ବାଙ୍କୁରା/ବାଲେଶ୍ୱର: ପଶ୍ଚିମବଙ୍ଗର ବାଙ୍କୁରା ଜିଲ୍ଲାର ରାନୀବାନ୍ଧ ଅଞ୍ଚଳରେ ଚାଲୁଥିବା ପ୍ରାୟ ୭୨ କୋଟିର ସାଇବର ଠକେଇ ରାକେଟ୍ କୁ ଠାବ କରିଛି ବାଙ୍କୁରା ପୋଲିସ। ଏହି ଘଟଣାରେ ଗିରଫ ହୋଇଥିବା ୭ ଅଭିଯୁକ୍ତଙ୍କ ମଧ୍ୟରେ ଓଡ଼ିଶାର ବାଲେଶ୍ୱର ଜିଲ୍ଲାର ଜଣେ ଯୁବକ ମଧ୍ୟ ରହିଛନ୍ତି।

ବାଙ୍କୁରା ଏସ୍‌ପି ଭି.ଜି. ସତୀଶ କହିଛନ୍ତି, ରାନୀବାନ୍ଧକୁ ନ୍ୟାସନାଲ ସାଇବରକ୍ରାଇମ୍ ରିପୋର୍ଟିଂ ପୋର୍ଟାଲରେ ସମ୍ଭାବ୍ୟ ସାଇବର ହଟସ୍ପଟ୍ ଭାବେ ଚିହ୍ନଟ କରାଯିବା ପରେ ପୋଲିସ ଆଧୁନିକ ତଦନ୍ତ ପ୍ରଣାଳୀରେ ନଜରଦାରି ବଢ଼ାଇଥିଲା।

ଗିରଫ ଅଭିଯୁକ୍ତମାନେ ହେଲେ ପିଣ୍ଟୁ ମାଣ୍ଡି, ଅର୍ଶଲ ସୋରେନ, ଦେବବ୍ରତ ପାଲ, ସୋଭନ ସୋରେନ, ଦିବ୍ୟେନ୍ଦୁ ମଲ୍ଲିକ, ଅବିନାଶ ମାଣ୍ଡି ଓ ଦୀପକ ସର୍ଦ୍ଦାର। ଦେବବ୍ରତ ପାଲ ବାଲେଶ୍ୱରର ବାସିନ୍ଦା ବୋଲି ପୋଲିସ ସୂଚନା ଦେଇଛି।

ପ୍ରାଥମିକ ତଦନ୍ତରୁ ଠକେଇର ପରିମାଣ ପ୍ରାୟ ₹୭୨ କୋଟି ବୋଲି ଆକଳନ କରାଯାଇଛି। ପୋଲିସ ବ୍ୟାଙ୍କ ଆକାଉଣ୍ଟ, ଟଙ୍କା କାରବାରର ଟ୍ରେଲ, ATM ଉଠାଣ ପ୍ୟାଟର୍ନ ଓ ଡାଟା ଆନାଲିଟିକ୍ସ ଆଧାରରେ ଅଭିଯୁକ୍ତଙ୍କୁ ଚିହ୍ନଟ କରିଥିଲା।

ଚଢ଼ାଉ ବେଳେ ପୋଲିସ ୩୪ଟି ବ୍ୟାଙ୍କ ପାସବୁକ୍, ୧୩ଟି ATM କାର୍ଡ, ୯ଟି ଚେକବୁକ୍ ସହ ଆଧାର, PAN ଓ EPIC କାର୍ଡ ଜବତ କରିଛି। ପୋଲିସର ସନ୍ଦେହ, ଗିରଫ ୭ ଜଣ ଏକ ବଡ଼ ଦେଶବ୍ୟାପୀ ସାଇବର ଠକେଇ ନେଟୱର୍କର ନିମ୍ନସ୍ତରୀୟ ସଦସ୍ୟ। ବର୍ତ୍ତମାନ ସେମାନଙ୍କୁ ଜେରା କରି ଏହି ରାକେଟ୍‌ର ମୁଖ୍ୟ ମାଷ୍ଟରମାଇଣ୍ଡଙ୍କୁ ଖୋଜା ଚାଲିଛି।