ଫୁଲବାଣୀ: ଫୁଲବାଣୀ ସର୍କିଟ ହାଉସ୍ ପରିସରରେ ବହୁଚର୍ଚ୍ଚିତ ମୋଟରସାଇକେଲ ପୋଡ଼ି ଘଟଣାର ପର୍ଦ୍ଦାଫାଶ କରିଛି ଫୁଲବାଣୀ ପୋଲିସ୍ । ଘଟଣାକୁ ଗୁରୁତର ସହ ନେଇ କନ୍ଧମାଳ ଏସପିଙ୍କ ନିର୍ଦ୍ଦେଶକ୍ରମେ ଏକ ସ୍ବତନ୍ତ୍ର ଟିମ୍ ଗଠନ କରି ଛାନଭିନ୍ ଆରମ୍ଭ କରିଥିଲା ପୋଲିସ୍ । ଘଟଣାରେ ମୁଖ୍ୟ ଅଭିଯୁକ୍ତ ସୁଜିତ୍ ବେହେରା ନାମକ ଯୁବକକୁ ଗିରଫ କରିଛି ପୋଲିସ୍ । ଅଭିଯୁକ୍ତ ସୁଜିତ୍ ବାବା ବିଭାଗରେ ଫରେଷ୍ଟର ଭାବେ କାମ କରୁଛି । ଏନେଇ ସାମ୍ବାଦିକ ସମ୍ମିଳନୀ ମାଧ୍ୟମରେ ସୂଚନା ଦେଇଛନ୍ତି ଅତିରିକ୍ତ ଏସପି ସ୍ନେହାଶ୍ରୀ ସାହୁ । 

ସୂଚନାଯୋଗ୍ୟ, ଗତ ୨୬ ଡିସେମ୍ବର ବିଳମ୍ବିତ ରାତ୍ରରେ ଫୁଲବାଣୀ ସର୍କିଟ ହାଉସ୍ ପରିସରରେ ଏକ ସ୍କୁଟିରେ ଦୁର୍ବୃତ୍ତ ପେଟ୍ରୋଲ ଢ଼ାଳି ନିଆଁ ଲଗାଇ ଦେଇଥିଲେ । ଫଳରେ ସ୍କୁଟି ନିକଟରେ ଥିବା ଏକ ପଲସର ମୋଟରସାଇକେଲ ଓ ଫୁଲବାଣୀ ବିଧାୟକଙ୍କ ଗାଡ଼ି କ୍ଷତିଗ୍ରସ୍ତ ହୋଇଥିଲା । ମୁଖ୍ୟ ଅଭିଯୁକ୍ତଙ୍କ ମାଆ ପୂର୍ବରୁ ଫୁଲବାଣୀ ସର୍କିଟ ହାଉସରେ କାର୍ଯ୍ୟରତ ଥିଲେ । କିନ୍ତୁ ପରବର୍ତ୍ତୀ ସମୟରେ କୌଣସି କାରଣରୁ ତାଙ୍କୁ କାର୍ଯ୍ୟରୁ ବାହାର କରିଦିଆଯାଇଥିଲା । ପ୍ରତିଶୋଧ ପରାୟଣ ହୋଇ ଅଭିଯୁକ୍ତ ଏଭଳି କାଣ୍ଡ ଘଟାଇଥିବା ପ୍ରାଥମିକ ତଦନ୍ତରୁ ଜଣାପଡ଼ିଥିବା ବେଳେ ଅଭିଯୁକ୍ତଙ୍କ ନାମରେ ଫୁଲବାଣୀ ଟାଉନ୍ ଥାନାରେ ଆଗରୁ ଭିନ୍ନ ଭିନ୍ନ ପାଞ୍ଚଟି ମାମଲା ଥିବା କହିଛନ୍ତି ଅତିରିକ୍ତ ଏସପି ସ୍ନେହାଶ୍ରୀ ସାହୁ ।