ଭୁବନେଶ୍ୱର: ଆଜି ଧରାପୃଷ୍ଠରୁ ବିଦାୟ ନେବେ ଜଗତଜନନୀ ମା' ଦୁର୍ଗା । ଶେଷ ହୋଇଛି ଶାରଦୀୟ ପାର୍ବଣ । ମା’ଙ୍କୁ ମେଲାଣି ଦେବା ଯେତିକି ଦୁଃଖ ଲାଗିଥାଏ ପୁଣି ଆରବର୍ଷକୁ ମା'ଙ୍କୁ ଅପେକ୍ଷା କରିବା ସେତିକି ଆନନ୍ଦ ଦେଇଥାଏ । ମା’ଙ୍କୁ ବିଦାୟ ଦେବାକୁ ଭଷାଣି ଶୋଭାଯାତ୍ରା ପାଇଁ ଟ୍ୱିନ ସିଟିରେ ବ୍ୟାପକ ବ୍ୟବସ୍ଥା କରାଯାଇଛି । ଭଷାଣି ଶୋଭାଯାତ୍ରା ଶାନ୍ତି ଶୃଙ୍ଖଳାର ସହିତ ସମାପନ କରିବା ପାଇଁ ପରାମର୍ଶ ମଧ୍ୟ ଦିଆଯାଇଛି ।

 ଭଷାଣି ଶୋଭାଯାତ୍ରା ପାଇଁ କଟକ ସହରରେ କମିଶନରେଟ ପୋଲିସ ପକ୍ଷରୁ ବ୍ୟବସ୍ଥା କରାଯାଇଛି । କଟକ ଦୁର୍ଗାପୂଜା ଭଷାଣି ଶୋଭାଯାତ୍ରା ଉପରେ ଡ୍ରୋନ ନଜର ରଖିବ । ସୁରକ୍ଷା ବ୍ୟବସ୍ଥା ପାଇଁ  ୧୨୫ ପ୍ଲାଟୁନ ପୋଲିସ ଫୋର୍ସ ମୁତୟନ କରାଯିବ ।  ଓଡ୍ରାଫ୍ ଏବଂ ଅଗ୍ନିଶମ ବିଭାଗକୁ ସଜାଗ ରହିବାକୁ ନିର୍ଦ୍ଦେଶ ଦିଆଯାଇଛି । ଭଷାଣି ଶୋଭାଯାତ୍ରାର ସ୍ଥିତିକୁ ଅନୁଧ୍ୟାନ କରିବା ପାଇଁ ୫ ଶହରୁ ଅଧିକ ସିସିଟିଭି କ୍ୟାମେରା ଲଗାଯାଇଛି । 

ଗତକାଲି ବିଜୟା ଦଶମୀ ଅବସରରେ ରାଜଧାନୀ ଭୁବନେଶ୍ୱରର ବିଭିନ୍ନ ସ୍ଥାନରେ ରାବଣ ପୋଡ଼ି କରାଯାଇଥିଲା । ଅସତ୍ୟ ଉପରେ ସତ୍ୟର ଜୟର ପ୍ରତୀକ ଭାବରେ ପ୍ରତିବର୍ଷ ରାବଣ ପୋଡ଼ି ଅନୁଷ୍ଠିତ ହୋଇଥାଏ ।

ଅଧିକ ପଢନ୍ତୁ : ଆଜି ପବିତ୍ର ବିଜୟା ଦଶମୀ; ଅସତ୍ୟ ଉପରେ ସତ୍ୟର ଜୟ