ଭୁବନେଶ୍ୱର: ମେଟ୍ରୋ ପାଇଁ ରାଜଧାନୀଙ୍କ ମନରେ ଆଉ ଏକ ନୂଆ ଆଶା ଉଜ୍ଜୀବୀତ ହୋଇଛି । ମେଟ୍ରୋ ପ୍ରକଳ୍ପ ପାଇଁ କେନ୍ଦ୍ର ସରକାରଙ୍କୁ ପ୍ରସ୍ତାବ ଦିଆଯିବ । ଏ ନେଇ ଗୁରୁବାର ସୂଚନା ଦେଇଛନ୍ତି ଗ୍ରାମ୍ୟ ଓ ନଗର ଉନ୍ନୟନ ମନ୍ତ୍ରୀ କୃଷ୍ଣଚନ୍ଦ୍ର ମହାପାତ୍ର । 

ମେଟ୍ରୋ ପ୍ରକଳ୍ପ ନେଇ ଆଜି ମନ୍ତ୍ରୀ ସ୍ତରୀୟ ଏକ ସବ୍ କମିଟି ବୈଠକ ଅନୁଷ୍ଠିତ ହୋଇଯାଇଛି । ନୂଆ ଢାଞ୍ଚାରେ ମେଟ୍ରୋ ପାଇଁ କେନ୍ଦ୍ର ସରକାରଙ୍କୁ ପ୍ରସ୍ତାବ ଦିଆଯିବ । ଏଥିପାଇଁ ଏକ ବୈଷୟିକ କମିଟି ଗଠନ ହେବ । ଏହି କମିଟି ବିଭିନ୍ନ ସହରକୁ ଯାଇ ସ୍ଥିତି ଅନୁଧ୍ୟାନ କରିବା ପରେ ନୂଆ ଟ୍ରାକ୍ ନେଇ କମିଟି ରିପୋର୍ଟ ଦେବ । କମ୍ପ୍ରେହେନସିଭ୍ ମୋବିଲିଟି ପ୍ଲାନ୍ ତିଆରି ହୋଇଛି । କେଉଁ ଲାଇନ୍‌ରେ ଯିବ ଏବଂ କେଉଁଠି ପାର୍କିଂ ଅଞ୍ଚଳ ହେବ ଏଥିପାଇଁ କମିଟି ରିପୋର୍ଟ ଦେବ । ଏଥିପାଇଁ ସ୍ଥାନୀୟ ଲୋକ ଏବଂ ଗଣମାଧ୍ୟମଙ୍କ ମଧ୍ୟ ମତାମତ ନିଆଯିବ ବୋଲି ମନ୍ତ୍ରୀ କହିଛନ୍ତି । 

ଏଠାରେ ଉଲ୍ଲେଖ ଯୋଗ୍ୟ, ରାଜଧାନୀବାସୀ ମେଟ୍ରୋକୁ ନେଇ ଯେଉଁ ଖୁସି ହେଉଥିଲେ ତାହା ମଉଳି ଯାଇଥିଲା । ବିଜେଡ଼ି ସରକାର ସମୟରେ ମେଟ୍ରୋ ପ୍ରକଳ୍ପର କାର୍ଯ୍ୟ ଆରମ୍ଭ ହୋଇଥିଲା । ପୂର୍ବ ସରକାର କହିଥିଲେ ନିଜ ଅର୍ଥର ପ୍ରକଳ୍ପ କାମ ହେବ ବୋଲି କୁହାଯାଉଥିଲା । କିନ୍ତୁ ସରକାର ବଦଳିବା ପରେ କେନ୍ଦ୍ର ସରକାରଙ୍କ ଅନୁଦାନ ନିଆଯିବ ବୋଲି କହିଥିଲେ । ତେବେ ଲୋକସଭାରେ ଏକ ପ୍ରଶ୍ନରେ କେନ୍ଦ୍ର ମନ୍ତ୍ରୀ ଉତ୍ତର ରଖିଥିଲେ ଯେ ରାଜ୍ୟ ସରକାରଙ୍କ ପକ୍ଷରୁ କୌଣସି ପ୍ରସ୍ତାବ ଦିଆଯାଇନଥିଲା । ତେବେ ଏଥିପାଇଁ ସମସ୍ତ ପୁରୁଣା ଟେଣ୍ଡର ପ୍ରକ୍ରିୟା ସରକାର ବାତିଲ କରିଛନ୍ତି ।