କଟକ: ନକଲି ପୋଲିସ ବାବୁଙ୍କୁ ବାନ୍ଧିଲା ଅସଲି ପୋଲିସ । ନିଜକୁ ଥାନା ଅଧିକାରୀର ପରିଚୟ ଦେଇ ଚାକିରୀ ଦେବେ କହି ଲୋକଙ୍କ ଠାରୁ ଠକିଛନ୍ତି ପ୍ରାୟ ୫୦ ଲକ୍ଷ ଟଙ୍କା । ଏହି ସିଣ୍ଡିକେଟ ରେ ପାଖାପାଖି  ୪୦  ଜଣ ଠକେଇର ଶିକାର ହୋଇଛନ୍ତି । ଏହି ଠକେଇ ଅଭିଯୋଗରେ ନକଲି ପୋଲିସକୁ କଟକ ବାଦାମବାଡ଼ି ଥାନା ପୋଲିସ ଗିରଫ କରିଛି । ଗିରଫ ଅଭିଯୁକ୍ତ ଜଣକ ହେଲେ ଗୁଣ୍ଡିଚା ଦଳେଇ । ତାଙ୍କ ନିକଟରୁ ୩ଟି ୟୁନିଫର୍ମି, ନକଲି ଆଇଡି କାର୍ଡ, ଏକ ଲ୍ୟାପଟପ ଓ ୫ଟି ମୋବାଇଲ ସହିତ ୪ ଲକ୍ଷ ଟଙ୍କା ଜବତ କରିଛି ପୋଲିସ । ଏ ନେଇ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଡିସିପି ଋଷିକେଶ ଖିଲାରୀ । 

ଡିସିପିଙ୍କ ସୂଚନା ମୁତାବକ, ବାଦାମବାଡ଼ି ଥାନାରେ ଜିତାଂଶୁ ଶେଖର ପରିଡା (୨୮) ନାମକ ଜଣେ ଯୁବକ ଠକେଇର ଶୀକାର ହୋଇଥିବା ନେଇ ଅଭିଯୋଗ କରିଥିଲେ । ସେ ସିଏନବିଟି ବସ ଷ୍ଟାଣ୍ଡରେ ଜଣେ ସୁରକ୍ଷାକର୍ମୀଭାବେ କାମ କରନ୍ତି । ତାଙ୍କୁ ହୋମଗାର୍ଡ଼ରେ ଚାକିରି ଦେବାକୁ କହି ଗୁଣ୍ଡିଚା ଦଳେଇ ନାମରେ ଜଣେ ବ୍ୟକ୍ତି ତାଙ୍କ ଠାରୁ ଦେଢ଼ ଲକ୍ଷ ଟଙ୍କା ଲୁଟି ନେଇଛନ୍ତି । ଗୁଣ୍ଡିଚା ଦଳେଇ ନିଜକୁ କଟକ ଜିଲ୍ଲା ଗ୍ରାମାଞ୍ଚଳ ପୋଲିସର ଜଣେ ଇନ୍ସପେକ୍ଟରର ଭାବେ ପରିଚୟ ଦେଇଥିଲେ । ଗ୍ରାମାଞ୍ଚଳ ଥାନାରେ ହୋମଗାର୍ଡ ଚାକିରି ପାଇବା ଲୋଭରେ ଉକ୍ତ ବ୍ୟକ୍ତି ଜଣକ ଗୁଣ୍ଡିଚାକୁ ଦେଢ଼ ଲକ୍ଷ ଟଙ୍କା ଦେଇଥିଲେ । କିନ୍ତୁ ପରେ ତାଙ୍କୁ ଚାକିରି ମିଳି ନ ଥିଲା । ଏହା ପରେ ସେ ଥାନାର ଦ୍ୱାରସ୍ଥ ହୋଇଥିଲେ । 

