ବାଙ୍କୀ କଟକ ରାସ୍ତାର ରଣଶଙ୍ଖ ନିକଟରେ ଭୟଙ୍କର ସଡ଼କ ଦୁର୍ଘଟଣା ହୋଇଛି । ଏହି ଦୁର୍ଘଟଣାରେ ଦୁଇଜଣ ଛାତ୍ରଙ୍କ ମୃତ୍ୟୁ ହୋଇଥିବା ବେଳେ ଜଣଙ୍କୁ କଟକ ଏସସିବି ସ୍ଥାନାନ୍ତର କରାଯାଇଛି । ସୂଚନା ଅନୁସାରେ, ହରିରାଜପୁର ଗାଁର ୩ଜଣ ଦଶମ ଶ୍ରେଣୀ ଛାତ୍ର ମୋଟରସାଇକେଲରେ ଟ୍ୟୁସନ ସାରି ଘରକୁ ଫେରୁଥିବା ସମୟରେ କଟକ-ବାଙ୍କୀ ରାସ୍ତାରେ ଥିବା ରଣଶଙ୍ଖ ନିକଟରେ ଏହି ଦୁର୍ଘଟଣା ହୋଇଥିଲା | ବାଙ୍କୀରୁ କଟକ ଯାଉଥିବା ଏକ ପିକଅପ୍ ଭ୍ୟାନ୍ ଆସି ସାମ୍ନାରୁ ଧକ୍କା ଦେବା ଫଳରେ ଦୁଇଜଣ ଛାତ୍ର ତଳେ ପଡିଯାଇଥିଲେ । ଯାହା ଫଳରେ, ଦ୍ରୁତ ଗତିରେ ଆସୁଥିବା ଭ୍ୟାନର ଚକ ତଳେ ଚାପି ହୋଇ ଦୁଇଜଣ ଛାତ୍ର ଘଟଣାସ୍ଥଳରେ ହିଁ ମୃତ୍ୟୁ ବରଣ କରିଥିଲେ।

   ଅନ୍ୟ ଜଣେ ଛାତ୍ର ସେଥିରେ ଗୁରୁତର ଆହତ ହୋଇଛନ୍ତି | ତାଙ୍କୁ ତୁରନ୍ତ କଟକସ୍ଥିତ ଏସସିବି ମେଡିକାଲ କଲେଜ ଏବଂ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଉକ୍ତ ୩ ଜଣ ଛାତ୍ର ସ୍ଥାନୀୟ ହରିରାଜପୁର ଗାଁର ଶୋହନ ନାୟକ, ଗୁଡୁ ପିରୋହୀ, ଅବନାଶ ଧଳ ବୋଲି ଜଣାପଡ଼ିଛି । ସେପଟେ ପିକଅପ୍ ଗାଡ଼ିର ଡ୍ରାଇଭର ଘଟଣା ସ୍ଥଳରୁ ଫେରାର ହୋଇଯାଇଥିବା ସୂଚନା ମିଳିଛି । ଏହି ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ସୃଷ୍ଟି ହୋଇଛି | ପରେ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି।

ଅଧିକ ପଢ଼ନ୍ତୁ : ଓଲଟିଲା ଗୋରୁ ବୋଝେଇ ଟ୍ରକ ଚାଲିଗଲା ୪ ଜଣଙ୍କ ଜୀବନ