କଂଗ୍ରେସ ଦଳରେ ପିସିସି ସଭାପତି ବଦଳିବା କୌଣସି ନୂଆ କଥା ନୁହଁ ଏଠି ବାରମ୍ବାର ପିସିସି ବଦଳନ୍ତି ।  ପିସିସି ବଦଳିବାଟା ତାଙ୍କର ଦୁର୍ଭାଗ୍ୟ ଖାଲି ପିସିସି ବଦଳିଗଲେ ଯେ ଭାଗ୍ୟ ବଦଳିଯିବ ତାହା ନୁହଁ ଏଠି ନେତାଙ୍କ ଭିତରେ ଏକତା ନାହିଁ । ଯଦି ପାଞ୍ଚ ଜଣ ନେତା ଏକାଠି ହୋଇ କାର୍ଯ୍ୟ କରନ୍ତେ ଦଳର ଉନ୍ନତି ହୁଅନ୍ତା । ୯ଟା ବିଧାନସଭା ଆସନ ରୁ ୧୪ ଆସନରେ ପହଂଚିଲେ ସେମାନଙ୍କର ଉଦ୍ୟମ ଓ ପ୍ରଚେଷ୍ଟା ବଳରେ କିନ୍ତୁ ଦଳ ତରଫରୁ ଯଦି ଠିକଣା କାର୍ଯ୍ୟ ହୋଇ ପାରିଥାନ୍ତା ତାହାଲେ ବିଧାନସଭା ଆସନ ସଂଖ୍ୟା ମଧ୍ୟ ବଢ଼ି ପାରିଥାନ୍ତା । AICC  ପକ୍ଷରୁ ଓଡିଶା ପ୍ରଦେଶ ପାଇଁ ଅବହେଳା ମନୋଭାବ ଆନ୍ତରିକତାର ଅଭାବ ପାଇଁ କଂଗ୍ରେସ ଆଗେଇ ପାରୁନାହିଁ । ଏମିତି କିଛି କହିଛନ୍ତି ବରିଷ୍ଠ ସାମ୍ବାଦିକ ଗିରିଜା ଶଙ୍କର ଦାସ ।

ନିର୍ବାଚନ ପରେ ଓଡ଼ିଶାକୁ ନେଇ AICCର ବଡ଼ ନିଷ୍ପତ୍ତି ନେଇଛି । ଛାତ୍ରଠୁ ଯୁବ, ମହିଳାଠୁ ନେଇ କିସାନ କଂଗ୍ରେସ ସବୁ କମିଟିକୁ AICC ଭାଙ୍ଗି ଦେଇଛନ୍ତି । ପ୍ରଥମ ଥର ପାଇଁ ଏଭଳି ପଦକ୍ଷେପ ନେଇଛନ୍ତି ହାଇକମାଣ୍ଡ । ଶରତଙ୍କ ୯ରୁ ୯୦ ଫର୍ମୁଲା ଫେଲ୍ ମାରିବା ପରେ ତାଙ୍କ ନେତୃତ୍ୱକୁ ନେଇ ବିରୋଧ ତୀବ୍ର ହୋଇଥିଲା। ଏପରିକି କିଛି ଯୁବ-ଛାତ୍ର କର୍ମୀ ପାର୍ଟି ଅଫିସ ଭିତରେ ତାଙ୍କ ଉପରେ କାଳି ମାଡ଼ କରିଥିଲେ । ତାପରେ ଯେମିତି କଂଗ୍ରେସ ଭବନ ଅଚଳ ହୋଇଯାଇଥିଲା । ମାସାଧିକ କାଳ ଧରି କଂଗ୍ରେସ ଭବନକୁ ପିସିସି ସଭାପତି କି ବରିଷ୍ଠ ନେତାଙ୍କ ଗସ୍ତ ହୋଇନଥିଲା । ଏପରିକି ନିଲମ୍ବିତ ନେତ୍ରୀ ଶ୍ରୀୟାସ୍ମିତା ପଣ୍ଡା ମୁଖ୍ୟ ଫାଟକରେ ତାଲା ପକାଇ ଧାରଣା ଦେଇଥିଲେ। ଏକ ପ୍ରକାର ମୂରବୀ ଶୂନ୍ୟ ହୋଇଯାଇ ଥିଲା ରାଜ୍ୟ କଂଗ୍ରେସ । କିନ୍ତୁ ଏବେ ବିଧାନସଭା ଆରମ୍ଭ ହେବା ପୂର୍ବରୁ ଭାଙ୍ଗିଛି ଓଡ଼ିଶା ପ୍ରଦେଶ କଂଗ୍ରେସ କମିଟି । 

ଲୋକସଭାରେ ବିଜେଡି ଯେତେବେଳେ ଖାତା ଖୋଲି ପାରିନାହିଁ ସେତେବେଳେ କଂଗ୍ରେସ କୋରାପୁଟରେ ଖାତା ଖୋଲିଛି  ତେଣୁ ଏବେଠୁ କଂଗ୍ରେସ ଯଦି  ତାର ପରିବାରକୁ ସମ୍ଭାଳି ପାରିବ ତାହେଲେ ଆଗାମୀ ପଂଚାୟତ ନିର୍ବାଚନ ଓ ପୌରନିର୍ବାଚନରେ ହୁଏତ ଭଲ କରି ପାରିବ । 

ତେବେ ପିସିସି ସଭାପତି ରେସରେ ଆଗରେ ଅଛନ୍ତି  ଜୟପୁର ବିଧାୟକ ତାରପ୍ରସାଦ ବାହିନୀପତି, ସାଂସଦ ସପ୍ତଗିରି ଉଲାକା, ସାନଖେମୁଣ୍ଡି ବିଧାୟକ ରମେଶ ଜେନା ଓ ଭକ୍ତ ଦାସ ପ୍ରମୁଖ । ତେବେ ଦେଖିବାକୁ ବାକି ରହିଲା କଂଗ୍ରେସ ତା’ର  ନୂଆ ଟିମ୍ ସହ ନୂଆ ମଙ୍ଗୁଆଳଙ୍କ ନାଁ କେବେ ଘୋଷଣା କରୁଛି ।