ଭୁବନେଶ୍ୱର : ଶୀତର ଆଗମନରେ ମହାନଦୀ ଅବବାହିକାରେ ଅବସ୍ଥିତ ସାତକୋଶିଆ ଗଣ୍ଡ ଓ ଅଭୟାରଣ୍ୟରେ ଗୁଞ୍ଜରିତ ହୁଏ ବିଦେଶାଗତ ପକ୍ଷୀଙ୍କ ରାବ । ଏଥର ଶୀତ ଆସିବା ବିଳମ୍ୱିତ ହେବାରୁ ପକ୍ଷୀଙ୍କ ଆଗମନ ମଧ୍ୟ ବିଳମ୍ୱିତ ହୋଇଛି। ଗତ ସପ୍ତାହକ ମଧ୍ୟରେ ରାତିର ପାରଦ ସାମାନ୍ୟ ଖସିଛି। ବୌଦ୍ଧ ଜିଲ୍ଲା ହରଭଙ୍ଗା ବ୍ଲକର ଆଭ୍ୟନ୍ତରୀଣ ଦୁର୍ଗମ ପାହାଡ଼ିଆ ଅଞ୍ଚଳରେ ମଧ୍ଯ ଶୀତର ଲହରୀ ଆରମ୍ଭ ହୋଇଛି । ତେଣୁ ଥଣ୍ଡା ପଡ଼ିବା ପରେ ସାତକୋଶିଆ ଗଣ୍ଡର ନଦୀଶଯ୍ୟା ଓ ଜଳରାଶି ଭିତରେ ଏବେ ପକ୍ଷୀମାନେ ଭିଡ଼ ଜମାଇଲେଣି । ପଦ୍ମତୋଳା ଘଞ୍ଚ ଜଙ୍ଗଲରେ ଥିବା ଗଛଗୁଡ଼ିକରେ ଦଳଦଳ ହୋଇ ପକ୍ଷୀମାନେ ବସା ତିଆରି କରୁଥିବା ଦେଖିବାକୁ ମିଳିଛି । 

​​​ପକ୍ଷୀ ବିଶେଷଜ୍ଞ ମାନଙ୍କ ମତରେ, ଶୀତ ଋତୁରେ ବିଦେଶରେ ପ୍ରବଳ ତୁଷାରପାତ ହେଉଥିବାରୁ ପକ୍ଷୀମାନଙ୍କ ପାଇଁ ଖାଦ୍ୟ ସଙ୍କଟ ହୋଇଥାଏ। ଭାରତରେ ନଭେମ୍ବର ଠୁ ଫେବୃଆରୀ ପର୍ଯ୍ୟନ୍ତ ପରିବେଶ ବେଶ ଥଣ୍ଡା ଓ ଅନୁକୂଳ ହୋଇଥାଏ। ଫଳରେ ନଭେମ୍ବର ମାସରୁ ବିଦେଶୀ ପକ୍ଷୀମାନେ ଭାରତମୁହାଁ ହୋଇଥାନ୍ତି। ସେଥିମଧ୍ୟରୁ ଅନେକ ପକ୍ଷୀଦଳ ଓଡ଼ିଶାର ବିଭିନ୍ନ ଅଞ୍ଚଳକୁ ଆସିଥାନ୍ତି। ସାତକୋଶିଆରେ ପର୍ଯ୍ୟାପ୍ତ ଜଳରାଶି ଥିବାରୁ ସେଠାରେ ପ୍ରଚୁର ଖାଦ୍ୟ ମିଳିଥାଏ ଏବଂ ଅଭୟାରଣ୍ୟର ଘଞ୍ଚଜଙ୍ଗଲ ନିରାପଦ ସ୍ଥାନ ହୋଇଥିବାରୁ ପ୍ରତିବର୍ଷ ଏହି ଅଞ୍ଚଳକୁ ଲକ୍ଷଲକ୍ଷ ବିଦେଶୀ ପକ୍ଷୀ ଆସି ବସା ବାନ୍ଧିଥାଆନ୍ତି। ପୁଣି ଶୀତଋତୁ ଶେଷ ହେଲା ପରେ ଫେବୃଆରୀ ମାସ ଶେଷଆଡ଼କୁ ପୁଣି ସେମାନେ ଫେରିଯାଆନ୍ତି । 

ର୍ତ୍ତମାନ ସାତକୋଶିଆ ଅଞ୍ଚଳରେ ପକ୍ଷୀମାନଙ୍କ ଚଲାବୁଲା ଓ ସମାଗମ ଆରମ୍ଭ ହୋଇଗଲାଣି । ବିଦେଶାଗତ ପକ୍ଷୀଙ୍କ ମଧ୍ୟରେ ରୁଡ୍ଡି ସେଲଡକ, ପନିଟେଲ୍, ଶାଭାର ଓ ଗଡୱାଲ୍ ଆଦି ବିଭିନ୍ନ ପକ୍ଷୀ ମାନେ ଆସିଥାନ୍ତି । ତେବେ ପକ୍ଷୀଙ୍କ ସୁରକ୍ଷାକୁ ଦୃଷ୍ଟିରେ ରଖି ବ୍ୟାପକ ପଦକ୍ଷେପ ଗ୍ରହଣ କରାଯାଇଥିବା ଡିଏଫ୍ଓ ସୂଚନା ଦେଇଛନ୍ତି।