ଭୁବନେଶ୍ୱର: ଆଜି ମଣ୍ଡପରେ ଚାଲିଛି ମା’ଙ୍କ ମହାଷ୍ଟମୀ ପୂଜା । ଏହି ଅବସରରେ ଉସ୍ଚବ ମୁଖର ହୋଇପଡ଼ିଛି ପୂଜା ମଣ୍ଡପ । ଏହି ଉପଲକ୍ଷେ ବିଜୁ ଜନତା ଦଳର ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ମା’ଙ୍କ ଦର୍ଶନ କରିଛନ୍ତି ।

ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ ଭୁବନେଶ୍ୱରର ବିଭିନ୍ନ ପୂଜା ମଣ୍ଡପ ବୁଲି ମା’ଙ୍କ ଦର୍ଶନ କରିଛନ୍ତି । ନବୀନ ପ୍ରଥମେ ରସୁଲଗଡ଼ ଦୁର୍ଗାପୂଜା ମଣ୍ଡପ ବୁଲି ମାଙ୍କ ଆଶୀର୍ବାଦ ନେବା କରିଥିଲେ । କମିଟି ପକ୍ଷରୁ ତାଙ୍କୁ ଭବ୍ୟ ସ୍ୱାଗତ କରାଯାଇଥିଲା। ଏହା ପରେ ସହିଦନଗର ପୂଜା ମଣ୍ଡପରେ ମା’ଙ୍କ ଦର୍ଶନ କରିଥିଲେ । ପରେ ବରଗଡ଼ ପୂଜା ମଣ୍ଡପ ଯାଇଥିଲେ । ନବୀନଙ୍କୁ ଟୁଇନ ସିଟିର ବିଭିନ୍ନ ପୂଜା କମିଟି ନିମନ୍ତ୍ରଣ କରିଥିବା ବେଳେ ଏହାକୁ ଗ୍ରହଣ କରି ପୂଜା ପେଣ୍ଡାଲ ବୁଲିବାକୁ କହିଥିଲେ ନବୀନ । ଏହି ସମୟରେ ସେ ଲୋକଙ୍କ ସହ କିଛି ବାର୍ତ୍ତାଳାପ କରିଥିବା ଦେଖିବାକୁ ମିଳିଥିଲା । 

ଆଜି ମୁଖ୍ୟମନ୍ତ୍ରୀ ମୋହନ ମାଝୀ ମଧ୍ୟ ବିଭିନ୍ନ ପୂଜା ମଣ୍ଡପ ବୁଲି ମାଙ୍କ ଆଶିଷ ଭିକ୍ଷା କରିଛନ୍ତି । ଭୁବନେଶ୍ୱର ପାଟଣା ସାହି ପୂଜା ମଣ୍ଡପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପହଞ୍ଚି ମାଆଙ୍କର ଆଳତି କରିଛନ୍ତି । ମୁଖ୍ୟମନ୍ତ୍ରୀଙ୍କୁ ଦେଖିବା ଲାଗି ସେଠାରେ ନାହିଁ ନ ଥିବା ଭିଡ଼ ପରିଲକ୍ଷିତ ହୋଇଥିଲା । ମୁଖ୍ୟମନ୍ତ୍ରୀ ଓଡ଼ିଶାର ସମସ୍ତ ଦୁର୍ଗା ପୂଜା ପେଣ୍ଡାଲର ଭଡ଼ା ଛାଡ଼ କରିବାକୁ ଘୋଷଣା କରିଛନ୍ତି । ଆସନ୍ତାକାଲି ମୁଖ୍ୟମନ୍ତ୍ରୀ କଟକ ଗସ୍ତ କରିବାର କାର୍ଯ୍ୟକ୍ରମ ରହିଛି ।