ନୂଆଦିଲ୍ଲୀ: ସ୍ୱଦେଶୀ ଜ୍ଞାନ କୌଶଳରେ ନିର୍ମିତ ତେଜସ୍ ଯୁଦ୍ଧ ବିମାନରେ କୌଣସି ତ୍ରୁଟି ନାହିଁ । ଏହା ଏକ ଉତ୍କୃଷ୍ଟ ବିମାନ । ଦୁବାଇ ଏୟାର ଶୋରେ ହୋଇଥିବା ଦୁର୍ଘଟଣା ଭବିଷ୍ୟତ ଉପରେ ପ୍ରଭାବ ପକାଇ ନାହିଁ ବୋଲି କହିଛନ୍ତି ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍ (HAL)ର ଅଧ୍ୟକ୍ଷ ଏବଂ ପରିଚାଳନା ନିର୍ଦ୍ଦେଶକ ଡିକେ ସୁନିଲ । 

ହାଲ୍ ଅଧ୍ୟକ୍ଷ ଶ୍ରୀଯୁକ୍ତ ସୁନିଲ ଏଏନଆଇର ଜାତୀୟ ସୁରକ୍ଷା ପ୍ରତିରକ୍ଷା ରପ୍ତାନୀ ଉପରେ ଅଭିଭାଷଣରେ ଦୁବାଇ ଏୟାର ଶୋ'ର ଶେଷ ଦିନରେ ଭାରତୀୟ ତେଜସ୍ ଯୁଦ୍ଧ ବିମାନର ଦୁର୍ଘଟଣାକୁ ଏକ ଦୁର୍ଭାଗ୍ୟପୂର୍ଣ୍ଣ ଦୁର୍ଘଟଣା ବୋଲି କହିଛନ୍ତି। ସେ ସ୍ପଷ୍ଟ କରିଛନ୍ତି ଯେ ଏହି ଘଟଣା ତେଜସ୍ ଭବିଷ୍ୟତର କାର୍ଯ୍ୟକ୍ରମକୁ ପ୍ରଭାବିତ କରିବ ନାହିଁ। ସେ କହିଛନ୍ତି ଯେ ତେଜସ୍ ଯୁଦ୍ଧ ବିମାନରେ କୌଣସି ତ୍ରୁଟି ନାହିଁ। ଏହା ଏକ ଉତ୍କୃଷ୍ଟ ବିମାନ। ଏହା ସମ୍ପୂର୍ଣ୍ଣ ସୁରକ୍ଷିତ ଏବଂ ବିଶ୍ୱରେ ସର୍ବୋତ୍ତମ ସୁରକ୍ଷା ରେକର୍ଡ ରହିଛି ବୋଲି କହିଛନ୍ତି । 

ତେଜସ୍ ଏଯାବତ୍ ମାତ୍ର ଦୁଇଥର ଦୁର୍ଘଟଣାର ଶୀକାର ହୋଇଛି । ଥରେ ଭାରତ ଭିତରେ ଏବଂ ଅନ୍ୟଟି ନିକଟରେ ଦୁବାଇ ଏୟାର ଶୋ କାର୍ଯ୍ୟକ୍ରମରେ । ବିଦେଶୀ ମାଟିରେ ଦୁର୍ଘଟଣାଗ୍ରସ୍ତ ହେବା ପରେ ଏହା ଅଧିକ ଚର୍ଚ୍ଚାକୁ ଆସିଛି । 

ହାଲ୍ ଅଧ୍ୟକ୍ଷ କହିଛନ୍ତି ଯେ ଯେତେବେଳେ କୌଣସି ଦେଶ ଆଗକୁ ବଢ଼ିବ ଏବଂ ନିଜସ୍ୱ ପ୍ରଯୁକ୍ତିବିଦ୍ୟା ବ୍ୟବହାର କରିବ, ସେତେବେଳେ ଏହାକୁ ଅନେକ ପର୍ଯ୍ୟାୟ ଦେଇ ଯିବାକୁ ପଡିବ। ଆଜି ଆମେ ନୂତନ କ୍ଷମତା ସହିତ ଏହି ୪.୫ ପିଢ଼ିର ବିମାନ ବିକଶିତ କରିଛୁ। ଏହା ଏକ ବିରାଟ ସଫଳତା। ଆମେ ସମସ୍ତେ ଏଥିରେ ଗର୍ବିତ । ଲୋକମାନେ ଅଭିଯୋଗ କରିପାରନ୍ତି ଏବଂ ଅନେକ ସମାଲୋଚନା କରିପାରନ୍ତି, କିନ୍ତୁ ଆମକୁ ପଛକୁ ହଟିବା ଉଚିତ୍ ନୁହେଁ । ବର୍ତ୍ତମାନ ଆମ ପାଖରେ ୧୮୦ ଟି ତେଜସ୍ ବିମାନ ଅଛି, ଏବଂ ଏହି ସଂଖ୍ୟା ବୃଦ୍ଧି ପାଇବ। ଏହି ବିମାନ ପାଇଁ ଆମର ଏକ ବଡ଼ ରପ୍ତାନି ବଜାର ମଧ୍ୟ ରହିବ ।

ହାଲ୍ ର ଭବିଷ୍ୟତ ଅର୍ଡର ବିଷୟରେ ଉଲ୍ଲେଖ କରି ସେ କହିଛନ୍ତି ଯେ ମାନବହୀନ ଯୁଦ୍ଧ ବିମାନ ଯାନ (U-CAV) - CATS ଯୋଦ୍ଧା  ଶୀଘ୍ର ସମାପ୍ତ ହେବ । ୨୦୨୬ ସୁଦ୍ଧା ପ୍ରସ୍ତୁତ ହେବ ଏବଂ ୨୦୨୭ ସୁଦ୍ଧା ଉଡ଼ାଣ ଆରମ୍ଭ କରିବ । ସେହିପରି ହାଲ୍  ୟୁଟିଲିଟି ହେଲିକପ୍ଟର ମେରିଟାଇମ୍ (UHM) ଉପରେ ମଧ୍ୟ କାମ କରୁଛି, ଯାହା ୨୦୨୭ରେ ଉଡ଼ାଣ ଆରମ୍ଭ କରିବ।