ନୂଆଦିଲ୍ଲୀ: ସଂସଦ ଅଧିବେଶନ ଅବସରରେ ନୂଆଦିଲ୍ଲୀରେ ଓଡ଼ିଶାର ବିଜେପି ସାଂସଦମାନଙ୍କର ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି। ବୈଠକରେ ରାଜ୍ୟସଭା ସାଂସଦ ତଥା ଓଡ଼ିଶା ବିଜେପି ସଭାପତି ମନମୋହନ ସାମଲ ଏବଂ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ସମସ୍ତ ବିଜେପି ସାଂସଦ ଉପସ୍ଥିତ ଥିଲେ।

ବୈଠକରେ ଓଡ଼ିଶାର ବିକାଶକୁ ଆହୁରି ଗତିଶୀଳ କରିବା ଉପରେ ବିସ୍ତୃତ ଆଲୋଚନା ହୋଇଥିଲା। ରାଜ୍ୟରେ ଚାଲିଥିବା ବିଭିନ୍ନ ବିକାଶମୂଳକ ପ୍ରକଳ୍ପ, କେନ୍ଦ୍ର ସରକାରଙ୍କ ଯୋଜନାର କାର୍ଯ୍ୟାନ୍ୱୟନ ଏବଂ ରାଜ୍ୟର ପ୍ରାଥମିକ ଆବଶ୍ୟକତାକୁ ନେଇ ସାଂସଦମାନେ ମତବିନିମୟ କରିଥିଲେ। ରାଜ୍ୟର ସାମଗ୍ରିକ ଉନ୍ନତି ପାଇଁ କେନ୍ଦ୍ର ଓ ରାଜ୍ୟ ମଧ୍ୟରେ ସମନ୍ୱୟକୁ ଆହୁରି ସୁଦୃଢ଼ କରିବା ଉପରେ ମଧ୍ୟ ଗୁରୁତ୍ୱ ଦିଆଯାଇଥିଲା।

ଏହାସହ ବୈଠକରେ ଲର୍ଣ୍ଣିଂ ଡିଜାବିଲିଟିରେ ପୀଡ଼ିତ ପିଲାମାନଙ୍କ ଶିକ୍ଷାକୁ ନେଇ ସ୍ୱତନ୍ତ୍ର ଭାବେ ଆଲୋଚନା ହୋଇଥିଲା। ଏଭଳି ପିଲାଙ୍କ ପାଇଁ ସ୍ୱତନ୍ତ୍ର ଶିକ୍ଷା ବ୍ୟବସ୍ଥା, ପ୍ରଶିକ୍ଷିତ ଶିକ୍ଷକ, ଆଧୁନିକ ଶିକ୍ଷଣ ପଦ୍ଧତି ଏବଂ ଆବଶ୍ୟକ ସହାୟତା ଯୋଗାଇବା ଉପରେ ସାଂସଦମାନେ ମତ ରଖିଥିଲେ। ସମସ୍ତ ଶିଶୁଙ୍କୁ ସମାନ ଶିକ୍ଷାର ସୁଯୋଗ ମିଳିବା ଉଚିତ ବୋଲି ବୈଠକରେ ମତ ପ୍ରକାଶ ପାଇଥିଲା।

ବିଶେଷଜ୍ଞଙ୍କ ମତାନୁସାରେ, ଲର୍ଣ୍ଣିଂ ଡିଜାବିଲିଟିରେ ପୀଡ଼ିତ ପିଲାମାନଙ୍କ ପାଇଁ ଉପଯୁକ୍ତ ନୀତି, ସହାୟକ ଶିକ୍ଷା ପରିବେଶ ଏବଂ ଆଧୁନିକ ଶିକ୍ଷଣ ବ୍ୟବସ୍ଥା ଗଢ଼ି ଉଠିଲେ ସେମାନେ ମଧ୍ୟ ନିଜ ପ୍ରତିଭାକୁ ବିକଶିତ କରି ସମାଜର ମୁଖ୍ୟ ସ୍ରୋତରେ ସାମିଲ ହୋଇପାରିବେ।

ବୈଠକ ଶେଷରେ ଓଡ଼ିଶାର ବିକାଶ ଓ ସମାବେଶୀ ଶିକ୍ଷା ବ୍ୟବସ୍ଥାକୁ ଅଧିକ ସୁଦୃଢ଼ କରିବା ପାଇଁ ଆଗାମୀ ଦିନରେ ସମନ୍ୱିତ ପଦକ୍ଷେପ ନେବା ନେଇ ଆଲୋଚନା ହୋଇଥିଲା। ରାଜ୍ୟର ବିକାଶ ସହ ପ୍ରତ୍ୟେକ ଶିଶୁଙ୍କୁ ଗୁଣାତ୍ମକ ଶିକ୍ଷା ପହଞ୍ଚାଇବା ହିଁ ଏହି ବୈଠକର ମୁଖ୍ୟ ବାର୍ତ୍ତା ବୋଲି କୁହାଯାଉଛି।