ପୋଲିସ ଅଭିଯୋଗ ମୁତାବକ ତଦନ୍ତ ଆରମ୍ଭ କରିଥିଲା । ତଦନ୍ତବେଳେ ଜଣା ପଡ଼ିଥିଲା କି ଗୁଣ୍ଡିଚା ଦଳେଇ ବିଶ୍ୱାସ ଭାଜନ ପାଇଁ ଅସଲି ପୋଲିସ ଭଳି ପୋଷାକ, କାନ୍ଧରେ ଷ୍ଟାର୍ ମୁଣ୍ଡରେ ପୋଲିସ କ୍ୟାପ୍ ପିନ୍ଧୁ ଥିଲେ । ଗିରଫ ପରେ ତାଙ୍କ ନିକଟରୁ, ୩ଟି ଖାକି ପୋଷାକ ,ଫେକ ଆଇକାର୍ଡ, ଏକ ଲ୍ୟାପଟପ , ୫ଟି ମୋବାଇଲ ଜବତ କରିଛି ପୋଲିସ । ଏହା ସହ ତାଙ୍କ ବ୍ୟାଙ୍କ ଆକାଉଣ୍ଟରୁ ୪ ଲକ୍ଷ ଟଙ୍କା ଫ୍ରିଜ କରାଯାଇଛି । ତଦନ୍ତ ସମୟରେ ଯେଉଁ ମାନେ ଠକେଇର ଶିକାର ହୋଇଥିବେ ସେମାନଙ୍କୁ ଟଙ୍କା ଫେରସ୍ତ କରାଯିବ ବୋଲି କହିଛନ୍ତି ଡିସିପି ଋଷିକେଶ ଖିଲାରୀ। 

ଏହି ଠକେଇରେ ପାଖାପାଖି  ୪୦  ଜଣ ଶିକାର ହୋଇଛନ୍ତି ।  କଟକ ସହର ଓ ଜିଲ୍ଲାର ବିଭିନ୍ନ ଅଞ୍ଚଳରେ ଥିଲା ଠକେଇ ସିଣ୍ଡିକେଟ। ଏବେ ଯାଏଁ ଜଣଙ୍କଠାରୁ ମାମଲା ହସ୍ତଗତ ହୋଇଛି । କେବଳ ପୋଲିସ ଚାକିରି ନୁହେଁ, ଆର ଆଇ ଅମିନ ଚାକିରୀ ଦେବା ନାଁରେ ମଧ୍ୟ ଠକେଇ କରୁଥିଲା ଗୁଣ୍ଡିଚା । ବର୍ତ୍ତମାନ ପୋଲିସ ଡ୍ରେସ ମାର୍କେଟରେ ଉପଲବ୍ଧ ରହୁଛି । ତେଣୁ ଏହାର ସୁଯୋଗ ନେଇ ଗୁଣ୍ଡିଚା ଏପରି କାର୍ଯ୍ୟ କରିଛି। ବିଶେଷକରି  ଯୁବକମାନଙ୍କୁ ଟାର୍ଗେଟ କରୁଥିଲା । କେଉଁଟି ପିଲାମନେ ପଢୁଛନ୍ତି । ସେହି ସ୍ଥାନରେ କରୁଥିଲା ଯୋଜନା । ୟୁନିଫର୍ମ ପିନ୍ଧି ଫଟୋ ଉଠାଇ ପିଲ ମାନଙ୍କୁ ଛାଡୁଥିଲା ଓ ପରେ ପରେ ଚାକିରୀ କରେଇ ଦେବା ବାହାନାରେ ସଫଳ ହେବା ପରେ ଲକ୍ଷାଧିକ ଟଙ୍କା ଲୁଟୁଥିଲା ବୋଲି ଡିସିପି କହିଛନ୍ତି ।  

ଅଧିକ ପଢ଼ନ୍ତୁ- ରାତିସାରା ଚାଲିଲା ବିଧାନସଭା; ପ୍ରାୟ ୧୨ ଘଣ୍ଟା ଧରି ଚାଲିଥିଲା ଆଲୋଚନା