ଜବଲପୁର: ମଧ୍ୟପ୍ରଦେଶର ଜବଲପୁର ଜିଲ୍ଲାର ବରଗୀ ଡ୍ୟାମରେ ଏକ ବଡ଼ ଦୁର୍ଘଟଣା ଘଟିଛି। ୨୦ ବର୍ଷ ପୁରୁଣା ଏକ ଏମପି ପର୍ଯ୍ୟଟନ କ୍ରୁଜ୍ ଜାହାଜ ହଠାତ୍ ଡ୍ୟାମରେ ବୁଡ଼ି ଯାଇଛି। ଗୁରୁବାର ସନ୍ଧ୍ୟା ପ୍ରାୟ ସାଢ଼େ ୬ଟାରେ ଘଟିଥିବା ଏହି ଘଟଣାରେ ୪ ଜଣଙ୍କ ମୃତ୍ୟୁ ଘଟିଛି। ଘଟଣାରେ ଅନେକ ନିଖୋଜ ଥିବା ବେଳେ ୧୫ ଜଣଙ୍କୁ ସକୁଶଳ ଉଦ୍ଧାର କରାଯାଇଛି। ଏହି ଘଟଣା ପରେ ପୋଲିସ ଏବଂ ପ୍ରଶାସନ ଅଧିକାରୀ, ଏସଡିଆରଏଫ, ମ୍ୟୁନିସିପାଲ କର୍ପୋରେସନ,ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ତଦାରଖ କରିଛନ୍ତି। 

ସୂଚନା ଅନୁଯାୟୀ, ଡଙ୍ଗାରେ ପ୍ରାୟ ୨୯ ଜଣ ପର୍ଯ୍ୟଟକ ଏବଂ ଦୁଇ ଜଣ କ୍ରୁ ସଦସ୍ୟ ଥିଲେ, ଯେଉଁମାନଙ୍କ ମଧ୍ୟରୁ ଏପର୍ଯ୍ୟନ୍ତ ଚାରି ଜଣଙ୍କ ମୃତଦେହ ଉଦ୍ଧାର କରାଯାଇଛି। ପନ୍ଦର ଜଣଙ୍କୁ ଜୀବିତ ଉଦ୍ଧାର କରାଯାଇଛି। ଅନ୍ୟ ୧୧ ଜଣ ନିଖୋଜ ଅଛନ୍ତି। ସେମାନଙ୍କୁ ଉଦ୍ଧାର କରିବା ପାଇଁ ହାଇଦ୍ରାବାଦରୁ ଏକ ସେନା ହେଲିକପ୍ଟର ଆସୁଛି।  

ପ୍ରତ୍ୟକ୍ଷଦର୍ଶୀ ଅରବିନ୍ଦ ଯାଦବ କହିଛନ୍ତି ଯେ ସେତେବେଳେ ଝଡ଼ ବହୁତ ପ୍ରବଳ ଥିଲା ଏବଂ ଢେଉ ଏତେ ଉଚ୍ଚ ଥିଲା ଯେ ଡଙ୍ଗାଟି ପ୍ରାୟ ଅଧା ବୁଡ଼ି ଯାଇଥିଲା। ପାଣି ଭିତରକୁ ଯିବା ମଧ୍ୟ ବହୁତ କଷ୍ଟକର ଥିଲା ତଥାପି ଚେଷ୍ଟା କରି ଅନେକ ଜୀବନ ବଞ୍ଚାଇଥିଲେ। ସେମାନେ ବିହାରର ବାସିନ୍ଦା ଏବଂ ଏଠାରେ କାମ କରୁଥିଲେ। ଡଙ୍ଗା ବୁଡ଼ିବା ଦେଖିବା ମାତ୍ରେ ସେମାନେ ତୁରନ୍ତ ଘଟଣାସ୍ଥଳକୁ ଯାଇ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ତାଙ୍କ ଦଳରେ ପାଣିରେ ଅଭିଜ୍ଞତା ଥିବା ୧୦-୧୨୩ ଜଣ ଲୋକ ଥିଲେ। ସେମାନେ ଲାଇଫ୍ ଜ୍ୟାକେଟ୍, ଟ୍ୟୁବ୍ ଏବଂ ରସି ବ୍ୟବହାର କରି ଲୋକଙ୍କୁ ବାହାର କରିଥିଲେ।

ଆଉ ଜଣେ ପ୍ରତ୍ୟକ୍ଷଦର୍ଶୀ ଶ୍ୟାମ କହିଛନ୍ତି ଯେ ଝଡ଼ ଆରମ୍ଭ ହେବା ମାତ୍ରେ ସେମାନେ ସେମାନଙ୍କର କାମ ବନ୍ଦ କରିଦେଇଥିଲେ। ଜଣେ ସହକର୍ମୀ ଡଙ୍ଗାଟି ବୁଡ଼ିବାର ଭିଡିଓ କରୁଥିଲେ। ଯେଉଁମାନେ ପହଁରି ଜାଣିଥିଲେ ଏବଂ ତୁରନ୍ତ ପାଣି ଭିତରକୁ ପଶି ଉଦ୍ଧାର କାର୍ଯ୍ୟ ଆରମ୍ଭ କରିଲେ। ସେମାନେ ଯଥାସମ୍ଭବ ଲୋକଙ୍କୁ ଉଦ୍ଧାର କରିଥିଲେ, କିନ୍ତୁ ଡଙ୍ଗାଟି ସମ୍ପୂର୍ଣ୍ଣ ବୁଡ଼ି ଯାଇଥିଲା। ଫଳରେ ଆଗକୁ ବଢ଼ିବା ଅସମ୍ଭବ ହୋଇ ପଡ଼ିଥିଲା। ପରେ, ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚିଲେ। 

ଘଟଣାସ୍ଥଳରେ SDRF ଦଳ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି। ସେନା କର୍ମଚାରୀଙ୍କୁ ମଧ୍ୟ ଡକାଯାଇଛି। ସ୍ଥାନୀୟ ବିଧାୟକ ନୀରଜ ସିଂହ କହିଛନ୍ତି ଯେ କ୍ରୁଜ୍ ଏଠାରେ ବହୁ ବର୍ଷ ଧରି କାର୍ଯ୍ୟ କରୁଛି। ଏହା ପ୍ରତିଦିନ ଅନେକ ଥର ଯାତ୍ରା କରିଥାଏ, ପର୍ଯ୍ୟଟକଙ୍କୁ ଭ୍ରମଣ କରାଇଥାଏ। ଆଜି ସନ୍ଧ୍ୟା ୬ଟା ୩୦ ରେ ଗନ୍ତବ୍ୟସ୍ଥଳକୁ ଫେରିବା ସମୟରେ କ୍ରୁଜ୍ ଟି ଓଲଟି ପଡ଼ିଥିଲା। ବୁଡ଼ିବାର କାରଣ କଣ ତାହା କହିବା ବହୁତ ଶୀଘ୍ର ହେବ। ବିସ୍ତୃତ ତଦନ୍ତ ପରେ ଏହା ସ୍ପଷ୍ଟ ହେବ।