ଭୁବନେଶ୍ୱର: ଓଡିଶା ବିଧାନସଭାରେ ନୂତନ ୱେବସାଇଟର ଉଦଘାଟନ ହୋଇଛି ।  ବିଧାନସଭା ବାଚସ୍ପତି ସୁରମା ପାଢ଼ୀ ନୂଆ ୱେବ୍ ସାଇଟ୍ www.assembly.odisha.gov.in କୁ ଉଦଘାଟନ କରିଛନ୍ତି । 

ଏହି ଅବସରରେ ବାଚସ୍ପତି ଶ୍ରୀମତୀ ପାଢ଼ୀ କହିଛନ୍ତି, ଅଧିକ ସ୍ୱଚ୍ଛ ଓ ଦକ୍ଷଶାସନ ଦିଗରେ ଯାତ୍ରାର ଏକ ଗୁରୁତ୍ୱପୂର୍ଣ ପଦକ୍ଷେପ ଆରମ୍ଭ ହେବ । ଓଡ଼ିଶା ସରକାର ଏନ୍ଆଇସିଟି (NICT) ବିଭାଗ ଓ ଭାରତ ସରକାର ଏନ୍ଆଇସି (NIC)ର ବୈଷୟିକ ପରାମର୍ଶ ଦ୍ୱାରା ଏହି ୱେବସାଇଟ ପ୍ରସ୍ତୁତ ହୋଇଛି। ବିଧାନସଭାର କାର୍ଯ୍ୟ ଧାରାକୁ ଜନସାଧାରଣଙ୍କ ପାଇଁ ଅଧିକ ସୁଗମ ଓ ସ୍ୱଚ୍ଛ କରିବାରେ ଏହା ଗୁରୁତ୍ୱପୂର୍ଣ ଭୂମିକା ଗ୍ରହଣ କରିବ। ନାଗରିକ ମାନଙ୍କୁ ବିଧାନସଭା ବିଷୟରେ ସଠିକ ସୂଚନା ଦେବ। 

୨୦୧୧ ମସିହା ପରଠାରୁ ଏହି ସାଇଟ ଅପଡେଟ ହୋଇନଥିଲା। ସୁଶାସନ ଓ ନାଗରିକ ସମ୍ପୃକ୍ତି ପାଇଁ ପ୍ରଯୁକ୍ତି ବିଦ୍ୟାର ଉପଯୋଗ ପ୍ରତି ସରକାରଙ୍କ ପ୍ରତିବଦ୍ଧତାର ଏକ ପ୍ରମାଣ । ଏଥିରେ ବିଧାନସଭାର ସମସ୍ତ ସଦସ୍ୟଙ୍କ ତଥ୍ୟ ଉପଲବ୍ଧ ରହିବ । ଏହା ଓଡ଼ିଶା ଲୋକଙ୍କ ସମ୍ପୃକ୍ତିକୁ ମଧ୍ୟ ପ୍ରୋତ୍ସାହିତ କରିବ । 

ସେହିପରି ଅଗଷ୍ଟ ୨୯ ଓ ୩୦ ତାରିଖରେ ଦୁଇଦିନ ଧରି ଓଡ଼ିଶାରେ ଜାତୀୟସ୍ତରୀୟ ଅନୁସୂଚିତ ଜାତି ଓ ଜନଜାତି କଲ୍ୟାଣ କମିଟିର ସମ୍ମିଳନୀ ଭୁବନେଶ୍ୱରରେ ଆୟୋଜିତ ହେବ । ସମ୍ମିଳନୀରେ ଲୋକସଭାର ବାଚସ୍ପତି, ରାଜ୍ୟସଭାର ଉପାଧ୍ୟାକ୍ଷ, ଅନୁସୂଚିତ ଜାତି ଓ ଜନଜାତି କଲ୍ୟାଣ କମିଟି କେନ୍ଦ୍ରୀୟ ଅଧ୍ୟକ୍ଷ, ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଥିବା କମିଟିର ଅଧ୍ୟକ୍ଷ ଓ ସଦସ୍ୟ ମାନେ ଯୋଗ ଦେବେ । ଓଡ଼ିଆ ଅତିଥି ରାଜ୍ୟ ଭାବରେ ଦାୟିତ୍ୱ ନେଇଛି । ଆଜି ଉଦଘାଟିତ ହୋଇଥିବା ନୂଆ ୱେବସାଇଟରେ ପାରିଲାମେଣ୍ଟ କମିଟି ଯୋଗ ଦେବାକୁ ଥିବା ସଦସ୍ୟଙ୍କ ନାମ ପଞ୍ଜିକରଣ କରିବେ ବୋଲି ବାଚସ୍ପତି ସୂଚନା ଦେଇଛନ୍ତି । ଏହି ଅବସରରେ ରାଜ୍ୟ ସଂସଦୀୟ ବ୍ୟପାର ମନ୍ତ୍ରୀ ଡାକ୍ତର ମୁକେଶ ମହାଲିଙ୍ଗ, ବିଧାନସଭା ସଚିବ ସତ୍ୟବ୍ରତ ରାଉତ ପ୍ରମୁଖ ଉପସ୍ଥିତ ଥିଲେ ।