ବିଶ୍ୱପ୍ରସିଦ୍ଧ ଶ୍ରୀଜଗନ୍ନାଥଙ୍କ ରଥଯାତ୍ରାକୁ ନେଇ ରାଜ୍ୟ ସରକାର ଓ ପରିବହନ ବିଭାଗ ପକ୍ଷରୁ ଶ୍ରଦ୍ଧାଳୁଙ୍କ ପାଇଁ ଆସିଛି ବଡ଼ ଖୁସି ଖବର। ରଥଯାତ୍ରା, ଗୁଣ୍ଡିଚା ଯାତ୍ରା ଓ ସୁନାବେଶ ଦିନ ସମସ୍ତ ପ୍ରକାର ଗାଡ଼ି ପାଇଁ ଟୋଲ ଫି ଛାଡ଼ କରାଯିବ। ବିଶେଷକରି ପିପିଲି ଟୋଲ ଗେଟ୍‌ରେ ଏହି ଦିନଗୁଡ଼ିକରେ କୌଣସି ଟୋଲ ଟିକସ ଆଦାୟ ହେବ ନାହିଁ।

ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ସୁବିଧାକୁ ଆଖିଆଗରେ ରଖି ପରିବହନ କମିଶନର ଅମିତାଭ ଠାକୁରଙ୍କ ଅଧ୍ୟକ୍ଷତାରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଛି। ବୈଠକରେ ରଥଯାତ୍ରା ସମୟରେ ସୁରୁଖୁରୁରେ ଯାତାୟାତ ଓ ଗାଡ଼ି ପରିଚାଳନା ପାଇଁ ବିଭିନ୍ନ ନିଷ୍ପତ୍ତି ନିଆଯାଇଛି।

ସବୁଠାରୁ ବଡ଼ ଆକର୍ଷଣ ହେଉଛି, ପୁରୀର ବିଭିନ୍ନ ପାର୍କିଂ ସ୍ଥଳରୁ ବଡ଼ଦାଣ୍ଡ ପର୍ଯ୍ୟନ୍ତ ଭକ୍ତମାନଙ୍କୁ ପହଞ୍ଚାଇବା ପାଇଁ ୪୦୦ଟି ଇଲେକ୍ଟ୍ରିକ୍ ଗାଡ଼ି ଚଳାଚଳ କରିବ। ଏହି ଇକୋ-ଫ୍ରେଣ୍ଡଲି ଗାଡ଼ିଗୁଡ଼ିକ ଭକ୍ତମାନଙ୍କୁ ସହଜ ଓ ସୁବିଧାଜନକ ଯାତ୍ରାର ଅନୁଭୂତି ଦେବ।

ରଥଯାତ୍ରା ପାଇଁ ରାଜ୍ୟ ଓ ରାଜ୍ୟ ବାହାରୁ ପ୍ରାୟ ହଜାରେ ବସ୍‌ ଚଳାଚଳ କରିବ। ବାହାର ରାଜ୍ୟ ଓ ପର୍ଯ୍ୟଟକ ବସ୍‌ଗୁଡ଼ିକ ମାଳତୀପାଟପୁର ବସ୍ ଟର୍ମିନାଲ୍ ପର୍ଯ୍ୟନ୍ତ ଆସିବାକୁ ଥିବାବେଳେ, ନିୟମିତ ବସ୍‌ଗୁଡ଼ିକ ତାଳବଣିଆ ପର୍ଯ୍ୟନ୍ତ ଯିବ। ଏହା ସହିତ ଉଭୟ ସ୍ଥାନରେ ପାର୍କିଂର ସ୍ୱତନ୍ତ୍ର ବ୍ୟବସ୍ଥା ମଧ୍ୟ କରାଯାଇଛି।

କେବଳ ଯାତାୟାତ ନୁହେଁ, ଶ୍ରଦ୍ଧାଳୁଙ୍କ ସ୍ୱାସ୍ଥ୍ୟ ଓ ସୁବିଧାକୁ ମଧ୍ୟ ଗୁରୁତ୍ୱ ଦିଆଯାଇଛି। ସମସ୍ତ ବସ୍‌ରେ ORS ଓ ପାନୀୟ ଜଳ ବ୍ୟବସ୍ଥା ରହିବ। ବସ୍ ଷ୍ଟାଣ୍ଡଗୁଡ଼ିକରେ ମାଗଣା ଖାଦ୍ୟ ବଣ୍ଟନ କରାଯିବ। ଏହାସହ କୌଣସି ଗାଡ଼ି ଅଚଳ ହେଲେ ତୁରନ୍ତ ହଟାଇବା ପାଇଁ କ୍ରେନ୍ ଓ ସ୍ଥାନେ ସ୍ଥାନେ ଏନଫୋର୍ସମେଣ୍ଟ ସ୍କ୍ୱାଡ୍ ମୁତୟନ ହେବେ।

ରଥଯାତ୍ରାରେ ଆସୁଥିବା ଲକ୍ଷାଧିକ ଭକ୍ତଙ୍କ ପାଇଁ ଏହି ବ୍ୟାପକ ବ୍ୟବସ୍ଥା ଯାତ୍ରାକୁ ଅଧିକ ସୁଗମ, ସୁରକ୍ଷିତ ଓ ସ୍ମରଣୀୟ କରିବ ବୋଲି ଆଶା କରାଯାଉଛି।