ୍ଧ ଯୋଗୁଁ ମଧ୍ୟପ୍ରାଚ୍ୟ ବଜାର ଅସ୍ଥିର ହୋଇ ପଡ଼ିଛି। ଯୁଦ୍ଧର ପ୍ରଭାବ କେବଳ ଅଶୋଧିତ ତୈଳ ଏବଂ ସେୟାର ବଜାର ପର୍ଯ୍ୟନ୍ତ ସୀମିତ ନୁହେଁ, ବରଂ ଏହା ତରଳୀକୃତ ପ୍ରାକୃତିକ ଗ୍ୟାସ (LNG) ର ମୂଲ୍ୟକୁ ମଧ୍ୟ ପ୍ରଭାବିତ କରୁଛି। ଏହାର ଅର୍ଥ ହେଉଛି ଯଦି ପରିସ୍ଥିତି ସ୍ଵାଭାବିକ ନ ହୁଏ, ତେବେ ଆଗାମୀ ମାସଗୁଡ଼ିକରେ ଏହି ସାମଗ୍ରୀଗୁଡିକରେ ଦର ବୃଦ୍ଧି ଅହେତୁକ ଦେଖାଯିବ। ଏହାର ପ୍ରଭାବ ବିଶେଷ ଭାବରେ ଭାରତ ସମେତ ୟୁରୋପ ଏବଂ ଏସିଆର ଦେଶଗୁଡ଼ିକରେ ଅନୁଭୂତ ହେବ। ସରକାରୀ ସୂତ୍ର ଅନୁଯାୟୀ ଅଶୋଧିତ ତୈଳ, LPG ଏବଂ LNG  ଭଣ୍ଡାର ମହଜୁଦ ରହିଛି। ଅଶୋଧିତ ତୈଳ ସଂରକ୍ଷଣ ସହିତ ୨୫ ଦିନର ଉତ୍ପାଦ ସଂରକ୍ଷଣ ଅଛି, ଯେଉଁଥିରେ ପରିବହନରେ କାର୍ଗୋ ସାମିଲ। 

ଇସ୍ରାଏଲ ଏବଂ ଆମେରିକାର ମିଳିତ ଅଭିଯାନରେ ଇରାନର ସର୍ବୋଚ୍ଚ ନେତା, ଆୟାତୋଲ୍ଲା ଖାମେନିଙ୍କ ମୃତ୍ୟୁ ହୋଇଛି। ଏହି ସମୟରେ, ଇରାନ ହର୍ମୁଜ୍ ପ୍ରଣାଳୀକୁ ବନ୍ଦ କରିଦେଇଛି। ଏହା ସହ କହିଛି ଇରାନ ତେଲର ଗୋଟିଏ ବୁନ୍ଦା ମଧ୍ୟ ହୋର୍ମୁଜ ଜଳମାର୍ଗ ଦେଇ ଯିବାକୁ ଦେବ ନାହିଁ। ଇରାନର ଧମକ ପରେ, ବିଶ୍ୱବ୍ୟାପୀ ତୈଳ ଯୋଗାଣ ହ୍ରାସ ପାଇବ ଏବଂ ମୂଲ୍ୟ ମଧ୍ୟ ବୃଦ୍ଧି ପାଇବ।

ହର୍ମୁଜ୍ ପ୍ରଣାଳୀ ବନ୍ଦ ହେବା ଭାରତକୁ କିପରି ପ୍ରଭାବିତ କରିବ?

ଇରାନର ଏହି ନିଷ୍ପତ୍ତି ଭାରତକୁ କିପରି ପ୍ରଭାବିତ କରିବ? ଏହି ରାସ୍ତା ଦେଇ ଭାରତର ୨୦ ପ୍ରତିଶତ ଅଶୋଧିତ ତୈଳ ଆମଦାନୀ ଏବଂ ରପ୍ତାନି ପରିଚାଳନା କରାଯାଏ। ଏହି ରାସ୍ତା ଦେଇ ଭାରତର ୪୦ ପ୍ରତିଶତ ତେଲ ଏବଂ ୫୦ ପ୍ରତିଶତ ଗ୍ୟାସ ପରିବହନ ହୁଏ। ତେଣୁ, ଏହି ରାସ୍ତା ବନ୍ଦ ହେବା ଭବିଷ୍ୟତରେ ଭାରତ ପାଇଁ ସମସ୍ୟା ସୃଷ୍ଟି କରିପାରେ। ଇରାନ ଆମେରିକାକୁ ସମର୍ଥନ କରୁଥିବା ଉପସାଗରୀୟ ଦେଶଗୁଡ଼ିକୁ ମଧ୍ୟ ଆକ୍ରମଣ କରିଛି। ଏପରିକି ସେମାନଙ୍କର ରିଫାଇନାରୀଗୁଡ଼ିକୁ ଆକ୍ରମଣ କରିଛି। ଅଶୋଧିତ ତୈଳର ମୂଲ୍ୟ ବର୍ତ୍ତମାନ ପ୍ରତି ବ୍ୟାରେଲ ୭୮.୫୨ ଡଲାରରେ ପହଞ୍ଚିଛି। ଏହା ବ୍ୟତୀତ, ଏକ LNG ଟ୍ୟାଙ୍କରର ମୂଲ୍ୟ ପ୍ରାୟ ୨ ଲକ୍ଷ ଡଲାର ରହିଛି। 

ଯଦି ଯୁଦ୍ଧ ଅଧିକ ଦିନ ଦରି ଚାଲେ ତେବେ ଭାରତ ପାଇଁ ଅସୁବିଧା ବଢ଼ିପାରେ। ଏପରି ପରିସ୍ଥିତିରେ, ଭାରତ ପୁଣି ରୁଷରୁ ତେଲ କ୍ରୟ ବୃଦ୍ଧି କରିପାରେ। ରୁଷରୁ ତେଲ କିଣିବା ଭାରତ ପାଇଁ ଏକ ଶସ୍ତା ବିକଳ୍ପ। 

ଜନତାଙ୍କ ଆଶ୍ୱସ୍ତି ଆଇଁ ତୈଳ ଦର ବୃଦ୍ଧି ହେବ ନାହିଁ କେନ୍ଦ୍ର ସରକାରଙ୍କ ସୂତ୍ରରୁ ସୂଚନା ମିଳିଛି। ଏହି ସମୟରେ ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି କରିବାର କୌଣସି ଉଦ୍ଦେଶ୍ୟ ନାହିଁ ବୋଲି କୁହାଯାଉଛି। ସୂତ୍ର ଅନୁଯାୟୀ, ଅନ୍ତର୍ଜାତୀୟ ବଜାରରେ ହ୍ରାସ ସତ୍ତ୍ୱେ ଘରୋଇ ସ୍ତରରେ ସ୍ଥିର ମୂଲ୍ୟ ବଜାୟ ରଖିବା ପାଇଁ ପ୍ରୟାସ କରାଯାଉଛି।