ପୁରୀ: ଜଣେ ମଦୁଆ ବାପାର ଜଘନ୍ୟ କାଣ୍ଡ ଦେଖିବାକୁ ମିଳିଛି । ନିଶାସକ୍ତ ଅବସ୍ଥାରେ ବାପା ନିଜର ହିତାହିତ ଜ୍ଞାନ ଭୁଲି ଯାଇଛି । ପୁରୀ ଜିଲ୍ଲା କୃଷ୍ଣପ୍ରସାଦ ଅଞ୍ଚଳ ଜାଗିରିକୁଦା ଗାଁରେ ଜଣେ ମଦ୍ୟପ ନିଜ ପୁଅକୁ କଟୁରିରେ ଆକ୍ରମଣ କରିଛି । ବାପାର କଟୁରି ଚୋଟରେ ପୁଅ ଗୁରୁତର ହୋଇଛି । ଗୁରୁତର ପୁଅକୁ ପ୍ରଥମେ ବ୍ରହ୍ମଗିରି ମେଡ଼ିକାଲରେ ଭର୍ତ୍ତି କରାଯିବା ପରେ ଭୁବନେଶ୍ଵର ଏମସକୁ ସ୍ଥାନାନ୍ତର କରାଯାଇଛି । 

ପାରିବାରିକ କଳହକୁ କେନ୍ଦ୍ରକରି ବାପା ଓ ନିଜ ବଡ଼ପୁଅ ମଧ୍ୟରେ ଝଗଡ଼ା ହୋଇଥିଲା। ଏଥିରେ ଉତକ୍ଷିପ୍ତ ହୋଇ ଅଭିଯୁକ୍ତ ବାପା କଟୁରିରେ ପୁଅକୁ ଆକ୍ରମଣ କରିଥିଲେ। ଏହା ଫଳରେ ଗୁରୁତର ହୋଇପଡ଼ିଥିଲା ପୁଅ । ତାଙ୍କୁ ଗୁରୁତର ଅବସ୍ଥାରେ ଭୁବନେଶ୍ଵର ଏମସକୁ ସ୍ଥାନାନ୍ତର କରାଯାଇଛି । କୃଷ୍ଣପ୍ରସାଦ ଥାନା ପୋଲିସ ଅଭିଯୁକ୍ତ ବାପାକୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡ଼ିଛି । 

ଏଠାରେ ଉଲ୍ଲେଖ ଯୋଗ୍ୟ, ଗତ କିଛି ଦିନ ତଳେ କଟକ ବାରଙ୍ଗରେ ଜଣେ ବାପା ନିଶାସକ୍ତ ଅବସ୍ଥାରେ ପୁଅ ଦେହରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲା । ସ୍ୱାମୀ ବଞ୍ଚାଇବାକୁ ଯାଇ ତାଙ୍କ ବୋହୂ ମଧ୍ୟ ନିଆଁରେ ପୋଡ଼ି ହୋଇଯାଇଥିଲେ । ସେହି ନିଆଁରେ ପୁଅ ବୋହୂ ଉଭୟ ପୋଡ଼ି ହୋଇ ଗୁରୁତର ହୋଇପଡ଼ିଥିଲେ । ପରବର୍ତ୍ତୀ ସମୟରେ ଦୁଇ ଜଣ ସ୍ୱାମୀ ସ୍ତ୍ରୀ ଚିକିସ୍ଚାଧୀନ ଅବସ୍ଥାରେ ମୃତ୍ୟୁ ବରଣ କରିଥିଲେ । ମୃତକ ଦୁଇ ଜଣ ହେଲେ ଦୀନବନ୍ଧୁ ରାଉତ ଓ ସସ୍ମିତା ରାଉତ । ପୁଲିସ ଅଭିଯୁକ୍ତ ବାପା ଗୋବର୍ଦ୍ଧନ ରାଉତକୁ ଗିରଫ କରିଥିଲା ।