ନୂଆଦିଲ୍ଲୀ: ଓଡ଼ିଶାର ପ୍ରଖ୍ୟାତ ଶିକ୍ଷାବିଦ ପ୍ରଫେସର ଶାନ୍ତନୁ କୁମାର ସ୍ୱାଇଁଙ୍କୁ ସିକ୍କିମ ବିଶ୍ୱବିଦ୍ୟାଳୟର ନୂତନ କୁଳପତି ଭାବରେ ନିଯୁକ୍ତି ପାଇଛନ୍ତି । ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଦ୍ୱାରା ବିଶ୍ୱବିଦ୍ୟାଳୟର ଭିଜିଟର ଭାବରେ କରାଯାଇଛି । ସେ ଆଗାମୀ ପାଞ୍ଚ ବର୍ଷ କିମ୍ବା  ୭୦ ବର୍ଷ ହେବା ଯାଏ ଏହି ଦାୟିତ୍ୱ ତୁଲାଇବେ । ଏ ନେଇ କେନ୍ଦ୍ର ଶିକ୍ଷା ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି । 

ପ୍ରଫେସର ସ୍ୱାଇଁ ବର୍ତ୍ତମାନ ସିକ୍କିମ ବିଶ୍ୱବିଦ୍ୟାଳୟର କାର୍ଯ୍ୟକାରୀ କୁଳପତି ଥିବା ପ୍ରଫେସର ଅଭିଜିତ ଦତ୍ତଙ୍କଠାରୁ ଦାୟିତ୍ୱ ଗ୍ରହଣ କରିବେ । ଶିକ୍ଷା ମନ୍ତ୍ରଣାଳୟ ଏହି ନିଯୁକ୍ତି ସମ୍ପର୍କରେ ରାଷ୍ଟ୍ରପତିଙ୍କ ସଚିବାଳୟ, ବିଶ୍ୱବିଦ୍ୟାଳୟ ଅନୁଦାନ ଆୟୋଗ (UGC), ଏବଂ ଭାରତୀୟ ବିଶ୍ୱବିଦ୍ୟାଳୟ ସଂଘ (AIU) ସମେତ ସମସ୍ତ ସମ୍ପୃକ୍ତ କର୍ତ୍ତୃପକ୍ଷଙ୍କୁ ଆନୁଷ୍ଠାନିକ ଭାବରେ ସୂଚିତ କରିଛି । ଜଣେ ଅଧିକାରୀ କହିଛନ୍ତି ଯେ ସ୍ୱାଇଁଙ୍କ ନିଯୁକ୍ତି ଏକ ଗୁରୁତ୍ୱପୂର୍ଣ୍ଣ ସମୟରେ ଆସିଛି ଯେତେବେଳେ ସିକ୍କିମ୍ ବିଶ୍ୱବିଦ୍ୟାଳୟ ପୂର୍ବ ହିମାଳୟ ଅଞ୍ଚଳରେ ଶିକ୍ଷା ଏବଂ ଗବେଷଣା ଉତ୍କର୍ଷତାରେ ବୃଦ୍ଧି ପାଇବାରେ ଲାଗିଛି ।

ପ୍ରଫେସର ଶାନ୍ତନୁ କୁମାର ସ୍ୱାଇଁ ପୁରୀ ଜିଲ୍ଲାର ରୁଷିପଡ଼ା ଗାଁର ମୂଳ ବାସିନ୍ଦା ଅଟନ୍ତି । ସେ ଦୀର୍ଘ ୪୩ ବର୍ଷ ହେବ ଶିକ୍ଷାଦାନ କରି ଆସୁଛନ୍ତି । ବର୍ତ୍ତମାନ ସେ ବନାରସ ହିନ୍ଦୁ ବିଶ୍ୱବିଦ୍ୟାଳୟ, ବାରାଣସୀର ଶିକ୍ଷା ସଂକାୟରେ ପ୍ରମୁଖ ଓ ଡିନ୍‌ ଭାବରେ କାର୍ଯ୍ୟ କରିସାରିଛନ୍ତି । ବିଏଚୟୁରେ କାର୍ଯ୍ୟକାଳ ମଧ୍ୟରେ ଅନେକ ପରିବର୍ତ୍ତନ ଆଣିଛନ୍ତି । ତାଙ୍କ ତତ୍ୱାବଧାନରେ ୬୭ ରୁ ଅଧିକ ଗବେଷକ ପିଏଚ୍‌ଡି ଉପାଧି ଅର୍ଜନ କରିଛନ୍ତି । ଏହା ପୂର୍ବରୁ କୋରାପୁଟସ୍ଥିତ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ, ଶିକ୍ଷା ପରିଷଦର ସଦସ୍ୟ ଭାବେ କାର୍ଯ୍ୟ କରିସାରିଛନ୍ତି । 

ପ୍ରଫେସର ସ୍ୱାଇଁଙ୍କ ଶିକ୍ଷାଗତ ଯୋଗ୍ୟତା ଦେଖିବାକୁ କଲେ ଏମ୍ଏରେ ସ୍ୱର୍ଣ୍ଣ ପଦକ, ଏମ୍.ଫିଲ., ପିଏଚ.ଡି, ଓ ଡିଏଲଟିଟି (ଶିକ୍ଷା) ଏବଂ ଇଂଲଣ୍ଡର ଲିଡ୍ସ ବିଶ୍ୱବିଦ୍ୟାଳୟରୁ ଇପିପିଏମ୍ ଡିଗ୍ରୀ ହାସଲ କରିଛନ୍ତି । ସେହିପରି ୟୁନେସ୍କୋ, ଆଇଆଇଇପି, ଓଇସିଡି, ବିଶ୍ୱ ବ୍ୟାଙ୍କ (ପ୍ୟାରିସ୍), ଓ ଆଇବିଇ (ଜିନେଭା) ଭଳି ଆନ୍ତର୍ଜାତୀୟ ସଂସ୍ଥାଗୁଡିକ ସହିତ କାମ କରି ଅନେକ ଅଭିଜ୍ଞତା ସାଉଁଟିଛନ୍ତି ।