ଭୁବନେଶ୍ୱର: ସାହାଯ୍ୟ ବାହାନାରେ ଯୁବାତୀଙ୍କୁ ଅସଦାଚରଣ କରିବା ପୋଲିସ ବାବୁଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇଛି । ଭୁବନେଶ୍ୱର ଆରପିଏଫର ଏଏସ୍ଆଇ ନିରଞ୍ଜନ ଜେନା ଗିରଫ ହୋଇଛନ୍ତି । ଜିଆରପି ଥାନା ପୋଲିସ ତାଙ୍କୁ ଗିରଫ କରିଛି ।  

ଅଭିଯୋଗ ଅନୁଯାୟୀ, ଯୁବତୀ ଜଣକର ଘର ଜଗତସିଂପୁର ଜିଲ୍ଲା ହୋଇଥିବା ବେଳେ ସେ ଭୁବନେଶ୍ୱରର ଏକ ହଷ୍ଟେଲରେ ରହୁଥିଲେ । ଦୁଇ ଦିନ ତଳେ ସେ ଜଗତସିଂହପୁରରୁ ଭୁବନେଶ୍ୱରକୁ ଟ୍ରେନକୁ ଆସିଥିଲେ । ଷ୍ଟେସନରେ ଓହ୍ଲାଇ ହଷ୍ଟେଲ ଯାଇଥିଲେ । ମାତ୍ର ହଷ୍ଟେଲ ବନ୍ଦ ଥିବାରୁ ସେ ଜିଆରପି ଥାନାକୁ ଆସିଥିଲେ । ସେତେବେଳେ କାର୍ଯ୍ୟରତ ଥିବା ଏଏସ୍ଆଇ ନିରଞ୍ଜନ ଜେନା ଯୁବତୀଙ୍କୁ ଏକ ରୁମ୍‌ରେ ରହିବା ପାଇଁ ପରାମର୍ଶ ଦେଇଥିଲେ । ଯୁବତୀ ଉକ୍ତ ରୁମରେ ରହିବା ପରେ ଏଏସ୍ଆଇ ତାଙ୍କୁ ଏକୁଟିଆ ପାଇ ଅସଦାଚରଣ କରିଥିଲେ । ଯୁବତୀ ଜଣକ ତୁରନ୍ତ ପିସିଆରକୁ ଫୋନ କରିବା ପରେ ତାଙ୍କୁ ଉଦ୍ଧାର କରାଯାଇଥିଲା । ଯୁବତୀ ଏ ନେଇ ଜିଆରପି ଥାନା ଲିଖିତ ଅଭିଯୋଗ କରିଥିଲେ । ପୋଲିସ ମାମଲାର ତଦନ୍ତ କରି ଏଏସ୍ଆଇଙ୍କୁ ଗିରଫ କରିଛି ।